Búgin, 3 qyrkúıekte, Soltústik Qazaqstan oblysy Aıyrtaý aýdany Botaı eldi mekeninde halyqaralyq «Uly dala joryǵy» marafon-báıgesi bastaldy. Dúbirli doda «AMANAT» partııasy men Týrızm jáne sport mınıstrliginiń qoldaýymen ótkizilip jatyr.
Saltanatty is-sharanyń ashylýynda «AMANAT» partııasynyń Hatshysy Erjan Jylqybaev búgingi aıtýly doda Memleket basshysy Qasym-Jomart Toqaevtyń bastamasymen uıymdastyrylǵan 5-shi Dúnıejúzilik kóshpendiler oıyndarynyń prology bolatynyn atap ótti.
Sonymen qatar partııa Hatshysy «Uly dala joryǵy» marafonynyń sımvoldyq mańyzdylyǵyn atap ótti. Máselen bıylǵy jarys osydan bes myń jyl buryn adamzat balasy alǵash ret jylqy malyn qolǵa úıretken tarıhı Botaı eldi mekeninen bastaý aldy. Dál osy jerden túrli elderden kelgen shamamen 85 shabandoz 500 shaqyrym joldy júrip ótip, kóshpendilerdiń mádenı kodynyń biregeıligin kórsetedi.
Óz kezeginde Ulttyq sport qaýymdastyǵynyń prezıdenti Islambek Saljanov «Uly dala joryǵy» marafon-báıgesin shabandozdarmen qatar, arǵymaqtardyń da tózimdiligi men shydamdylyǵy synǵa túsetin naǵyz dala jarysy dep atap, barlyq qatysýshylarǵa sáttilik tiledi.
Shabandozdar 3-7 qyrkúıek aralyǵynda Lobanovo aýylynan Astanaǵa deıin 500 shaqyrym qashyqtyqty júrip ótedi. Marafon árqaısysy 100 shaqyrymnan turatyn 5 kezeńge bólingen. Dúbirli dodalf qatysýshylar men kórermender ejelgi túrikterdiń qasıetti jáne tarıhı oryndaryn aralaýǵa múmkindik alady.
At jarysyna 9 qazaqstandyq komanda, onyń ishinde eki áıelder komandasy qatysyp jatyr. Sondaı-aq jarysqa Túrkııa, Vengrııa, Iran, Ońtústik Afrıka Respýblıkasy, Qyrǵyzstan jáne Reseıden, atap aıtqanda, Tatarstan, Kabarda-Balqarııa jáne Qarashaı-Sherkesııadan kelgen 8 sheteldik komanda qatysady. Árbir komanda 5 shabandoz jáne 5 júırikten turady.
Aıta ketý kerek, «Uly dala joryǵy» ishki jáne syrtqy týrızmniń damýyna, jańa qyzyqty ekskýrsııalyq oryndardyń ashylýyna jáne qazaq jylqy tuqymdaryn nasıhattaýǵa yqpal etedi.
Eske sala keteıik, 5-shi Dúnıejúzilik kóshpendiler oıyndary Qazaqstanda 8-13 qyrkúıek aralyǵynda ótedi. Bul is-sharaǵa shamamen 2000 qatysýshy keledi dep kútilýde.
«AMANAT» partııasy jáne Ulttyq
sport qaýymdastyǵynyń baspasóz qyzmetteri
Meıirbek Tájquranovtyń sýretteri
