جامان ۇلت دەگەن ۇعىم جوق! بۇل پىكىردى الەمگە تانىمال ءانشى ديماش قۇدايبەرگەن ەلورداداعى ورتالىق ازيا مەديافورۋمىندا ايتتى، دەپ حابارلايدى “ادىرنا” ۇلتتىق پورتالى.
«ادامزات بۇل ومىردە ەمتيحاننان ءوتىپ جاتقانىن ۇمىتىپ، پەندەلىك تىرلىكتەن، كەۋدەمسوق وركوكىرەكتىكتەن ارىلا الماي كەلەدى. شەكسىز امبيتسياسىمەن سوعىس باستاپ جۇرگەن، وزدەرىن ۇلى سانايتىن كەيبىر دەرجاۆا باسشىلارى باسقا مەملەكەتتىڭ ىشكى تىرلىگىنە ارالاسىپ، ونىڭ قالاي ءومىر ءسۇرۋىن نەگە شەشۋى كەرەك؟ ولار قۇداي ەمەس قوي. مەن ونەر سالاسىندا قىزمەت ەتىپ جۇرگەندىكتەن، الەمنىڭ كوپتەگەن ەلىندە بولدىم، ءتۇرلى حالىقتاردىڭ مادەنيەتىمەن تانىسىپ ءجۇرمىن. وسى ۋاقىت ارالىعىندا تۇسىنگەنىم – حالىقتىڭ جامانى جوق، جامان ۇلت دەگەن ۇعىم جوق. تەك سول ۋاقىتتىڭ ەنشىسىنە كوز جۇگىرتسەك، وسى كۇنگە دەيىن سول حالىقتىڭ ويىن بۇرمالاپ، ءوزىنىڭ ارام پيعىلىن جۇزەگە اسىرىپ جۇرگەن مەملەكەت باسشىلارى عانا بار. بۇل شىندىق»، - دەدى د. قۇدايبەرگەن.
