تۇركىستان وبلىسى سىرگەلى اۋىلىندا دارەتحاناعا قۇلاپ كەتكەن 3 جاسار ءبۇلدىرشىننىڭ ءولىمى تۋرالى تىڭ دەرەكتەر پايدا بولدى، دەپ حابارلايدى «ادىرنا» ءتىلشىسى Otyrar.kz-كە سىلتەمە جاساپ.
العاشىندا قىز ابايسىزدا دارەتحاناعا ءوزى ءتۇسىپ كەتكەن دەپ ايتىلعانىمەن، قازىرگى تاڭدا ونى بىرەۋ يتەرىپ جىبەرگەن دەپ كۇدىكتەلىپ وتىر.
باسىلىمنىڭ مالىمەتىنشە، قايعىلى جاعدايدان ءبىر اي وتكەن سوڭ تاعى ءبىر قىز ءدال سول دارەتحاناعا ءتۇسىپ كەتە جازداعان. سول كەزدە ول 16 جاستاعى كورشىسىن كورسەتكەن. پوليتسيا تەرگەۋ جۇرگىزىپ، ءۇش جاسار اسىلىمنىڭ ءولىمى قاساقانا جاسالعان قىلمىس ەكەنىن انىقتادى. ءجاسوسپىرىم ءوزىنىڭ ءىس-ارەكەتىن مويىندادى. ونىڭ شيزوفرەنيامەن اۋىراتىندىعى بەلگىلى بولدى.
«3 جاسار قىزدىڭ قايتىس بولۋ فاكتىسى بويىنشا تەرگەۋ جۇرگىزۋدە، ونىڭ دەنەسى اعىمداعى جىلدىڭ مامىر ايىندا سارىاعاش اۋدانىندا دارەتحانادان تابىلعان. تەرگەۋ ءىس-شارالارى بارىسىندا بۇل وقيعاعا كامەلەتكە تولماعان كۇدىكتىنىڭ قاتىسى بولۋى مۇمكىن ەكەندىگى انىقتالدى. انىقتالعان جاعدايلارعا بايلانىستى جانە كۇدىكتىنىڭ پسيحولوگيالىق جاعدايىن ەسكەرە وتىرىپ، ول مامانداندىرىلعان مەديتسينالىق مەكەمەگە ورنالاستىرىلدى. قازىرگى ۋاقىتتا ءىستىڭ بارلىق ءمان-جايلارىن تولىق جانە جان-جاقتى انىقتاۋعا باعىتتالعان سوتقا دەيىنگى تەرگەۋ جۇمىستارى جالعاسۋدا. پوليتسيا اقيقاتتى انىقتاۋعا جانە زاڭدى شەشىم قابىلداۋعا بار كۇشىن سالادى»، — دەدى تۇركىستان وبلىستىق پوليتسيا دەپارتامەنتى.
ەسكە سالايىق، 16 مامىردا اسىلىم ەسىمدى ءبۇلدىرشىننىڭ جوعالىپ كەتكەنى تۋرالى حابارلانعان ەدى. قىز بالانىڭ دەنەسى ءۇش كۇننەن كەيىن اجەتحانادان تابىلدى. ارتىنشا پوليتسەيلەر ءبۇلدىرشىننىڭ دەنەسى كورشى ءۇيدىڭ دارەتحاناسىنان تابىلعانىن، زورلىق-زومبىلىقپەن ءولىم بەلگىلەرى جوق ەكەنىن مالىمدەدى.
