عىلىم جانە جوعارى ءبىلىم ءمينيسترى مەملەكەتتىك گرانت يەگەرى اتانا الماعان تۇلەكتەرگە كەڭەس بەردى، دەپ حابارلايدى "ادىرنا" ۇلتتىق پورتالى.
مينيستر ساياسات نۇربەك گرانتتان قۇرالاقان قالعان تۇلەكتەرگە مۇمكىندىكتەر ءتىزىمىن ۇسىنىپ، ءۇمىت ۇزبەۋگە شاقىردى. بۇل حابارلاما عىلىم جانە جوعارى ءبىلىم مينيسترلىگىنىڭ تەلەگرام جەلىسىندەگى رەسمي ارناسىندا جاريالاندى.
«سوڭعى ۋاقىتتا ەلىمىزدە بولعان سۋ تاسقىنى بۇكىل ەلگە ورتاق سىناق بولدى. وسى جاعدايعا بايلانىستى جوعارى ءبىلىم گرانتتارىنىڭ از عانا بولىگىن زارداپ شەككەن ءوڭىر تۇلەكتەرىنە بولدىك. سانى كوپ تە ەمەس، 5112 گرانت. 20 مىڭنان استام تۇلەك سۋ باسقان وڭىردەن بىتىرسە، سونىڭ 10 مىڭنان استام تۇلەگى وزدەرىڭىزبەن بىردەي جالپى كونكۋرسپەن ءوتتى. ءبىز ونى ءادىل جانە اشىق تۇردە بولۋگە بار كۇش-جىگەرىمىزدى سالدىق. كەشەگى اتا-انالار مەن بالالاردىڭ قۋانىش جاسىن كورىپ، ءبىز دە بىرگە قۋاندىق. بىراق، وكىنىشكە قاراي، گرانت الا الماعان تۇلەكتەر مەن وتباسىلارمەن دە بىرگەمىز. كوپتەگەن ادام مينيسترلىككە، ماعان حابارلاسىپ، جازىپ جاتىر، ال وسى ناتيجەنى سابىرمەن قابىلداعاندار دا بار ەكەن. ايتايىن دەگەنىم، ءۇمىت ۇزبەڭىزدەر! گرانت الۋ مۇمكىندىكتەرى ءالى دە بار!»، — دەيدى عىلىم جانە جوعارى ءبىلىم ءمينيسترى Telegram پاراقشاسىندا.
بيىل ەلىمىزدە سۋ تاسقىنىنان زارداپ شەككەن ايماقتار ءۇشىن كۆوتا قاراستىرىلعانىمەن، سول ايماقتاردىڭ تالاپكەرلەرى جالپى كونكۋرس بويىنشا گرانت ۇتىپ الدى.
گرانت العانداردىڭ تەك 1130-ى نەمەسە 1,7%-ى مۇمكىندىكتى پايدالاندى.
بۇل ايماقتاردى قولداۋ ءۇشىن تالاپكەرلەرگە دايىندالۋ جانە كونكۋرسقا قۇجات تاپسىرۋ ءۇشىن مەرزىمى ۇزارتىلىپ، كونكۋرسقا ەڭ جاقسى ۇبت ناتيجەسى بار سەرتيفيكاتىن ۇسىنۋ مۇمكىندىگى بەرىلگەنى انىقتالدى.
جوعارى بالل جيناعان 10 مىڭنان استام ادام گرانت الا الماعان. ونىڭ 7 مىڭنان استامى شىعارماشىلىق ماماندىقتار بويىنشا ۇبت تاپسىرعان تۇلەكتەر بولىپ شىقتى.
«قۇرمەتتى تۇلەك، قادىرلى اتا-انا ءبىزدىڭ ماقساتىمىز — ەل ەكونوميكاسىنا قاجەتتى كادرلار دايىنداۋ. گرانت الۋ مۇمكىندىكتەرىڭىز قايتالاپ جازام ءالى دە بار»، — دەگەن ساياسات نۇربەك وزگە گرانتتاردى ءتىزىپ بەردى.
— 3 مىڭعا دەيىن تالاپكەر گرانتتان باس تارتۋى مۇمكىن، ولار كەلەسى جوعارى بالل جيناعان تالاپكەرلەرگە بەرىلەدى.
— جەرگىلىكتى اتقارۋشى ورگانداردىڭ ياعني اكىمدىك گرانتتارى بار.
— KazEnergy قاۋىمداستىعىنىڭ گرانتتارىن قوسىڭىز.
— ح. ا. ياسساۋي اتىنداعى حقتۋ-دە ءبىلىم الۋ ءۇشىن تۇركيا رەسپۋبليكاسىنىڭ 500 گرانتى.
— جۇمىس بەرۋشىلەردىڭ گرانتتارى.
— تۇركىستانداعى حالىقارالىق تۋريزم جانە قوناقجايلىق ۋنيۆەرسيتەتى 800 ماقساتتى گرانت ۇسىنادى.
— قازاقستان حالقىنا قورى 850 گرانت بولەدى.
— رەكتورلار گرانتى، مىسالى تۇران-استانا ۋنيۆەرسيتەتى التىن بەلگى يەگەرلەرىنە گرانتتار بولۋدە.
— سەسسيا قورىتىندىسى بويىنشا بوس گرانت الۋ مۇمكىندىگى جانە بار.
«گرانت الا الماعان تۇلەكتەردى وسى جوعارىداعى مۇمكىندىكتەردى بارىنشا پايدالانۋعا شاقىرامىز»، - دەيدى مينيستر.
