قازاقستان ۇوك پرەزيدەنتى پاريج وليمپياداسىندا كۇمىستى ەنشىلەگەن گيمناستشىنى جەڭىسىمەن قۇتتىقتادى، دەپ حابارلايدى “ادىرنا” ۇلتتىق پورتالى.
ۇوك پرەزيدەنتى گەننادي گولوۆكين پاريج وليمپياداسىندا سپورتتىق گيمناستيكادان كۇمىس مەدال العان ناريمان قۇربانوۆقا قۇتتىقتاۋ جەدەلحاتىن جولدادى.
"ناريمان قۇربانوۆتى وليمپيادا ويىندارىنداعى كۇمىس جۇلدەسىمەن قۇتتىقتايمىن!
تاۋەلسىزدىك تاريحىندا تۇڭعىش رەت ءبىزدىڭ ەلىمىز سپورتتىق گيمناستيكادان وليمپيادا تۇعىرىنا كوتەرىلدى. جەڭىسكە دەگەن جىگەرىڭىز جانە قايسار مىنەزىڭىزدىڭ ارقاسىندا ءسىز بارشا قازاقستاندىق جانكۇيەردىڭ جۇرەگىنە جول تارتتىڭىز.
جەكە باپكەرىڭىز حۋسانجان كۋربانوۆقا دا ءوز قۇتتىقتاۋىمدى جولدايمىن. بۇل جۇلدەنىڭ ارتىندا ءسىزدىڭ دە، باپكەرىڭىزدىڭ دە ەڭبەگى جاتىر. وليمپيادا ويىندارىندا ءسىز جەڭىپ العان العاشقى كۇمىس مەدال بولاشاقتا جارقىن جەڭىستەرگە جەتەلەيتىنىنە سەنەمىن!” - دەلىنگەن قۇتتىقتاۋ حاتىندا.
