Qazaqstan quramasy men «Zenıt» klýbynyń qorǵaýshysy Nuraly Álip bas bapker Stanıslav Cherchesovke qazaq tilinde suraq qoıǵan jýrnalısti «haıp jasady» dep aıyptady. Sportshynyń bul pikiri kóptiń ashýyn týdyrdy, dep habarlaıdy “Adyrna” ulttyq portaly.
Nuraly Álip qazaq tilinde qoıylǵan suraqqa jaýap berýge ashýlanǵan Cherchesovti qoldap sóılegen.
«Cherchesov ol jerde osetın tilinde de jaýap bere alam degen. Men ony túsindim. Óıtkeni Qazaqstandaǵy jýrnalısterdiń bári orys tilin biledi. Al ol (jýrnalıst) qazaq tilinde suraq qoıady. Ol haıp ustaǵysy keldi», - dedi Nuraly Álip.
Áleýmettik jelide fýtbolshynyń bul sózin belgili sport jýrnalısi Aslan Qajenov synady.
«Nureke, sizge ne boldy? Basyńyzǵa qatty dop tıgen be? Qazaqstandaǵy baspasóz máslıhatynda qazaq tilinde suraq qoıý rasymen haıp pa? Endi ne isteımiz? Óziń de «Zenıtke» aýysqan alǵashqy kúnderi oryssha suraqqa qazaqsha ǵana jaýap berip ediń ǵoı. Sol kezde saǵan «haıp jasady» demedik. Kerisinshe, memlekettik tildiń mártebesin arttyrdy dep qýandyq. Al, endi óz elimizde óz tilimizde suraq qoıǵanymyzdy tómen kórip otyrsyń», - dep jazdy sport sarapshysy.
