«ءبىرتۇتاس تاربيە» باعدارلاماسىن جۇزەگە اسىرۋ ماقساتىندا مەكتەپ جاسىنا دەيىنگى بالالاردىڭ تانىمدىق ءارى شىعارماشىلىق بەلسەندىلىگىن ارتتىرۋ قۇرالى رەتىندە، بالالاردىڭ تىلدىك داعدىلارىن دامىتۋ، تاقىرىپتىق تالقىلاۋ ارقىلى قۇندىلىقتاردى دارىپتەۋ ماقساتىندا شورتاندى اۋدانى بويىنشا ءبىلىم ءبولىمىنىڭ جانىنداعى شورتاندى كەنتىنىڭ «بالداۋرەن» بالاباقشاسىندا «مۋلتيماگيا» جوباسى ەنگىزىلدى.
جوبا ماقساتى: بالالاردىڭ شىعارماشىلىعىن دامىتۋ ارقىلى، ونەرتاپقىشتىققا قىزىعۋشىلىعىن ارتتىرۋ، جاسامپازدىق پەن جاڭاشىلدىق، ەڭبەكقورلىق، بىرلىك پەن ىنتىماقتاستىق قۇندىلىقتارىن بالا بويىنا دارىتۋ.
مەكتەپكە دەيىنگى جاس – بالانىڭ سويلەۋ ءتىلىن بەلسەندى مەڭگەرۋ، سويلەۋدىڭ بارلىق اسپەكتىلەرىنىڭ قالىپتاسۋى مەن دامۋ (فونەتيكالىق، لەكسيكالىق، گرامماتيكالىق) كەزەڭى. بۇل شاقتا انا ءتىلىن تولىق مەڭگەرۋ دامۋدىڭ سەزىمتال كەزەڭىندە بالالاردى پسيحيكالىق، ەستەتيكالىق جانە ادامگەرشىلىك تاربيەلەۋ مىندەتتەرىن شەشۋدىڭ قاجەتتى شارتى بولىپ تابىلادى.
«حالىق اۋىز ادەبيەتىنىڭ ۇلگىلەرى مەن ەرتەگى كەيىپكەرلەرىن ساز بالشىقتان مۇسىندەۋ بالالاردىڭ قول موتوريكاسىن دامىتادى. ال كەيىپكەرلەردى سويلەتۋ ارقىلى بالالاردىڭ سوزدىك قورىن مولايتۋ، قازاقتىڭ ادەبي كوركەم تىلىندە سويلەۋگە داعدىلاندىرۋ كوزدەلەدى. بالالار مۋلتفيلمدەردى ازىرلەۋ بارىسىندا شاعىن ماتىندەردى جاتتاۋ، رولدەردى سومداۋ ارقىلى بەلسەندى قارىم-قاتىناسقا ءتۇسىپ، بىرلەسكەن قىزمەت ارقىلى كىشىگىرىم ماسەلەلەردى شەشەدى. بۇگىندە بالالار مۋلتفيلمدەردى وزدەرى دە جاساپ ۇيرەنۋدە»،-دەپ ايتتى بالاباقشا مەڭگەرۋشىسى گۋلبانۋ مۋكاشەۆا.
ناقتىلاپ ايتساق، ءبىلىم بەرۋ ۇدەرىسىندەگى مۋلتفيلم - بۇل قازىرگى ۆيزۋالدى جانە اقپاراتتىق باي الەمدە بالانىڭ دامۋىنىڭ جاڭا امبەباپ كوپ قىرلى ءتاسىلى. بۇل بالالار مەن ەرەسەكتەردىڭ بىرلەسكەن ءىس-ارەكەتىنە نەگىزدەلگەن يننوۆاتسيالىق ءادىس.
ەستەرىڭىزگە سالا كەتەيىك، اقمولا وبلىسىندا 597 مەكتەپكە دەيىنگى ۇيىم جۇمىس ىستەيدى، ونىڭ ىشىندە 260 بالاباقشا.
