پرەزيدەنت قاسىم-جومارت توقاەۆ Digital Bridge حالىقارالىق فورۋمىنىڭ پلەنارلىق وتىرىسىندا قازاقستان بۇۇ-نىڭ ەڭ تسيفرلاندىرىلعان 30 مەملەكەتتىڭ رەيتينگىندە، كوپتەگەن دامىعان ەلدەردى باسىپ وزىپ تۇرعانىن ايتتى، دەپ حابارلايدى “ادىرنا” ۇلتتىق پورتالى.
قازاقستان پرەزيدەنتى استانادا Digital Bridge 2022 حالىقارالىق تەحنولوگيالىق فورۋمىن اشتى. بيىلعى فورۋمنىڭ تاقىرىبى "ورتالىق ەۋرازيا جاڭا تەحنولوگيالىق پلاتفورما رەتىندە" دەپ اتالدى.
مەملەكەت باسشىسى ءوز سوزىندە فورۋمنىڭ بۇگىنگى كۇن تارتىبىندە ەلدى دامىتۋدىڭ اۋقىمدى پەرسپەكتيۆالارى ايقىن كورىنىس تاپقانىن اتاپ ءوتتى.
"ادامدىق، زياتكەرلىك جانە عىلىمي الەۋەتى زور قازاقستان يننوۆاتسيالاردى، تسيفرلىق ءوندىرىستى جانە شىعارماشىلىقتى دامىتۋدىڭ بىرەگەي كەڭىستىگى بولىپ تابىلادى. بۇگىنگى تاڭدا تەك جەكەلەگەن كومپانيالاردىڭ عانا ەمەس، باسەكەگە قابىلەتتىلىگىن انىقتاۋشى فاكتور بولىپ تابىلاتىن تسيفرلىق ترانسفورماتسيا ەكەنى ەشكىمگە قۇپيا ەمەس.
ساراپشىلاردىڭ بولجامى بويىنشا، ون جىلدان كەيىن الەمدەگى ونىمدەر مەن قىزمەتتەردىڭ 70 پايىزى تسيفرلىق پلاتفورمالىق مودەلدەرگە نەگىزدەلەدى. وسىنداي جاعدايدا قازاقستان ءوز الدىنا ەۋرازيالىق كەڭىستىكتەگى ەڭ ءىرى تسيفرلىق حابتاردىڭ بىرىنە اينالۋ ستراتەگيالىق مىندەتىن قويدى.
بۇل ءۇشىن بەرىك نەگىز بار. بۇگىندە قازاقستان كوپتەگەن دامىعان ەلدەن وزىپ، بۇۇ-نىڭ تسيفرلانعان مەملەكەتتەر رەيتينگىندە ۇزدىك وتىز ەلدىڭ قاتارىنا كىرەدى", - دەدى توقاەۆ.
”ادىرنا” ۇلتتىق پورتالى
