تەمىرتاۋداعى Qarmet مەتاللۋرگيالىق زاۋىتىندا مەردىگەر ۇيىمنىڭ ەكى قىزمەتكەرى قازا تاپتى، - دەپ حابارلايدى "ادىرنا" ۇلتتىق پورتالى.
كومپانيانىڭ حابارلاۋىنشا، 25 تامىزدا تەمىرتاۋداعى "Qarmet" اق نىسانىندا لپتس-2 (№2 ليستوپروكات تسەحى) قايعىلى وقيعا ورىن بولعان. تاڭعى ساعات 9:20 شاماسىندا حيميالىق ۇستاۋ بلوگى (حۇب) عيماراتىنىڭ شاتىرىن بولشەكتەۋ جۇمىستارىن ورىنداۋ كەزىندە تەحنيكا قاۋىپسىزدىگى ەرەجەلەرىن ساقتاماۋ سالدارىنان "قازمەحانومونتاج" جشس مەردىگەرلىك ۇيىمىنىڭ ەكى جۇمىسشىسى بيىكتەن قۇلاپ كەتكەن.
ەكى جۇمىسشى وقيعا ورنىندا كوز جۇمعان.
"Qarmet" كومپانياسى قازا تاپقانداردىڭ وتباسىنا كوڭىل ايتىپ، جازاتايىم وقيعانىڭ سەبەپتەرى مەن ءمان-جايلارىنا جان-جاقتى تەرگەۋ جۇرگىزۋ ءۇشىن ارنايى كوميسسيا قۇرىلعانىن حابارلايدى.
قازا تاپقان د. يمانعاليەۆ 19 جاستا، يۋ.سامويلوۆ 38 جاستا بولعان.
سونىمەن قاتار، كومپانيا ونەركاسىپتىك قاۋىپسىزدىكتى كۇشەيتۋگە باعىت الىپ، ءوز نىساندارىندا قىزمەتكەرلەرىنەن دە، مەردىگەرلىك ۇيىمداردىڭ قىزمەتكەرلەرىنەن دە بارلىق قاۋىپسىزدىك نورمالارى مەن ەرەجەلەرىن مۇلتىكسىز ساقتاۋدى تالاپ ەتپەك.
ەسكە سالا كەتسەك، 2023 جىلدىڭ قازان ايىندا "ارسەلورميتتال تەمىرتاۋ" كەنىشىندەگى اپات ەلدىڭ تاۋ-كەن تاريحىنداعى ەڭ ءىرى اپات بولدى. اپات بولعان كەزدە شاحتادا 252 ادام بولعان، 208 كەنشىنى قۇتقارۋشىلار جەر بەتىنە الىپ شىققان، 46 ادام قازا تاپقان ەدى.
ال بۇعان دەيىن 2006 جىلى لەنين اتىنداعى شاحتادا بولعان اپاتتان 41 كەنشى جەر استىندا قالعان بولاتىن.
