كونستيتۋتسيا كۇنى ورال قالاسىنداعى دەركول كەنتىندە سۋ تاسقىنىنان زارداپ شەككەن ساياجاي تۇرعىندارىنا 103 جاڭا باسپانانىڭ كىلتتەرى تابىس ەتىلدى. بۇل ۇيلەر Eurasian Resources Group-ءتىڭ (ERG) نەگىزىن قالاۋشى-اكتسيونەرلەرى بولگەن قاراجات – (40 ملرد تەڭگە) ەسەبىنەن سالىنعان.
ۇيلەردى بەرۋ راسىمىنە باتىس قازاقستان وبلىسىنىڭ اكىمى ناريمان تورەعاليەۆ پەن «ەۋرازيالىق توپ» جشس باس ديرەكتورىنىڭ ورىنباسارى دانيار راحماتۋللاەۆ قاتىستى. وبلىس اكىمى تۇرعىنداردى قونىس تويلارىمەن قۇتتىقتاپ، جاڭا باسپانا كىلتتەرىن تابىس ەتتى.
«مەملەكەت باسشىسى قاسىم-جومارت كەمەلۇلىنىڭ تاپسىرماسىنا سايكەس، تاسقىننان زارداپ شەككەن تۇرعىندارعا زاڭ اياسىنداعى ءتيىستى كومەك كورسەتىلدى. بۇگىن ءبىز ورال قالاسىنىڭ ساياجايلار القابىندا تۇرىپ، تاسقىندا باسپاناسىنان ايىرىلعاندارعا جاڭا ۇيلەردىڭ كىلتتەرىن تابىس ەتىپ جاتىرمىز. بۇل جالپى ءوڭىر ءۇشىن ۇلكەن قۋانىش. قۇرىلىس جۇمىستارىنا قولداۋ كورسەتكەن ERG كومپانياسىنىڭ وكىلدەرىنە شىن جۇرەكتەن العىس ايتامىن»، - دەدى ناريمان تورەعاليەۆ.
«ورالداعى وسى ۇيلەر دە Eurasian Resources Group (ERG) كومپانياسى بولگەن قاراجاتقا ساتىپ الىنعان. كومپانيانىڭ نەگىزىن قالاۋشى-اكتسيونەرلەرى تاسقىننان زارداپ شەككەندەر ءۇشن كومەككە 40 ملرد تەڭگەدەن استام قاراجات بولگەن. بارشا قونىس يەلەرىن بۇگىنگى قۋانىشتارىمەن قۇتتىقتايمىن. بوساعالارىڭىزدان قۇت كەتپەسىن! ۇيلەرىڭىز بەرەكەگە تولسىن!» – دەدى «ەۋرازيالىق توپ» جشس باس ديرەكتورىنىڭ ورىنباسارى دانيار راحماتۋللاەۆ.
ورالداعى «نۇرلى جول» ساياجايىنىڭ تۇرعىنى مارال ورالوۆانىڭ ءۇيى تاسقىن كەزىندە سۋ استىندا قالعان. ول مەملەكەتتىڭ كومەگىنىڭ ارقاسىندا وسىنداي ساپالى باسپاناعا يە بولعانى ءۇشىن العىسىن ءبىلدىردى.
«نۇرلى جول» ساياجايىنان ءۇي سالعان بولاتىنبىز. كوكتەمدە ءۇيىمىز سۋعا كەتتى. پرەزيدەنتكە راقمەت، ءبىزدى دالادا قالدىرمادى. بۇگىن دەركول كەنتىنەن 3 بولمەلى ءۇي بۇيىردى. ءۇيدىڭ ءىشىن قاراپ شىقتىق، كەرەمەت دەپ ايتساق بولادى. ساپاسى دا جاقسى»، - دەدى مارال ورالوۆا.
ايتا كەتەرلىگى، سۋ تاسقىنان زارداپ شەككەندەر ءۇشىن باتىس قازاقستان وبلىسىندا 775 ءۇي سالىندى. ونىڭ 375-ءسى ورال قالاسىندا، 400-ءى اۋدانداردا.
