بۇۇ قاۋىپسىزدىك كەڭەسى بىرىككەن اراب امىرلىكتەرى ء(باا) ۇسىنعان گازا سەكتورىنا گۋمانيتارلىق كومەك جەتكىزۋدە كەڭەيتىلگەن كومەكتى تالاپ ەتەتىن قارار جوباسىن قابىلدادى، دەپ حابارلايدى «ادىرنا» ۇلتتىق پورتالى ربك-عا سىلتەمە جاساپ.
رەزوليۋتسياعا 13 ەل داۋىس بەردى، رەسەي مەن اقش داۋىس بەرۋدەن قالىس قالدى.
رەزوليۋتسيادا «قاۋىپسىز، كەدەرگىسىز جانە كەڭەيتىلگەن گۋمانيتارلىق قولجەتىمدىلىكتى دەرەۋ قامتاماسىز ەتۋ، سونداي-اق سوعىس قيمىلدارىن تۇراقتى توقتاتۋعا جاعداي جاساۋ ءۇشىن شۇعىل شارالار» تالاپ ەتىلگەن.
قۇجاتقا سايكەس، قاۋىپسىزدىك كەڭەسى بۇۇ باس حاتشىسىنان گازا تۇرعىندارىنا گۋمانيتارلىق كومەك جەتكىزۋدى جەدەلدەتۋ ءۇشىن گۋمانيتارلىق ماسەلەلەر جانە قالپىنا كەلتىرۋ جونىندەگى اعا ۇيلەستىرۋشى تاعايىنداۋدى، جانجال تاراپتارى بولىپ تابىلمايتىن مەملەكەتتەر ارقىلى وڭىرگە وسىنداي جۇكتەردى جەتكىزۋدى جەدەلدەتۋ ءۇشىن بۇۇ مەحانيزمىن قۇرۋدى سۇرايدى.
داۋىس بەرۋ الدىندا رەسەي اۋىزشا تۇزەتۋ ۇسىندى: ول گازا سەكتورىندا «گۋمانيتارلىق كومەككە قاۋىپسىز جانە كەدەرگىسىز قول جەتكىزۋگە مۇمكىندىك بەرۋ جانە سوعىس قيمىلدارىن تۇراقتى توقتاتۋ جولىندا شۇعىل قادامدار جاساۋ ءۇشىن» اتىستى توقتاتۋعا شاقىردى.
اقش بۇل تۇزەتۋگە توسقاۋىل قويدى. قاۋىپسىزدىك كەڭەسىنىڭ تۇراقتى مۇشەلەرىنىڭ كەم دەگەندە بىرەۋى وعان قارسى داۋىس بەرسە، تۇزەتۋ قابىلدانبايدى.
بۇعان دەيىن يزرايل قورعانىس ءمينيسترى حاماسپەن سوعىس بىرنەشە ايعا سوزىلاتىنىن ايتقان بولاتىن.
«ادىرنا» ۇلتتىق پورتالى
