تاياۋدا عانا ۇلكەن الماتى وزەنىنىڭ بويىندا وتىرعىزىلعان اعاشتاردى بۇزاقىلار سىندىرىپ كەتكەن، دەپ حابارلايدى "ادىرنا" ۇلتتىق پورتالى Tengrinews.kz اگەنتتىگىنە سىلتەپ.
"تولە بي داڭعىلىنان تومەن ورنالاسقان سايران كولىنەن شىعاتىن وزەندى جاعالاپ كەلەمىز. ساياجولدىڭ بويىندا وسىنداي ايۋاندىق ىستەپ كەتىپتى. مۇنداي سۇلۋلىقتى قالاي قۇرتۋعا بولادى؟ اعاشتاردى جاقىندا عانا وتىرعىزعان ەدى. ەندى عانا بۇرشىك اتىپ كەلە جاتقاندا… وسىندىق جاۋىزدىق جاساپ كەتكەن. مۇنى ىستەگەندەردىڭ تابىلىپ، جازالانۋىن سۇرايمىن. ءوز قاراجاتىنا سىندىرعان اعاشتاردان 10 ەسە كوپ ەتىپ وتىرعىزسىن", – دەيدى ۆيدەو اۆتورى.
اكىمدىك بەلگىسىز بىرەۋلەردىڭ 30-دان استام كوشەتتى سىندىرىپ كەتكەنىن مالىمدەدى.
“اتالعان دەرەك بويىنشا بيىل 12 تامىزدا اۋەزوۆ اۋدانى اكىمدىگى جانە پوليتسيا ءبولىمىنىڭ قىزمەتكەرلەرى بىرلەسىپ تەكسەرۋ جۇرگىزدى. تەكسەرۋ بارىسىندا 36 كوشەتتىڭ ورتاسىنان سىنىپ كەتكەنى بەلگىلى بولدى (كاتالپا – 15 دانا، اكاتسيا – 8 دانا جانە قاراعاش – 13 دانا). بۇل كوشەتتەردى "ستامپ سەرۆيس" جشس اۋدان اكىمدىگىمەن كەلىسىم جاساپ وتىرعىزعان. كومپانيا قىزمەتكەرلەرى قىلمىسكەرلەردى انىقتاۋ ءۇشىن اۋەزوۆ اۋداندىق ىشكى ىستەر بولىمىنە ارىز تۇسىرگەن”، – دەلىنگەن حابارلامادا.
پوليتسيا قىزمەتكەرلەرى وقيعا كۋاگەرلەرىنەن سۇحبات الىپ، بەينەباقىلاۋ كامەراسىنداعى بەينەلەردى زەرتتەپ جاتىر. سىنعان اعاشتار جارامسىز بولعاندىقتان، كۇزدە مەردىگەر كومپانيانىڭ كومەگىمەن كوشەتتەردى قايتا وتىرعىزباق.
الماتى اكىمدىگىنىڭ مالىمەتىنشە، اعاشتاردى سىندىرعان ادامدار انىقتالعان سوڭ اكىمشىلىك قۇقىق بۇزۋشىلىق تۋرالى كودەكسىنىڭ 386-بابىنا سايكەس (جاسىل ەكپەلەردى كۇتىپ-ۇستاۋ جانە قورعاۋ قاعيدالارىن بۇزۋ) ەسكەرتۋ جاسالىپ نەمەسە جەكە تۇلعالارعا 30 اەك، شاعىن كاسىپكەرلىك سۋبەكتىلەرى نەمەسە كوممەرتسيالىق ەمەس ۇيىمدار ءۇشىن – 60, ورتا كاسىپكەرلىك سۋبەكتىلەرى ءۇشىن – 100, ءىرى كاسىپكەرلىك سۋبەكتىلەرى ءۇشىن – 300 اەك مولشەرىندە ايىپپۇل سالىنادى.
