QR Parlamenti Májilisiniń depýtaty Azat Perýashev Almatydaǵy jumys saparymen Hyundai Trans Kazakhstan zaýytyna bardy.
Depýtat zaýyttyń turmys-tirshiligimen tanysty:
- Bir jyl buryn osy kásiporynǵa kelgenimizde zaýyt ıesi Nurlan Smaǵulov bizge avtomobılderdi shaǵyn túıindi qurastyrýǵa kóshý josparyn aıtqan edi – al búgin biz sol jumystyń barysyn jáne jańa óndiris jelilerin kórip otyrmyz. Eki jańa zaýyttyń qurylys barysymen de tanystyq: biri – mýltıbrendti zaýyt, munda keıin elektromobılder men gıbrıdti modelder shyǵarýdy ıgerý josparlanýda, al ekinshisi avtokólikterge arnalǵan bólshekterdi shyǵarady. Bul – bıznes pen Óndiristi damytý qory arasyndaǵy yntymaqtastyqtyń eń jarqyn jáne tabysty úlgisi dep bilemin.
Eske sala ketsek, iri túıindi qurastyrýdan shaǵyn túıindi óndiriske kóshý mindetin Prezıdent Qasym-Jomart Toqaev 2023 jyly Qazaqstan halqyna Joldaýynda jáne bıylǵy jyldyń 7 aqpanyndaǵy Úkimet otyrysynda alǵa qoıǵan bolatyn.
Kezdesý barysynda, sondaı-aq, Azat Perýashev zaýyt basshylyǵymen bundaı kásiporyndardy odan ári qoldaý boıynsha qajetti sharalaryn jáne osy tájirıbeni munaı-gaz, taý-ken metallýrgııasy, jol, qurylys, energetıka syndy salalarda paıdalaný máselelerin talqylady.
«Aq jol» partııasynyń tóraǵasy Otandyq avtokólik óndirisin qoldaý basqa salalardyń da damýyna jol ashady degen senimde.
