الماتىدا كارشەرينگ كولىگى جولدان ۇشىپ، اۋدارىلىپ كەتتى، - دەپ حابارلايدى “ادىرنا” ۇلتتىق پورتالى.
الماتى پوليتسياسىنىڭ حابارلاۋىنشا، جول-كولىك وقيعاسى كەرەي-جانىبەك حاندار كوشەسىنىڭ بويىندا، مەدەۋدەن قالاعا قاراي جۇرەتىن جولدا بولعان.
كۇردەلى بۇرىلىستاردىڭ بىرىندە جۇرگىزۋشى رولگە يە بولا الماي ياكي رولدە ۇيىقتاپ كەتىپ، جولدان ۇشىپ كەتكەن.
"وقيعا ورنىنا پوليتسيا شاقىرعان كۋاگەرلەردىڭ ايتۋىنشا، جۇرگىزۋشى بورديۋر ورناتۋعا دايىندالعان ترانشەيالارعا سوعىلعان", – دەلىنگەن حابارلامادا.
جول اپاتىنان كەيىن جۇرگىزۋشى پوليتسەيلەر كەلگەنشە كولىكتى تاستاپ، وقيعا ورنىنان قاشىپ كەتكەن. قازىر ءتارتىپ ساقشىلارى جاعدايدىڭ بارلىق ءمان-جايىن انىقتاپ جاتىر. ازىرگە ولاردان كومەك سۇراعان ەشكىم جوق.
