پاريج وليمپياداسىندا قولا مەدالعا يە بولعان دزيۋدوشى عۇسمان قىرعىزباەۆقا كاپيتان اسكەري شەنى بەرىلەدى. بۇل تۋرالى قازاقستان رەسپۋبليكاسىنىڭ قورعانىس مينيسترلىگى جاريالادى، دەپ حابارلايدى “ادىرنا” ۇلتتىق پورتالى.
“وتان الدىنداعى ەرەن ەڭبەگى، دەنە تاربيەسى مەن سپورتتى دامىتۋعا قوسقان زور ۇلەسى، جوعارى جەتىستىگى جانە كاسىبيلىگى ءۇشىن عۇسمانعا جانە ونىڭ ەگىز سىڭارى، ورتالىق سپورت كلۋبى دزيۋدودان كوماندانىڭ بولىمشە باسشىسى، اعا جاتتىقتىرۋشىسى عۇمار قىرعىزباەۆقا قورعانىس ءمينيسترىنىڭ بۇيرىعىمەن كاپيتان اسكەري شەنى مەرزىمىنەن بۇرىن بەرىلەدى”، - دەپ اتاپ ءوتتى قورعانىس مينيسترلىگى سپورت كوميتەتىنىڭ توراعاسى، ورتالىق سپورت كلۋبىنىڭ باستىعى پولكوۆنيك ارمان ابەۋوۆ.
ونىڭ ايتۋىنشا، ەگىزدەرگە اسكەري شەندى قورعانىس ءمينيسترى رۋسلان جاقسىلىقوۆ تاپسىرادى.
ايتا كەتسەك، بۇگىن تاڭەرتەڭ دزيۋدودان قازاقستان قۇراماسى پاريجدەن ورالدى. سپورتشىلاردى الماتى گارنيزونىنىڭ اسكەري قىزمەتشىلەرى قارسى الدى. ولاردىڭ اراسىندا قورعانىس مينيسترلىگى ورتالىق سپورت كلۋبىنىڭ اسكەري قىزمەتشىسى، اعا لەيتەنانت عۇسمان قىرعىزباەۆ تا بولدى.
ەسكە سالايىق، پاريجدە ءوتىپ جاتقان جازعى وليمپيادادا عۇسمان قىرعىزباەۆ سەربيالىق دزيۋدوشى ستراحينيا ءبۋنچيچتى جەڭىپ، قولا مەدالعا يە بولعان ەدى.
