ءماجىلىس دەپۋتاتى داۋلەت تۇرلىحانوۆتىڭ ۇلى پروباتسيالىق باقىلاۋ ءتارتىبىن بۇزدى دەپ ايىپتالىپ، ونىڭ ارەكەتىنە تۇسىنىكتەمە بەرىلدى، - دەپ حابارلايدى "ادىرنا" ۇلتتىق پورتالى.
قازاقستاندىق زاڭگەر اننا چەرنوۆا الەۋمەتتىك جەلىدە باس بوستاندىعىن شەكتەۋ جازاسىنا كەسىلگەن نۇراسىل بولاتتىڭ الماتىدا تۇندە دوستارىمەن بىرگە كوشەدە جۇرگەن ۆيدەوسىن جاريالادى.
«تاڭەرتەڭ Direct-كە وسىنداي ۆيدەو كەلدى. وندا ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولاتتىڭ تۇرعانىن كوردىم. ونىڭ بوستاندىعى شەكتەلگەن جانە وعان قوسىمشا تالاپتاردى ورىنداۋ جۇكتەلگەن. بىراق، ۆيدەودان ونىڭ زاڭعا قايشى ارەكەت ەتىپ، تالاپتاردى ساقتاماعانىن بايقاۋعا بولادى»، - دەپ جازدى زاڭگەر اننا چەرنوۆا Instagram-داعى پاراقشاسىندا.
ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنىڭ (قاجك) ءباسپاسوز قىزمەتى سوتتالۋشىعا قاتىستى ۇكىم 14 تامىزدا پروباتسيا قىزمەتىنە (بەكىتۋ ورنى بويىنشا) ورىنداۋعا جىبەرىلگەنىن حابارلادى.
«زاڭعا سايكەس پروباتسيالىق باقىلاۋ سوتتالعان ادام ەسەپتە تۇرعان ساتتەن باستاپ جۇزەگە اسىرىلادى»، - دەپ ءتۇسىندىردى تۇزەۋ مەكەمەسى.
ەسكە سالا كەتەيىك، بۇعان دەيىن دەپۋتات داۋلەت تۇرلىحانوۆتىڭ ۇلى نۇراسىل بولاتتىڭ الماتى كوشەلەرىنىڭ بىرىندە دوستارىمەن جۇرگەن ۆيدەوسى تاراعان بولاتىن. شاعىمدانۋشى چەرنوۆا نۇراسىل بولاتتىڭ باس بوستاندىعىنان شەكتەلسە دە، ەركىندىكتە جۇرگەنىنە شاعىمدانعان ەدى.
