پالەستينالىق حاماس قوزعالىسى يراندا ولتىرىلگەن يسمايل حانيەنىڭ ورنىنا ساياسي بيۋرونىڭ جاڭا جەتەكشىسىنىڭ ەسىمىن جاريالادى، - دەپ حابارلايدى "ادىرنا" ۇلتتىق پورتالى Euronews سايتىنا سىلتەمە جاساپ.
ياحيا سينۆاردىڭ ساياسي قوزعالىستىڭ جاڭا باسشىسى بولىپ سايلانعانى حابارلاندى.
بۇقارالىق اقپارات قۇرالدارىنىڭ حابارلاۋىنشا، ياحيا سينۆار ءومىرىنىڭ جارتىسىن يزرايل تۇرمەلەرىندە وتكىزگەن. ول حانيا ولتىرىلگەننەن كەيىن امان قالعان حاماستىڭ ەڭ كۇشتى جەتەكشىسى. سينۆاردى 2023 جىلدىڭ 7 قازانىندا يزرايلگە جاسالعان شابۋىلدىڭ ۇيىمداستىرۋشىسى دەپ تە اتايدى. سينۆاردىڭ ناقتى ورنالاسقان جەرى بەلگىسىز، الايدا باق حابارلاۋىنشا، ول ءالى دە گازا سەكتورىندا جاسىرىنىپ جۇرگەن بولۋى مۇمكىن.
يزرايل سىرتقى ىستەر ءمينيسترى يزرايل كاتتس سينۆاردىڭ «تەز ارادا كوزىن قۇرتۋعا» شاقىردى.
«حاماس-تىڭ جاڭا باسشىسى بولىپ يسمايل حانيانىڭ ورنىنا باس لاڭكەس ياحيا سينۆاردىڭ تاعايىندالۋى، ونىڭ مۇمكىندىگىنشە تەزىرەك كوزىن قۇرتۋعا جانە وسى زۇلىم ۇيىمدى جەر بەتىنەن تولىق جويۋعا تاعى ءبىر سەنىمدى سەبەپ بولدى»، - دەپ جازدى ول الەۋمەتتىك جەلىدە.
ەستەرىڭىزگە سالا كەتەيىك، يسمايل حانيا 31 شىلدەگە قاراعان ءتۇنى تەگەرانداعى قوناق ۇيگە قويىلعان بومبانىڭ جارىلۋىنان قازا تاپقان بولاتىن. حاماس پەن يران ءولتىرۋ ءىسى بويىنشا ءيزرايلدى ايىپتايدى، بىراق مەملەكەتتىك بيلىك ولاردىڭ قاتىسى بار ەكەنىن راستاعان دا، جوققا دا شىعارعان جوق.
