پرەزيدەنت قاسىم-جومارت توقاەۆتىڭ قازاقستان وليمپيادا قۇراماسىنىڭ مەدال يەگەرلەرىمەن كەزدەسۋى كەيىنگە قالدىرىلدى. بۇل تۋرالى مەملەكەت باسشىسىنىڭ كەڭەسشى-ءباسپاسوز حاتشىسى بەرىك ءۋالي ايتتى، دەپ حابارلايدى «ادىرنا» ءتىلشىسى.
«قاسىم-جومارت كەمەلۇلى ۇلتتىق قۇراما مۇشەلەرىمەن بۇگىن كەزدەسۋدى جوسپارلاعان بولاتىن. وكىنىشكە قاراي، اتلەتتەر مەن جاتتىقتىرۋشىلاردىڭ جارتىسىنان كوروناۆيرۋس ينفەكتسياسى انىقتالدى. سول سەبەپتى كەزدەسۋ كەيىنگە شەگەرىلدى. سپورتشىلار مەن باپكەرلەردىڭ تەزىرەك ساۋىعىپ كەتۋىنە تىلەكتەسپىز»،–دەپ جازدى ول.
ايتۋىنشا، كەزدەسۋ تامىز ايىنىڭ سوڭىندا اقوردادا وتەدى دەپ جوسپارلانىپ وتىر.
ەسكە سالايىق، 14 تامىزدا پرەزيدەنت پاريج وليمپياداسىنىڭ جۇلدەگەرلەرى مەن جاتتىقتىرۋشىلار قۇرامىن مەملەكەتتىك ناگرادالارمەن ماراپاتتاۋ تۋرالى جارلىققا قول قويعان بولاتىن.
