Parıj Olımpıadasynda qola medalǵa ıe bolǵan dzıýdoshy Ǵusman Qyrǵyzbaevqa kapıtan áskerı sheni beriledi. Bul týraly Qazaqstan Respýblıkasynyń Qorǵanys mınıstrligi jarııalady, dep habarlaıdy “Adyrna” ulttyq portaly.
“Otan aldyndaǵy eren eńbegi, dene tárbıesi men sportty damytýǵa qosqan zor úlesi, joǵary jetistigi jáne kásibıligi úshin Ǵusmanǵa jáne onyń egiz syńary, Ortalyq sport klýby dzıýdodan komandanyń bólimshe basshysy, aǵa jattyqtyrýshysy Ǵumar Qyrǵyzbaevqa Qorǵanys mınıstriniń buıryǵymen kapıtan áskerı sheni merziminen buryn beriledi”, - dep atap ótti Qorǵanys mınıstrligi Sport komıtetiniń tóraǵasy, Ortalyq sport klýbynyń bastyǵy polkovnık Arman Ábeýov.
Onyń aıtýynsha, egizderge áskerı shendi Qorǵanys mınıstri Rýslan Jaqsylyqov tapsyrady.
Aıta ketsek, búgin tańerteń dzıýdodan Qazaqstan quramasy Parıjden oraldy. Sportshylardy Almaty garnızonynyń áskerı qyzmetshileri qarsy aldy. Olardyń arasynda Qorǵanys mınıstrligi Ortalyq sport klýbynyń áskerı qyzmetshisi, aǵa leıtenant Ǵusman Qyrǵyzbaev ta boldy.
Eske salaıyq, Parıjde ótip jatqan jazǵy Olımpıadada Ǵusman Qyrǵyzbaev serbııalyq dzıýdoshy Strahınıa Býnchıchti jeńip, qola medalǵa ıe bolǵan edi.
