شۆەيتساريا سوتى Telegram نەگىزىن قالاۋشى پاۆەل دۋروۆتى اتا-انا قۇقىعىنان ايىردى. بۇل تۋرالى ءوزىن دۋروۆتىڭ ءۇش بالاسىنىڭ اناسىمىن دەپ اتاعان يرينا بولگار Instagram پاراقشاسىندا جازدى، دەپ حابارلايدى “ادىرنا” ۇلتتىق پورتالى.
يرينا بولگاردىڭ ايتۋىنشا، 2022 جىلدىڭ سوڭىندا دۋروۆ وعان ەركىنەن تىس جانە ءماجبۇرلى تۇردە ءباا-گە كوشۋىن تالاپ ەتكەن. ال ول ۋاقىتتا ەكەۋىنىڭ اراسىنداعى قارىم-قاتىناس ءىس جۇزىندە توقتاعانىن ايتادى.
«دۋروۆ ماعان اي سايىن 150 مىڭ ەۋروعا دەيىن اقشا جۇمساۋعا قۇقىق بەرەتىن نوتاريالدى كۋالاندىرىلعان مەرزىمسىز رۇقساتتار نەگىزىندە جىلدار بويى پايدالانعان بارلىق كارتامدى بۇعاتتادى. مەن ءوزىمنىڭ جانە بالالارىمنىڭ قۇقىقتارىن زاڭدى تۇردە قورعايتىنىمدى ايتقانىمدا، ول بالالاردىڭ ەۋروپالىق يمميگراتسيالىق قۇجاتتارىن ۇزارتۋ تۋرالى كەلىسىمدەرگە قول قويۋدان باس تارتتى»،– دەپ ءتۇسىندىردى ول.
سونداي-اق، ول ۋلتيماتۋم ايەلدىڭ جانە بالالارىنىڭ قۇقىقتارىن قورعاۋ ءۇشىن ەۋروپالىق سوتتارعا بارۋىنا جول بەرمەۋ ءۇشىن قويىلعانىن ايتتى.
«ول ماعان جەنەۆاداعى بالالار مەن ەرەسەكتەردى قورعاۋ تريبۋنالىنا جۇگىنۋدەن باسقا امال قالدىرمادى. بۇل ارقىلى بالالاردىڭ اكىمشىلىك قۇجاتتارىن ءوز بەتىنشە ۇزارتۋعا مۇمكىندىك الۋدى كوزدەدى. جەنەۆانىڭ قامقورشىلىق ورگاندارى جۇرگىزگەن تەرگەۋدى باستادى، ناتيجەسىندە دۋروۆتىڭ ءۇش بالامىزعا قاتىستى اتا-انا قۇقىعىنان ايىرۋ تۋرالى شەشىم قابىلداندى»، – دەپ ءبولىستى بولگار.
يرنيا بولگار قامقورشىلىق ورگاندارىنا دۋروۆپەن بايلانىسقا شىعۋعا بولاتىن بارلىق نومەردى بەرگەنىن ايتادى. الايدا كاسىپكەر جاۋاپ بەرمەگەن.
ەسكە سالا كەتسەك، 28 تامىزدا پاۆەل دۋروۆ بوستاندىققا شىقتى. فرانتسيا سوتى Telegram يەسىن قاماۋدان بوساتتى. ول 5 ملن ەۋرو كولەمىندە كەپىل تولەپ شىققان. دەگەنمەن، وعان فرانتسيادان كەتۋگە تىيىم سالدى.
