Erbolat BAIaTULY: TASTAǴY JAZÝ!

3453
Adyrna.kz Telegram

Ýa, Táńirim!
Tóbemizde Kók Aspan, tabanymyzda Qara Jer,
Seniń sónbeıtin nuryńnan jaralǵanbyz,
Altaıdan tórtkúl dúnıege taralǵanbyz,
Jupar Aýadan, tunyq Sýdan nár alǵanbyz!
Kók bórini kókke kóterip tegim dep bilgemiz,
Alaqanymyzdy aspanǵa qaratyp jaıyp, tilek tileýdi senim dep bilgemiz,
Ata- babanyń súıegi qalǵan tóbeni jerim dep bilgemiz!
Ala baıraqty aspanǵa kóterip, Arýaǵymyzdy shaqyrǵanbyz!
Jaý kórse aıbatqa minip, atoılap arystandaı aqyrǵanbyz!
Qyrandaı bıikte qalyqtaǵanbyz,
Shartarapqa sharyqtaǵanbyz!
Biz- Kók Túrikten, On Oǵyz, Toǵyz Oqtanbyz,
Túnde ash bórideı jortqanbyz!
Basqalar jaıaý júrgende,
BIZ kúlikti tańdap mingenbiz,
At tuıaǵy jeterde alyp- alyp basyp, alshańdap júrgenbiz!
Kúmis sharamen qymyz iship, altynnan shyraǵdan jaqqanbyz,
Bolat temirdi qortyp, sáıgilikterimizge úzeńgi taqqanbyz!
Basqalar ábúırin jaba almaı jalańbut júrgende,
Aq tánimizge túıejún shekpen, badana kózdi saýyt kıgemiz!
Jomart júrekterge, kók órim kóńilderge
Basymyzdy ıgenbiz,
Táý etip, kıeli qasıetke syıynyp, Jaratqan Kók Táńirin súıgenbiz!
Sanamyzdy qalypqa salmaǵamyz,
Ar men uıatymyzdy naryqqa salmaǵamyz,
Ótpeıtin pyshaqty sharyqqa salmaǵamyz!
Baılyqty qoldyń kiri dep,
sýdaı sapyrǵanbyz,
Antalap jaý kelse, árýaǵymyzdy shaqyrǵanbyz,
Jaýymyzǵa jolbarystaı atylǵanbyz,
Ókinish ózegimizdi órtese, ólerdeı ah urǵanbyz,
BIZ- Umaı Anadan, asylda tekti jatyrdanbyz!
Aıǵyrdaı kisinegenbiz,
Buqadaı bulqynǵanbyz,
Býradaı julqynǵanbyz,
Tereńge súńgigenbiz,
Bıikke umtylǵanbyz,
Qundyzdaı qyz týǵanbyz,
Bórideı ul týǵanbyz!
Basqaǵa baryp soqtyǵyp, tımegenbiz,
Saltanat quryp saýyqta bılegenbiz,
Kóńilimizdi muńly áýenmen kúılegenbiz!
Jaǵamyzdy da altyndaǵamyz,
Sabatta salqyndaǵamyz,
Jáı otyndaı jarqyldaǵanbyz!
Dúnıeni dúrliktirip, dúrkiregenbiz,
Nóserdeı tógilip sirkiregenbiz,
Kúńirensek Kúndeı kúrkiregenbiz!
Qarsy kelgenderdi maıyp etkenbiz,
Qasqyr azýymyzmen irip, soıyp ótkenbiz,
Qaptaǵan seldeı bolyp shaıyp ótkenbiz!
Soqqan jeldeı bolyp esip ótkenbiz,
Kedergilerdi kezdigimizben kesip ótkenbiz,
Altaıdan asyp, Temir Qaqpany tesip ótkenbiz,
Baıqaldan Balqanǵa qaraı shubyryp kóship ótkenbiz!
Jalpaq dúnıeni tórtke bólip, tóbesinen qaraǵanbyz,
Kózimizdi Kúnge qadap, basqadan buryn Juldyzdy sanaǵanbyz,
Jerdiń kindigi bolǵan Alyp Altaıdan taraǵanbyz!
Ǵadilet pen adaldyqty tý etip, sony jón kórgenbiz,
Adamnyń balasyn tegine bólmeı ózimizben teń kórgenbiz,
Topalań tıgendeı qylyp ata jaýymyzdy toqtydaı óńgergenbiz,
Tulparǵa tunyqtan sý ishkizip, qolymyzdan jem bergenbiz,
" Adam adam qul bolmaıdy!"- dep, quldy da teńgergenbiz!
Qara tas ta da qasıet bar dep bilgemiz,
Qara sózde de qasıet bar dep kóngenbiz,
Qara qazandy qasterlep,
Qara shańyraqtaǵy qasıetke sengenbiz!
Teksizdi ózimizge áste teńgermegenbiz,
Qandaǵy qasıetim joǵalady dep,
jeti atadan beri qyz bermegenbiz!
Qyryq qabyrǵamyz qaqyrap,
otyz omyrtqamyz opyrylsa da dybysymyzdy shyǵarmaǵanbyz,
Tektilik qannan dep,
irgemizden týysymyzdy shyǵarmaǵanbyz
Uıyǵan sútteı bolyp, ýysymyzdan Ulysymyzdy shyǵarmaǵanbyz!
Sýly jer- nýly jer dep,
qaınarly kózge toqtaǵanbyz,
Tentektikti qotanǵa tyshar dep,
tártip pen tezge toqtaǵanbyz,
Jibek pen bózge emes, altynǵa emes,
Ataly Sózge toqtaǵanbyz!
Taýǵa qarap óstik, talpyndyq,
asqaq murat kúshti dedik,
Jer tabanmyn qýyrǵan jylqyda tuıaq kúshti dedik,
Bárinen de AR bıik, Ólimnen de UIaT kúshti dedik!
Ýa,Táńirim!
Qorqaqtyń júregin berme,
Álsizdiń bilegin berme,
Jaýymnyń tilegin berme!
Dushpannyń tabasyn berme,
Jetimniń nalasyn berme,
Jamannyń jalasyn berme!
Qanaǵatsyzdyń kózin berme,
Ynjyqtyń sózin berme,
Tópelese de kóne beretin tózim berme!
Eserdiń mıyn berme,
Jarlynyń kúıin berme,
Aramnyń syıyn berme,
Kelesiz jıyn berme!
Asqaq armanymyzǵa Taýdyń alyptyǵyn syıla!
Ólmeıtin janymyzǵa Kúnniń jaryqtyǵyn syıla!
Qaraıǵan kóńilimizge Aıdyń sútteı sáýlesin syıla!
Semserdeı sertimizge babamnyń senimdiligin syıla!
Qaıǵy- muńymyzǵa, qapamyzǵa jeldiń jeńildigin syıla!
Ar- ojdanymyzǵa aǵyn sýdyń tazalyǵyn syıla!
Namysymyzǵa naızaǵaıdyń shatyrlaǵanyn syıla!
Sanamyzǵa Uly dáýirdiń jańǵyryǵyn syıla,
Ulysymyz ben urpaǵymyzǵa ǵumyrdyń
Máńgiligin syıla!
Árýaq!!!

 

Erbolat BAIaTULY

06.08.19

Pikirler