ەربولات باياتۇلى: تاستاعى جازۋ!

203

ۋا، ءتاڭىرىم!
توبەمىزدە كوك اسپان، تابانىمىزدا قارا جەر،
سەنىڭ سونبەيتىن نۇرىڭنان جارالعانبىز،
التايدان تورتكۇل دۇنيەگە تارالعانبىز،
جۇپار اۋادان، تۇنىق سۋدان ءنار العانبىز!
كوك ءبورىنى كوككە كوتەرىپ تەگىم دەپ بىلگەمىز،
الاقانىمىزدى اسپانعا قاراتىپ جايىپ، تىلەك تىلەۋدى سەنىم دەپ بىلگەمىز،
اتا- بابانىڭ سۇيەگى قالعان توبەنى جەرىم دەپ بىلگەمىز!
الا بايراقتى اسپانعا كوتەرىپ، ارۋاعىمىزدى شاقىرعانبىز!
جاۋ كورسە ايباتقا ءمىنىپ، اتويلاپ ارىستانداي اقىرعانبىز!
قىرانداي بيىكتە قالىقتاعانبىز،
شارتاراپقا شارىقتاعانبىز!
ءبىز- كوك تۇرىكتەن، ون وعىز، توعىز وقتانبىز،
تۇندە اش بورىدەي جورتقانبىز!
باسقالار جاياۋ جۇرگەندە،
ءبىز كۇلىكتى تاڭداپ مىنگەنبىز،
ات تۇياعى جەتەردە الىپ- الىپ باسىپ، الشاڭداپ جۇرگەنبىز!
كۇمىس شارامەن قىمىز ءىشىپ، التىننان شىراعدان جاققانبىز،
بولات تەمىردى قورتىپ، سايگىلىكتەرىمىزگە ۇزەڭگى تاققانبىز!
باسقالار ءابۇيرىن جابا الماي جالاڭبۇت جۇرگەندە،
اق تانىمىزگە تۇيەجۇن شەكپەن، بادانا كوزدى ساۋىت كيگەمىز!
جومارت جۇرەكتەرگە، كوك ءورىم كوڭىلدەرگە
باسىمىزدى يگەنبىز،
ءتاۋ ەتىپ، كيەلى قاسيەتكە سىيىنىپ، جاراتقان كوك ءتاڭىرىن سۇيگەنبىز!
سانامىزدى قالىپقا سالماعامىز،
ار مەن ۇياتىمىزدى نارىققا سالماعامىز،
وتپەيتىن پىشاقتى شارىققا سالماعامىز!
بايلىقتى قولدىڭ كىرى دەپ،
سۋداي ساپىرعانبىز،
انتالاپ جاۋ كەلسە، ارۋاعىمىزدى شاقىرعانبىز،
جاۋىمىزعا جولبارىستاي اتىلعانبىز،
وكىنىش وزەگىمىزدى ورتەسە، ولەردەي اھ ۇرعانبىز،
ءبىز- ۇماي انادان، اسىلدا تەكتى جاتىردانبىز!
ايعىرداي كىسىنەگەنبىز،
بۇقاداي بۇلقىنعانبىز،
بۋراداي جۇلقىنعانبىز،
تەرەڭگە سۇڭگىگەنبىز،
بيىككە ۇمتىلعانبىز،
قۇندىزداي قىز تۋعانبىز،
بورىدەي ۇل تۋعانبىز!
باسقاعا بارىپ سوقتىعىپ، تيمەگەنبىز،
سالتانات قۇرىپ ساۋىقتا بيلەگەنبىز،
كوڭىلىمىزدى مۇڭلى اۋەنمەن كۇيلەگەنبىز!
جاعامىزدى دا التىنداعامىز،
ساباتتا سالقىنداعامىز،
ءجاي وتىنداي جارقىلداعانبىز!
دۇنيەنى دۇرلىكتىرىپ، دۇركىرەگەنبىز،
نوسەردەي توگىلىپ سىركىرەگەنبىز،
كۇڭىرەنسەك كۇندەي كۇركىرەگەنبىز!
قارسى كەلگەندەردى مايىپ ەتكەنبىز،
قاسقىر ازۋىمىزمەن ءىرىپ، سويىپ وتكەنبىز،
قاپتاعان سەلدەي بولىپ شايىپ وتكەنبىز!
سوققان جەلدەي بولىپ ەسىپ وتكەنبىز،
كەدەرگىلەردى كەزدىگىمىزبەن كەسىپ وتكەنبىز،
التايدان اسىپ، تەمىر قاقپانى تەسىپ وتكەنبىز،
بايقالدان بالقانعا قاراي شۇبىرىپ كوشىپ وتكەنبىز!
جالپاق دۇنيەنى تورتكە ءبولىپ، توبەسىنەن قاراعانبىز،
كوزىمىزدى كۇنگە قاداپ، باسقادان بۇرىن جۇلدىزدى ساناعانبىز،
جەردىڭ كىندىگى بولعان الىپ التايدان تاراعانبىز!
عادىلەت پەن ادالدىقتى تۋ ەتىپ، سونى ءجون كورگەنبىز،
ادامنىڭ بالاسىن تەگىنە بولمەي وزىمىزبەن تەڭ كورگەنبىز،
توپالاڭ تيگەندەي قىلىپ اتا جاۋىمىزدى توقتىداي وڭگەرگەنبىز،
تۇلپارعا تۇنىقتان سۋ ىشكىزىپ، قولىمىزدان جەم بەرگەنبىز،
" ادام ادام قۇل بولمايدى!"- دەپ، قۇلدى دا تەڭگەرگەنبىز!
قارا تاس تا دا قاسيەت بار دەپ بىلگەمىز،
قارا سوزدە دە قاسيەت بار دەپ كونگەنبىز،
قارا قازاندى قاستەرلەپ،
قارا شاڭىراقتاعى قاسيەتكە سەنگەنبىز!
تەكسىزدى وزىمىزگە استە تەڭگەرمەگەنبىز،
قانداعى قاسيەتىم جوعالادى دەپ،
جەتى اتادان بەرى قىز بەرمەگەنبىز!
قىرىق قابىرعامىز قاقىراپ،
وتىز ومىرتقامىز وپىرىلسا دا دىبىسىمىزدى شىعارماعانبىز،
تەكتىلىك قاننان دەپ،
ىرگەمىزدەن تۋىسىمىزدى شىعارماعانبىز
ۇيىعان سۇتتەي بولىپ، ۋىسىمىزدان ۇلىسىمىزدى شىعارماعانبىز!
سۋلى جەر- نۋلى جەر دەپ،
قاينارلى كوزگە توقتاعانبىز،
تەنتەكتىكتى قوتانعا تىشار دەپ،
ءتارتىپ پەن تەزگە توقتاعانبىز،
جىبەك پەن بوزگە ەمەس، التىنعا ەمەس،
اتالى سوزگە توقتاعانبىز!
تاۋعا قاراپ وستىك، تالپىندىق،
اسقاق مۇرات كۇشتى دەدىك،
جەر تابانمىن قۋىرعان جىلقىدا تۇياق كۇشتى دەدىك،
بارىنەن دە ار بيىك، ولىمنەن دە ۇيات كۇشتى دەدىك!
ۋا،ءتاڭىرىم!
قورقاقتىڭ جۇرەگىن بەرمە،
ءالسىزدىڭ بىلەگىن بەرمە،
جاۋىمنىڭ تىلەگىن بەرمە!
دۇشپاننىڭ تاباسىن بەرمە،
جەتىمنىڭ نالاسىن بەرمە،
جاماننىڭ جالاسىن بەرمە!
قاناعاتسىزدىڭ كوزىن بەرمە،
ىنجىقتىڭ ءسوزىن بەرمە،
توپەلەسە دە كونە بەرەتىن ءتوزىم بەرمە!
ەسەردىڭ ميىن بەرمە،
جارلىنىڭ كۇيىن بەرمە،
ارامنىڭ سىيىن بەرمە،
كەلەسىز جيىن بەرمە!
اسقاق ارمانىمىزعا تاۋدىڭ الىپتىعىن سىيلا!
ولمەيتىن جانىمىزعا كۇننىڭ جارىقتىعىن سىيلا!
قارايعان كوڭىلىمىزگە ايدىڭ سۇتتەي ساۋلەسىن سىيلا!
سەمسەردەي سەرتىمىزگە بابامنىڭ سەنىمدىلىگىن سىيلا!
قايعى- مۇڭىمىزعا، قاپامىزعا جەلدىڭ جەڭىلدىگىن سىيلا!
ار- وجدانىمىزعا اعىن سۋدىڭ تازالىعىن سىيلا!
نامىسىمىزعا نايزاعايدىڭ شاتىرلاعانىن سىيلا!
سانامىزعا ۇلى ءداۋىردىڭ جاڭعىرىعىن سىيلا،
ۇلىسىمىز بەن ۇرپاعىمىزعا عۇمىردىڭ
ماڭگىلىگىن سىيلا!
ارۋاق!!!

 

ەربولات باياتۇلى

06.08.19

پىكىرلەر