Almaty men Shymkentte «Dıkıı Arman» jetekshilik etken qylmystyq toptyń 15 múshesi ustaldy, dep habarlaıdy “Adyrna” ulttyq portaly.
Mınıstrlik uıymdasqan qylmysqa qarsy kúres departamenti sońǵy eki jylda 140-tan astam qylmystyq toptardyń qyzmetin toqtatyp, qylmys áleminiń 550-den astam ókilin jaýapqa tartty.
“Asa qaýipti qylmystyq toptardy, onyń ishinde Qańtar oqıǵasy kezinde jappaı tártipsizdikke qatysqandardy quryqtaý boıynsha jumys aıaqtalyp jatyr. Bıyl tamyzda Ulttyq qaýipsizdik komıteti jáne Bas prokýratýramen birlesip, Almaty jáne Shymkent qalalarynda bir ýaqytta «Dıkıı Armannyń» uıymdasqan qylmystyq tobynyń 15 yqtımal múshesine qatysty ustaý jáne tintý sharalaryn júrgizdi. Toptyń jetekshisi men negizgi músheleri qamaýǵa alynǵanymen, onyń basqa músheleri bostandyqta zańsyz áreketterdi jasaýdy jalǵastyrǵan”, – dedi IIM uıymdasqan qylmysqa qarsy kúres departamentiniń basqarma bastyǵy Qýandyq Alpys.
Onyń aıtýynsha, 40-tan astam tintý is-sharalary júrgizilip, atys, travmatıkalyq jáne sýyq qarý, taǵy basqa zattaı dáleldemeler tárkilengen. Barlyq kúdikti ýaqytsha ustaý ızolıatoryna qamaldy.
Budan basqa, IIM qylmystyq-atqarý júıesi komıtetimen birlesip, qylmystyq toptyń jetekshileri men negizgi músheleri otyrǵan mekemelerde jaǵdaıdy turaqsyzdandyrýǵa jol bermeý jáne tıisti rejımdi qamtamasyz etý jóninde sharalar qabyldanyp jatyr.
