قازاقستان قۇراماسى مەن «زەنيت» كلۋبىنىڭ قورعاۋشىسى نۇرالى ءالىپ باس باپكەر ستانيسلاۆ چەرچەسوۆكە قازاق تىلىندە سۇراق قويعان ءجۋرناليستى «حايپ جاسادى» دەپ ايىپتادى. سپورتشىنىڭ بۇل پىكىرى كوپتىڭ اشۋىن تۋدىردى، دەپ حابارلايدى “ادىرنا” ۇلتتىق پورتالى.
نۇرالى ءالىپ قازاق تىلىندە قويىلعان سۇراققا جاۋاپ بەرۋگە اشۋلانعان چەرچەسوۆتى قولداپ سويلەگەن.
«چەرچەسوۆ ول جەردە وسەتين تىلىندە دە جاۋاپ بەرە الام دەگەن. مەن ونى ءتۇسىندىم. ويتكەنى قازاقستانداعى جۋرناليستەردىڭ ءبارى ورىس ءتىلىن بىلەدى. ال ول (جۋرناليست) قازاق تىلىندە سۇراق قويادى. ول حايپ ۇستاعىسى كەلدى»، - دەدى نۇرالى ءالىپ.
الەۋمەتتىك جەلىدە فۋتبولشىنىڭ بۇل ءسوزىن بەلگىلى سپورت ءجۋرناليسى اسلان قاجەنوۆ سىنادى.
«نۇرەكە، سىزگە نە بولدى؟ باسىڭىزعا قاتتى دوپ تيگەن بە؟ قازاقستانداعى ءباسپاسوز ءماسليحاتىندا قازاق تىلىندە سۇراق قويۋ راسىمەن حايپ پا؟ ەندى نە ىستەيمىز؟ ءوزىڭ دە «زەنيتكە» اۋىسقان العاشقى كۇندەرى ورىسشا سۇراققا قازاقشا عانا جاۋاپ بەرىپ ەدىڭ عوي. سول كەزدە ساعان «حايپ جاسادى» دەمەدىك. كەرىسىنشە، مەملەكەتتىك ءتىلدىڭ مارتەبەسىن ارتتىردى دەپ قۋاندىق. ال، ەندى ءوز ەلىمىزدە ءوز تىلىمىزدە سۇراق قويعانىمىزدى تومەن كورىپ وتىرسىڭ»، - دەپ جازدى سپورت ساراپشىسى.
