ازات پەرۋاشەۆ: وتاندىق ءوندىرىستى قولداۋ قاجەت

قر پارلامەنتى ءماجىلىسىنىڭ دەپۋتاتى ازات پەرۋاشەۆ الماتىداعى جۇمىس ساپارىمەن Hyundai Trans Kazakhstan زاۋىتىنا باردى. دەپۋتات زاۋىتتىڭ تۇرمىس-تىرشىلىگىمەن تانىستى:

• ءبىر جىل بۇرىن وسى كاسىپورىنعا كەلگەنىمىزدە زاۋىت يەسى نۇرلان سماعۇلوۆ بىزگە اۆتوموبيلدەردى شاعىن ءتۇيىندى قۇراستىرۋعا كوشۋ جوسپارىن ايتقان ەدى – ال بۇگىن ءبىز سول جۇمىستىڭ بارىسىن جانە جاڭا ءوندىرىس جەلىلەرىن كورىپ وتىرمىز. ەكى جاڭا زاۋىتتىڭ قۇرىلىس بارىسىمەن دە تانىستىق: ءبىرى – مۋلتيبرەندتى زاۋىت، مۇندا كەيىن ەلەكتروموبيلدەر مەن گيبريدتى مودەلدەر شىعارۋدى يگەرۋ جوسپارلانۋدا، ال ەكىنشىسى اۆتوكولىكتەرگە ارنالعان بولشەكتەردى شىعارادى. بۇل – بيزنەس پەن ءوندىرىستى دامىتۋ قورى اراسىنداعى ىنتىماقتاستىقتىڭ ەڭ جارقىن جانە تابىستى ۇلگىسى دەپ بىلەمىن.

ەسكە سالا كەتسەك، ءىرى ءتۇيىندى قۇراستىرۋدان شاعىن ءتۇيىندى وندىرىسكە كوشۋ مىندەتىن پرەزيدەنت قاسىم-جومارت توقاەۆ 2023 جىلى قازاقستان حالقىنا جولداۋىندا جانە بيىلعى جىلدىڭ 7 اقپانىنداعى ۇكىمەت وتىرىسىندا العا قويعان بولاتىن. كەزدەسۋ بارىسىندا، سونداي-اق، ازات پەرۋاشەۆ زاۋىت باسشىلىعىمەن بۇنداي كاسىپورىنداردى ودان ءارى قولداۋ بويىنشا قاجەتتى شارالارىن جانە وسى تاجىريبەنى مۇناي-گاز، تاۋ-كەن مەتاللۋرگياسى، جول، قۇرىلىس، ەنەرگەتيكا سىندى سالالاردا پايدالانۋ ماسەلەلەرىن تالقىلادى. «اق جول» پارتياسىنىڭ توراعاسى وتاندىق اۆتوكولىك ءوندىرىسىن قولداۋ باسقا سالالاردىڭ دا دامۋىنا جول اشادى دەگەن سەنىمدە.