قازاقتىڭ ۇلتتىق سپورت تۇرلەرىنىڭ ىشىندەگى وداعاي ءتۇرى، ەجەلدەن تارام-تارام ۇرپاق ارقىلى جالعاسىپ كەلە جاتقان قاستەرلى دە قازىنالى قازاق كۇرەسى بۇگىنگى تاڭدا ەرەكشە مازمۇنعا يە بولىپ، جاستارىمىزدىڭ ءسۇيىپ شۇعىلداناتىن سپورت تۇرىنە اينالىپ وتىر.
قازاق كۇرەسى ءوزىنىڭ تاريح جەڭىسىنە 2004 جىلدىڭ مامىر ايىنىڭ 12-15 كۇندەرى گەرمانيانىڭ بەرلين قالاسىندا وتكەن بۇكىلالەمدەگى قازاقتاردىڭ قۇرىلتاي جيىنىندا جەتكەن ەدى. سول ءبىر القالى جيىندا 16 مەملەكەتتەن كەلگەن قوناقتارعا قازاق كۇرەسىنىڭ ەرەشەلىكتەرى ۇلكەن ستاديوندا اسقاقتاتا كورسەتىلىپ، سەرىك ادامبولسىنۇلى تۇكەەۆ ايتۋلى قاۋىمداستىقتىڭ پرەزيدەنتى بولىپ ءبىراۋىزدان سايلاندى. وسى جىلدان باستاپ اتا كۇرەسىمىز جاڭا زامان اعىمىنا ءتۇسىپ، الەم ەلدەرىنە تانىلا باستادى دەسەك بولادى. قازاق كۇرەسىن جەر-جۇزىنە تانىتىپ قانا قويماي، انا ءتىلىمىزدى دە دارىپتەۋگە مۇمكىندىك تۋدى.
الەمگە تارىداي شاشىلعان قازاق ۇلتىنىڭ بىرلىگىن قازاق كۇرەسى ارقىلى ۇيىتا وتىرىپ، ونى ازيا ويىندارى مەن وليمپيادا دەڭگەيىنە دەيىن كوتەرۋ دۇنيەجۇزىلىك قازاق كۇرەسى فەدەراتسياسىنىڭ باستى ۇستانىمى. بۇگىنگى تاڭدا قازاق كۇرەسىنەن 7 الەم چەمپيوناتى، 3 الەم كۋبوگى، 11 ازيا، 5 ەۋروپا، 2 رەت پان-امەريكا جانە افريكا چەمپيوناتتارى ءوتىپ، ءتول كۇرەسىمىز الەمنىڭ الپاۋىت مەملەكەتتەرىنىڭ تورىندە سالتانات قۇردى. وسى جارىستاردىڭ قاتارىنا ءى ەۋروپالىق سپورت ويىندارىن، جاسوسپىرىمدەر اراسىنداعى ءى الەم چەمپيوناتىن، جاستار اراسىنداعى ءى الەم چەمپيوناتىن دا قوسساق بولادى. سونىمەن قاتار، دۇنيەجۇزىلىك قازاق كۇرەسى فەدەراتسياسىنىڭ مۇرىندىق بولۋىمەن ەلىمىزدە كۇش اتاسى قاجىمۇقان مۇڭايتپاسۇلى اتىنداعى جانە باقىتجان جاڭبىرباەۆتىڭ جارىستارى، ىرعىزباي دوسقانۇلى اتىنداعى حالىقارالىق گران-پري ءتۋرنيرى ءداستۇرلى تۇردە جىل سايىن ۇيىمداستىرىلۋدا.
مىنە، وسىنداي الەمنىڭ ءار تۇكپىرى مەن ەلىمىزدە ۇيىمداستىرىلعان الامان جەكپە-جەكتەر دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى يسلام الماقانۇلى ابىشەۆ پەن ۇيىمنىڭ ءبىرىنشى ۆيتسە-پرەزيدەنتى، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشى، پروفەسسور سەرىك ادامبولسىنۇلى تۇكەەۆتىڭ وراسان زور ەڭبەكتەرىنىڭ ارقاسىندا جالعاسىن ۇزبەي كەلەدى.
بۇگىنگى كۇنى قازاق كۇرەسىنە وزگە ۇلت وكىلدەرىنىڭ قىزىعۋشىلىعى ارتا ءتۇسىپ، الەمنىڭ ءار شەتىندە فەدەراتسيالار اشىلعان. وزگە كۇرەس تۇرلەرىنەن ەرەكشە وقشۋالانىپ تۇرعان بەكزات ونەرىمىزدىڭ قازىرگى قارقىنى ەرەك.
بولاشاقتا جىل سايىن القالى جيىندار وتكىزىلىپ، رەسمي جارىستارعا فەدەراتسيالار اشقان ەلدەردى ارنايى شاقىرىپ وتىرۋ دۇنيەجۇزىلىك قازاق كۇرەسى فەدەراتسياسىنىڭ العا قويعان باستى جوسپارىنىڭ ءبىرى. كۇنى بۇگىنگە دەيىن الەمنىڭ 40 استام ەلىندە ۇلتتىق كۇرەسىمىزدەن فەدەراتسيالار اشىلىپ، بەلسەنە جۇمىس جاسالۋدا. بۇل ناقتى دەرەك دەسە بولادى.
وسى كۇنگە دەيىن دۇنيەجۇزىلىك قازاق كۇرەسى فەدەراتسياسى مەن (UWW) بىرىككەن كۇرەس قاۋىمداستىعى بىرىگىپ ۇيىمداستىرعان ءاربىر بايراقتى بەلدەسۋلەر ۇلتتىق كۇرەسىمىزدى بيىك بەلەستەرگە شىعارىپ كەلەدى. ارينە، قازاق كۇرەسىنىڭ الار اسۋلارى ءالى الدا دەپ بىلەمىز، دەگەنمەن بۇگىنگى تاڭعا دەيىن اتا كۇرەسىمىزدى وسىنشاما دەڭگەيگە كوتەرىپ، الەم ساحناسىنا شىعارۋعا بىردەن-ءبىر سەبەپشى جان سەرىك ادامبولسىنۇلى تۇكەەۆ سەكىلدى ۇلتتىق كۇرەسىمىزگە كوپ جىلدار بويى تىنىمسىز، تاباندىلىقپەن جاساعان ورەلى جۇمىستارىنىڭ ناتيجەسىندە قازاق كۇرەسىن الەم تانىپ بىلە باستادى.
ال، سول قازاق كۇرەسىنە باسىنان باقايشىعىنا دەيىن جانى اشيتىن سەرىك ادامۇلى سىندى ايبىندى اعامىزدىڭ تاعى ءبىر جەتكەن ۇلكەن جەتىستىگى ول ۇلتتىق كۇرەسىمىزدى اشحابادتتا جابىق كەشەندە وتكەن ازيا ويىندارىنىڭ باعدارلاماسىنا ءسۇيىنشىلىپ ەنگىزۋى بولدى. سول بايراقتى سىندا ءۇش سالماقتا ءۇش بالۋانىمىز ەكى التىن، ءبىر قولا جۇلدەلى قايتقانىن قالاي عانا ۇمىتامىز. باردى بار، جوقتى جوق – دەپ ايتۋعا ارينە مىندەتتىمىز. دۇنيەجۇزىلىك قازاق كۇرەسى فەدەراتسياسىنىڭ كوپ جىلدار بويى قاجىرلى جۇمىستارى ەش ەلەۋسىز قالماسى ءبىر انىق. ال وسى III دۇنيەجۇزىلىك كوشپەندىلەر ويىندارىندا قازاق كۇرەسىنىڭ تولاعاي تابىستى قادامى جىلدار بويى جۇيەلى جۇرگىزىپ كەلە جاتقان جۇمىستىڭ تاعى ءبىر جەمىسى دەپ بىلەمىز.
قىرعىز ەلىندە وتكەن III دۇنيەجۇزىلىك كوشپەندىلەر ويىندارىندا قازاق كۇرەسىنىڭ بالۋاندارى ەكى التىن، ءبىر قولا مەدالدى جەڭىپ الىپ، قازاقستان قۇراماسىنىڭ مەدال جيىنتىعىنداعى جاعدايىن جاقسارتۋعا ۇلكەن ۇلەسىن قوستى. سونىمەن قازاق كۇرەسىنىڭ بالۋاندارى جەڭىپ اپەرگەن التىن، قولالاردىڭ ناتيجەسىندە قىرعىزستان مەن رەسەيدەن كەيىن، قازاقستان قۇراماسى ۇزدىك ۇشتىككە كىرگەن ەدى. يسلام الماقانۇلى مەن سەرىك ادامبولسىنۇلىنىڭ افريكادا، برازيليادا، ءۇندىستاندا، يراندا، تاعى دا كوپتەگەن الەمنىڭ ءار تۇكپىرىندە كازاق كۇرەسىنەن وتكىزگەن جارىستارىندا انا تىلىمىزدە توقتا، باستا، جامباس، بۇك، جارتىلاي جەڭىس، تازا جەڭىس دەگەن ءسوز تىركەستەرىنىڭ ايتىلىپ وتىرۋى، ۇلتتىق كۇرەسپەن بىرگە قازاق ءتىلىمىزدى دە دامىتۋعا ءورىس اشتى دەسە بولادى.
قازاق كۇرەسىن الەم ارەناسىنا شىعارۋمەن عانا توقتالىپ قالۋدى بىلمەگەن سەرىك تۇكەەۆ ءتول كۇرەسىمىزدىڭ باعىتىندا كوپتەگەن تاريحي تىڭ جاڭالىقتاردى دۇنيەگە اكەلدى. مىسالى، دۇنيەجۇزىلىك قازاق كۇرەسى فەدەراتسياسى بۇگىنگى تاڭدا ارنايى مەملەكەتتىك مەدالدار جاساپ شىعاردى. مىسالى، ول ماراپاتتار 3 ءتۇرلى بولادى. ءبىرىنشىسى، التىن القالى مەدال قازاق كۇرەسىنە كوزقاراسى ءتۇزۋ مەملەكەت باسشىلارى مەن زيالى قاۋىم وكىلدەرىنە بەرىلەدى. ەكىنشى كۇمىس – كۇمىس القالى مەدال قازاق كۇرەسىنە ەڭبەگى سىڭگەن جاتتىقتىرۋشىلارعا بەرىلەدى. ءۇشىنشى قولا مەدال باق وكىلدەرىنە تابىس ەتىلەدى. بۇل دا ءبىر ۇلتتىق كۇرەسىمىزگە ۇلەس قوسقانداردىڭ ەڭبەگىن ەلەي وتىرىپ، شابىتتاندىرۋدىڭ ۇلكەن جولى دەپ بىلەمىز. «كورىنگەن تاۋدىڭ الىستىعى جوق» – دەپ، ادەتتە قازاق كۇرەسىنىڭ كەلەشەگى ءۇشىن ىستەلىنىپ جاتقان شارۋالار از ەمەس.
كورەيدىڭ تاەكۆاندوسى مەن جاپوننىڭ دەيۋدوسى سەكىلدى قازاق كۇرەسىنىڭ دە وزگە كۇرەس تۇرلەرىنەن ەرەكشەلىكتەرى بار. باستى ايىرماشىلىقتىڭ ءبىرى بالۋانداردىڭ ۇستىنە كيەتىن كيىم ۇلگىسىندە جاتىر. قازاق كۇرەسىنىڭ كۇرتەشەلەرى زامان اعىمىمەن حالىقارالىق تالاپقا ساي جاسالعان. كيىمگە ارنالعان ماتا مىقتى جانە دەنەدەن اققان تەردى جاقسى سىڭىرەتىن بولۋى قاجەت. كەۋدەگە كيەتىن ەتەگىنىڭ ۇزىندىعى جامباستى تولىق جابۋعا مۇمكىندىك بەرەدى جانە ەكى بۇيىرىندە بەلدىك وتكىزەتىن ورنى بولادى. جەڭىنىڭ ۇزىندىعى شىنتاق بۋىنىنا دەيىن بولسا، بەلدىك ۇزىندىعى بالۋاننىڭ دەنەسىن ەكى وراۋعا تولىق جەتۋى ءتيىس. شالباردىڭ بالاعىنىڭ ۇزىندىعى تىزەگە دەيىن بولادى. كەڭ تىگىلگەن شالبار بەلگە باۋ ارقىلى ۇستالادى. كەۋدەشە مەن شالباردىڭ ءتۇسى بىردەي ماتادان تىگىلەدى. اياق كيىم قونىشىنىڭ ۇزىندىعى توبىقتى جاۋىپ تۇرادى جانە ول جۇمساق بىلعارىدان تىگىلەدى. قازاق كۇرەسىنىڭ كۇرتەشەلەرىن جاڭاشا جاساپ شىعارۋدا مارقۇم قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشى باۋىرجان ءجاناليننىڭ ەڭبەگى زور. قازاق كۇرەسىنىڭ شاپانىن ەتەك-جەڭىنىڭ قىسقارتىلعان كيىم ۇلگىسى نەگىزىندە ەجەلدەن ساۋىت كيگەن باتىر بابالارىمىزدىن الىنعان. ساۋىت كيگەن قازاق ساربازىنىڭ ەتەك-جەڭىنىڭ قىسقا بولۋى نايزا مەن قىلىشتى سەرمەۋگە ىقشامدالىنىپ جاسالعان. سوندىقتان دا بوزكىلەمدەگى بالۋاندارىمىزعا كۇرتەشەمىزدىڭ كەسكىندى نۇسقاسى كۇرەسكە وتە قولايلى بولۋعا لايىق ەكەنى دالەلدەنگەن. سونىمەن قاتار، ايتا كەتەر ءبىر جاي، ۆيلنيۋستە دۇنيەجۇزىلىك كۇرەس فەدەراتسياسىنىڭ ۇيىمداستىرۋىمەن ۇلتتىق كۇرەستەردى ليتسەنزيالاۋ جيىنىندا قازاق كۇرەسىنىڭ كيىم ۇلگىسى مەن ونىڭ تاريحىن مۇقيات تىڭداپ وتە جوعارى باعا بەرىپ، FILA بيۋرو مۇشەلەرى ءبىراۋىزدان قابىلداعان ەكەن. مىنە، وسىنداي، كۇرتەشەمىز تۋرالى كەلىستى ايعاق دەرەكتەر كۇرەسىمىزدىڭ ەڭسەسىن كوتەرە تۇسەتىنى بارشامىزدى قۋانتادى.
ۇلتتىق كۇرەسىمىزدىڭ كۇرتەشەلەرىن باۋىرجان جانالين اعامىزدان كەيىن ءبىر جۇيەگە كەلتىرىپ، مەنەدجمەنتتىك جاعىن جاقسارتىپ ەلىمىز بەن الەمگە تاراتۋدا سەرىك ادامبولسىنۇلىنىڭ ەڭبەگى شەكسىز بولعانىن ايتپاي كەتۋ مۇمكىن ەمەس.
سونىمەن بىرگە، قازاق كۇرەسىنە جاناشىر ازاماتتىڭ جاساعان تاعى ءبىر ولشەۋسىز ەڭبەكتەرىنىڭ ءبىرى ول قازاق كۇرەسىنىڭ بىرىككەن كۇرەس الەمى (UWW) مەن يۋنەسكو مۇشە بولىپ كىرۋىنە ۇيىتقى بولۋى ەدى.
2010 جىلى ەلىمىزدىڭ استاناسىنداعى «داۋلەت» سپورت كەشەنىندە تاريحي شارا بولىپ وتكەن ەدى. سول كەزدەگى حالىقارالىق كۇرەس قاۋىمداستىعى FILA پرەزيدەنتى رافاەل مارتينەتتي مەن سەرىك ادامبولسىنۇلى تۇكەەۆ «قازاق كۇرەسى حالىقارىلىق كۇرەس قاۋىمداستىعىنا FILA-عا تولىقتاي مۇشە بولىپ كىردى» – دەگەن تاريحي قۇجاتقا قول قويدى. ەلىمزدىڭ سپورت تاريحىندا بۇرىن-سوڭدى مۇنداي اق تۇيەنىڭ قارىنى جارىلعان قۋانىشتى جاڭالىق قازاق كۇرەسىن ۇلكەن بيىككە شىعاردى. سونىمەن بىرگە، 2010 جىلى وڭتۇستىك كورەيانىڭ چۋندجۋ قالاسىندا يۋنەسكو قولداۋىمەن اشىلعان دۇنيەجۇزىلىك جەكپە-جەك ونەرلەرى قاۋىمداستىعىنىڭ (WoMAU) ۇلكەن جيىنى ءوتىپ، ءتورت مەملەكەت وزدەرىنىڭ ۇلتتىق جەكپە-جەك ونەرلەرىنەن اتالمىش ۇيىمعا تىركەلۋگە ۇسىنىس جاساعان بولاتىن. نەگىزى بۇل جيىنعا الەمنىڭ ءار تۇكپىرىنەن 30-عا جۋىق مەملەكەت قاتىسۋعا ءوتىنىش ءبىلدىرىپتى. بىراق 30 ەلدىڭ اراسىنان ءتورت ەلدىڭ ۇلتتىق كۇرەسى ەرەكشە نازاردا قارالىپ، قازاق كۇرەسى قارسىلاستارىنان كوپ داۋىسقا يە بولىپ، وسىنداي الەمدىك دەڭگەيدەگى القالى وداققا مۇشە بولىپ كىردى.
ءار ەلدىڭ ۇلتتىق سپورت تۇرلەرى ساراپقا تۇسكەن سىندا جەرلەسىمىز، سول كەزدەگى دۇنيەجۇزىلىك قازاق كۇرەسى فەدەراتسياسىنىڭ باس حاتشىسى عالىم قۇلەكەشەۆتىڭ حالقىمىزدىڭ ءتول كۇرەسى قازاق كۇرەسىنىڭ شىعۋ تاريحى مەن ەرەكشەلىكتەرى تۋرالى كەلىستى كورسەتكەن بەينەروليكتەرى مەن ساۋاتتى جاساعان بايانداماسىن مۇقيات تىڭداعان شەتەلدىك القا توراعالارى اتا كۇرەسىمىزگە دەگەن قىزىعۋشىلىقتارى ارتىپ، ءبىراۋىزدان دۇنيەجۇزىلىك جەكپە-جەك ونەرلەرى وداعىنا مۇشە ەتىپ، قازاق كۇرەسىن ءبىراۋىزدان قابىلداعان ەكەن. راس، قازاق كۇرەسى وليمپيادا سپورت ءتۇرى ەمەس. دەسەك تە قازاق كۇرەسىن وليمپياداعا كىرگىزۋ ءۇشىن جاسالىناتىن جوتالى جۇمىس بارىسىن ءبىر ءسات توقتاتپاۋدى مساقسات ەتكەن سەرىك ادامبولسىنۇلى تۇكەەۆ ءبىر سۇحباتىندا: «ءاربىر ازامات قازاق كۇرەسىن جاقسى كورىپ، ءبىر ادامداي قولداۋ كورسەتىپ وتىرسا عانا، ۇلتتىق كۇرەسىمىزدى دامىتۋدا العا قويعان اسقارالى ماقساتتارىمىزعا جەتە الامىز»، – دەگەن بولاتىن. وسى ءبىر قاناتتى ءسوز ۇلتتىق كۇرەسكە جاناشىر ءاربىر ازاماتتىڭ جۇرەگىنەن ورىن السا نۇر ۇستىنە نۇر بولاتىنى ءسوزسىز.
ءتول كۇرەسىمىزدىڭ وسىنداي الەمدىك دەڭگەيدەگى بەدەلدى ۇيىمدارعا مۇشە بولىپ كىرۋى الاش جۇرتى ءۇشىن ءتىل جەتپەس قۋانىشتى جاڭالىق ەكەنىندە داۋ جوق ەدى. وسىنداي عالامات جەتىستىكتەردىڭ بەلەسىنە كوتەرىلۋگە تاعى دا سول ەل نامىسىن ارقالاعان، ۇلتتىق كۇرەسىمىزدىڭ جاناشىرى سەرىك تۇكەەۆتىڭ توككەن تەرىنىڭ جەمىسى ەكەنىن ۇمىتپاعانىمىز ءلازىم. قازاقتا «ەل قورعاعان باتىردى ەستە ساقتا، سايا بولعان اعاشتى وتقا جاقپا»، – دەگەن قاناتتى ءسوز بار. سوندىقتان دا ۇلتتىق كۇرەسىمىزدى ۇلىقتاۋعا ولشەۋسىز ۇلەس قوسقان ازاماتتى ءبىر ساتتە ۇمىتپاي، وعان دەگەن قۇرمەتتى جاساپ وتىرۋ ۇلكەن ادامگەرشىلىكتىڭ بەلگىسى دەپ بىلەمىن.
بۇگىندە سول ۇلتتىق سپورتىمىزدى زاڭعار بيىككە كوتەرگەن ءايمۇيىزدى اسىل اعامىزدىڭ باسىنا كۇن تۋىپ، كولدەنەڭ كەلگەن جالانىڭ شىرماۋىنا ءتۇسىرپ وتىر. ول جالانى جاپقان جانداردى ءبىر اللا ءوزى ەسەبىن بەرە جاتار. جۋىردا قازاق كۇرەسىن الەم ارەناسىنا الىپ شىعارعان الاشتىڭ اياۋلى ۇلى سەرىك اداماۇلى تۇكەەۆ 62 جاسقا تولعان تۋعان كۇنىن نەگىسىسىز تاعىلعان ايپتان قارا تۇنەك تار قاپاستا قارسى الدى. قازاق قاشاندا باتىرىن جاۋعا قالدىرماي، جاقسىنى ايىپسىز قاماققا سالدىرماي، ەرجۇرەك ەرلەرىن اسپەتتەپ، جاۋىن تىزەرلەتكەن جەر بەتىندەگى ۇلى حالىق –دەپ جارقىن-جارقىن اتويلاتىپ ايتىپ، جىرلاتىپ جازامىز. ولاي بولسا ەش كىناسىز قاماقتا وتىرعان باتىر باۋىرىمىزدى قالايشا ەل بولىپ، ءۇن قوسىپ شىعارىپ الا المايمىز. وسىعان تاڭعالام. كورەالمايتىن قاسكۇنەم جانداردىڭ تۇزاعانى قارمالىپ، جازىقسىزدان جازىقسىز اباقتىعى جابىلعان جانعا تەك ءبىر اللادان سوسىن بارشا ۇلتتىق كۇرەسكە جانى اشتيىن حالىقتان جاردەم كۇتۋ عانا قالدى. بىزدە تۇيەنى تۇگىمەن جۇتقاندار بەس كۇن وتىرىپ بوساپ شىقسا، ەلگە جاقسىلىق جاساعاندار جابىلىپ جاتادى. وسىنداي وزبىر قوعامداعى، ادىلەتسىزدىككە قالاي عانا جانىڭ اۋىرماسىن. قازاق كۇرەسىن الەمگە تانىتقان ارداقتى ازامات سەرىك تۇكەەۆكە ەسكەرتكىش ورناتسا دا ارتىق بولماس ەدى، ونىڭ ەسەسىنە تاستاي سۋىق تۇرمەگە قاماپ، الدىنا قارا نان مەن قارا سۋدى تالعاۋ ەتىپ بەرىپ وتىرعان جاندارعا نە ايتۋعا بولادى ەكەن.
كەزىندە بەيىمبەت، ءىلياس، ساكەن، ماعجان، مىرجاقىپتاي قازاقتىڭ زيالى قاۋىمى ءدال وسىنداي جالعان جالانىڭ قۇرباندارى بولىپ كەتتى ەمەسپە. بۇگىنگى داۋىردە سول جالا تەك جاڭا كورىنىس الىپ ۇلتىمىزدىڭ ءمۇيىزى قاراعايداي قايماقتارىن قارماپ الىپ، بالەگە شاتىپ جاتىر. تەك جالانىڭ جولدارى وزگەرەگەن. سوندا بۇل قوعام قانداي قوعام. جاقسىسىن توپەلەيتىن جامانىن كوكەلەيتىن ەكى ءجۇزدى قوعام بولىپ باراما؟. دەسەكتە قازاق ەشقاشان جاقسىلىقتان ءۇمىتىن ۇزبەگەن. ءبىز ءۇمىتىمىزدى ۇكىلەپ، اقجاعالى اعامىزدىڭ ورتامىزعا ورالۋىن اللادان تىلەپ كۇتەمىز. حاديستە «سابىر-جاقسىلىققا باستار جول، سابىر- جەتىستىككە قول جەتكىزۋدىڭ سىرلى كىلتى جانە باسقا تۇسكەن اۋىرتپالىققا توتەپ بەرۋ ءۇشىن بەلدى بەكەم بۋ »-دەيدى. اللاح تاعالا قانداي قيىن ساتتەر كەزىكسە دە سابىر مەن شىدامدىلىقتان تايماۋعا شاقىرادى. ەندەشە سابىر ەتەمىز. اللانىڭ نۇرى ءتۇسىپ، ادىلدىكتىڭ اق تاڭى اتارىنا سەنىم زور. «سەندەردىڭ ارالارىڭدا مىناداي جاماعات بولسىن، ولار باسقالاردى يگىلىككە شاقىرىپ، جاقسىلىققا ۇندەسىن. جاماندىقتان تىيۋعا تىرىسسىن. مىنە، وسىلار ناعىز ماقساتىنا جەتەتىندەر»-دەگەن ەكەن ءالي يمران سۇرەسىندە. اللانىڭ قالاۋىمەن جاقسىلىققا ءۇن قوسار جاماعاتتىڭ كوبەيە ءتۇسۋى، ارقالى اسىل اعامىزدى اباقتىدان ءدىن-امان الىپ شىعۋعا جول اشا تۇسەر دەگەن ويدامىن. ول كۇننىڭ دە اۋىلى الىس ەمەس.
اقىن وردابايۇلى
قر جۋرناليستەر وداعىنىڭ مۇشەسى،
س.بەردىقۇلوۆ سىيلىعىنىڭ يەگەرى.
