بوكسشى جانقوش تۇراروۆ “زورلاندىم” دەگەن ءانارۋ قۇرمانالىنىڭ پسيحولوگيالىق-ناركولوگيالىق دەنساۋلىعىنا ساراپتاما جۇرگىزۋ ءۇشىن ارىز ءتۇسىردى، دەپ حابارلايدى “ادىرنا” ۇلتتىق پورتالى.
سپورتشىنىڭ ارەكەتى تۋرالى بۇگىن الماتىداعى ءباسپاسوز ءماسليحاتىندا ونىڭ ادۆوكاتى سامات مامۋتوۆ مالىمدەگەن.
قورعاۋشىنىڭ سوزىنشە، تۇراروۆ الەۋمەتتىك جەلىدە ءانارۋ قۇرمانالىگە قاتىستى تاراپ جاتقان ۆيدەولاردى تەكسەرسىن دەپ پوليتسياعا ءوتىنىش بىلدىرگەن.
«ەگەر وسى اقپاراتتار رەسمي ورگاندار ارقىلى راستالسا، سىزدەرگە حابارلايمىز. ال، بىزگە كەلىپ تۇسكەن اقپارات بويىنشا جانە ينتەرنەتتە تارالىپ جاتقان بەينەماتەريالدار بويىنشا، ارىزدانۋشى ءانارۋ قۇرمانالى جانقوش تۇراروۆتىڭ ۇستىنەن ارىز جازعان 19 تامىز كۇنى اۋەزوۆ پوليتسيا باسقارماسىنا ماساڭ كۇيدە بارعان. سول جەردە باسقا ادامدارمەن جانجالداسىپ، توبەلەسىپ، كيىمى جىرتىلىپ، جارتىلاي جالاڭاشتانىپ، ءوزىنىڭ بەيادەپ مىنەز-قۇلقىن كورسەتكەن. مەن وسىعان بايلانىستى سۇراۋ سالىپ، اۋەزوۆ پوليتسيا باسقارماسىنىڭ عيماراتىنداعى بەينەباقىلاۋ كامەرالارىنىڭ جازباسىن سۇراتىپ، ىسكە تىركەۋگە جانە تەكسەرۋگە، وعان قۇقىقتىق باعا بەرىپ، جازا قولدانۋ تۋرالى سوتقا دەيىنگى تەرگەۋشىگە ءوتىنىش ءبىلدىردىم. ارىزدانۋشى ءانارۋ قۇرماناليدىڭ ءوز ارەكەتتەرىنە جاۋاپ بەرمەيتىن تەرىس قىلىقتارى ينتەرنەتتە تاراپ ءجۇر. ەگەر ول راس بولسا، ءىس اياسىندا ارىزدانۋشىعا سوت-پسيحياتريالىق جانە ناركولوگيالىق ساراپتاما جۇرگىزۋگە ءوتىنىش بىلدىرەمىز. ويتكەنى، بىزگە ول پسيحوتروپتىق زاتتار قولدانادى دەگەن اقپاراتتار ءتۇسىپ جاتىر»، - دەيدى مامۋتوۆ.
