اقش پەن ونىڭ وداقتاستارى كەلەسى اپتادا يزرايل مەن حاماس اراسىنداعى اتىستى توقتاتۋ كەلىسىمىنە قول قويىلاتىنى جايلى ايتىلدى، دەپ حابارلايدى “ادىرنا” ۇلتتىق پورتالى CNN ارناسىنا سىلتەمە جاساپ.
مالىمەتتەرگە سەنسەك، گازادا اتىستى توقتاتۋ تۋرالى كەلىسسوزگە قاتىسۋشىلار جۇما كۇنى ەكى كۇندىك راۋندتىڭ اياقتالعانىن حابارلادى. ولار سوعىستى توقتاتۋ تۋرالى كەلىسىمگە كەلۋ ءۇشىن كەلەسى اپتادا كايردە قايتا كەزدەسۋدى جوسپارلاپ وتىر.
باق بەتتەرىندە اقش، مىسىر جانە كاتار كەلىسسوزدەرىنىڭ سىندارلى جانە وڭ اتموسفەرادا وتكەنىن ايتتى. ولار ەكى تاراپقا دا ءوز ۇسىنىستارىن ءبىلدىردى جانە الداعى كۇندەرى ىسكە اسىرۋ شارالارىنىڭ ەگجەي-تەگجەيلەرى بويىنشا جۇمىستى جالعاستىرۋعا ۇمىتتەنەدى.
گازاداعى سوعىستىڭ ايماقتىق قاقتىعىسقا ۇلاسۋىنا جول بەرمەۋگە باعىتتالعان حالىقارالىق ديپلوماتيا 16 تامىزدا ۇلىبريتانيا مەن فرانتسيانىڭ سىرتقى ىستەر مينيسترلەرى يزرايلگە بىرلەسكەن ساپارمەن بارعان كەزدە كۇشەيە ءتۇستى.
سونىمەن بىرگە دوحادا حالىقارالىق دەلدالدىقپەن يزرايل مەن حاماس اراسىنداعى اتىستى توقتاتۋ تۋرالى كەلىسسوزدەردىڭ كەزەكتى راۋندى اياقتالدى.
حالىقارالىق قاۋىمداستىق تاياۋ شىعىستاعى شيەلەنىستى باسەڭدەتۋدىڭ ەڭ جاقسى جولى يزرايل مەن حاماس اراسىنداعى سوعىستى توقتاتۋ جانە يزرايلدىك كەپىلگە الىنعانداردى بوساتۋ تۋرالى كەلىسىم بولادى دەپ سانايدى.
ەسكە سالا كەتەيىك، بۇعان دەيىن يزرايل گازاداعى مەكتەپكە سوققى جاساپ، جۇزدەن استام ادام قازا بولعان ەدى.
