بۇگىن، 3 قىركۇيەكتە، سولتۇستىك قازاقستان وبلىسى ايىرتاۋ اۋدانى بوتاي ەلدى مەكەنىندە حالىقارالىق «ۇلى دالا جورىعى» مارافون-بايگەسى باستالدى. ءدۇبىرلى دودا «AMANAT» پارتياسى مەن تۋريزم جانە سپورت مينيسترلىگىنىڭ قولداۋىمەن وتكىزىلىپ جاتىر.
سالتاناتتى ءىس-شارانىڭ اشىلۋىندا «AMANAT» پارتياسىنىڭ حاتشىسى ەرجان جىلقىباەۆ بۇگىنگى ايتۋلى دودا مەملەكەت باسشىسى قاسىم-جومارت توقاەۆتىڭ باستاماسىمەن ۇيىمداستىرىلعان 5-ءشى دۇنيەجۇزىلىك كوشپەندىلەر ويىندارىنىڭ پرولوگى بولاتىنىن اتاپ ءوتتى.
سونىمەن قاتار پارتيا حاتشىسى «ۇلى دالا جورىعى» مارافونىنىڭ سيمۆولدىق ماڭىزدىلىعىن اتاپ ءوتتى. ماسەلەن بيىلعى جارىس وسىدان بەس مىڭ جىل بۇرىن ادامزات بالاسى العاش رەت جىلقى مالىن قولعا ۇيرەتكەن تاريحي بوتاي ەلدى مەكەنىنەن باستاۋ الدى. ءدال وسى جەردەن ءتۇرلى ەلدەردەن كەلگەن شامامەن 85 شاباندوز 500 شاقىرىم جولدى ءجۇرىپ ءوتىپ، كوشپەندىلەردىڭ مادەني كودىنىڭ بىرەگەيلىگىن كورسەتەدى.
ءوز كەزەگىندە ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ «ۇلى دالا جورىعى» مارافون-بايگەسىن شاباندوزدارمەن قاتار، ارعىماقتاردىڭ دا توزىمدىلىگى مەن شىدامدىلىعى سىنعا تۇسەتىن ناعىز دالا جارىسى دەپ اتاپ، بارلىق قاتىسۋشىلارعا ساتتىلىك تىلەدى.
شاباندوزدار 3-7 قىركۇيەك ارالىعىندا لوبانوۆو اۋىلىنان استاناعا دەيىن 500 شاقىرىم قاشىقتىقتى ءجۇرىپ وتەدى. مارافون ارقايسىسى 100 شاقىرىمنان تۇراتىن 5 كەزەڭگە بولىنگەن. ءدۇبىرلى دوداlf قاتىسۋشىلار مەن كورەرمەندەر ەجەلگى تۇرىكتەردىڭ قاسيەتتى جانە تاريحي ورىندارىن ارالاۋعا مۇمكىندىك الادى.
ات جارىسىنا 9 قازاقستاندىق كوماندا، ونىڭ ىشىندە ەكى ايەلدەر كومانداسى قاتىسىپ جاتىر. سونداي-اق جارىسقا تۇركيا، ۆەنگريا، يران، وڭتۇستىك افريكا رەسپۋبليكاسى، قىرعىزستان جانە رەسەيدەن، اتاپ ايتقاندا، تاتارستان، كاباردا-بالقاريا جانە قاراشاي-شەركەسيادان كەلگەن 8 شەتەلدىك كوماندا قاتىسادى. ءاربىر كوماندا 5 شاباندوز جانە 5 جۇيرىكتەن تۇرادى.
ايتا كەتۋ كەرەك، «ۇلى دالا جورىعى» ىشكى جانە سىرتقى ءتۋريزمنىڭ دامۋىنا، جاڭا قىزىقتى ەكسكۋرسيالىق ورىنداردىڭ اشىلۋىنا جانە قازاق جىلقى تۇقىمدارىن ناسيحاتتاۋعا ىقپال ەتەدى.
ەسكە سالا كەتەيىك، 5-ءشى دۇنيەجۇزىلىك كوشپەندىلەر ويىندارى قازاقستاندا 8-13 قىركۇيەك ارالىعىندا وتەدى. بۇل ءىس-شاراعا شامامەن 2000 قاتىسۋشى كەلەدى دەپ كۇتىلۋدە.
«AMANAT» پارتياسى جانە ۇلتتىق
سپورت قاۋىمداستىعىنىڭ ءباسپاسوز قىزمەتتەرى
مەيىربەك تاجقۇرانوۆتىڭ سۋرەتتەرى
