31 شىلدە كۇنى اباي اتىنداعى قازاق ۇلتتىق وپەرا جانە بالەت تەاترىنىڭ قىزمەتكەرلەرى جۇمىستان سەبەپسىز شىعارىلعاندارىن ايتىپ، الەۋمەتتىك جەلىدە جازبا جاريالادى. نارازىلىق مينيسترلىكتىڭ نازارىنا ىلىگىپ، بۇل ماسەلەگە قاتىستى تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
جەلىدە تاراعان بەينەدە جۇمىستان قىسقارعان نازەركە ابىلقاسىموۆا 1 شىلدەگە دەيىن تەاتردا 9 كاپەلدينەر جۇمىس ىستەگەنىن ايتتى. ال 1 شىلدەدە تەاتر قىزمەتكەرلەرى، ادەتتە دەمالىسقا شىعادى. الايدا ولار ەڭبەك دەمالىسىنا شىعۋ ءۇشىن ءوتىنىش وتكىزۋگە بارعاندا وزدەرىنىڭ جۇمىستان بوساتىلعانىن بىلگەن.
"جۇمىستان شىعارۋ سەبەبىن الدا كەلە جاتقان تەاتردىڭ 90 جىلدىق مەرەيتويىمەن بايلانىستى ەكەنىن ايتتى. ءبىز تەاتردىڭ زاڭگەرىنە بىرنەشە رەت باردىق. ول بىزگە دورەكى تۇردە جاۋاپ بەرىپ، شتاتتىڭ قىسقارتىلاتىنى تۋرالى قۇجاتتى كورسەتىپ، ءوز ەركىمىزبەن جۇمىستان كەتۋگە كەڭەس بەردى", — دەيدى ول.
"جوعارى بىلىكتىلىكتى قاجەت ەتەتىن لاۋازىمداردى جويىپ، جاڭا لاۋازىمدار ەنگىزىلۋىنە بايلانىستى وزگەرىستەر بولىپ وتىر. وسى وزگەرىستەرگە قاتىسى بار بارلىق قىزمەتكەرگە بوس لاۋازىمدار نەمەسە قىزمەت كورسەتۋ شارتى بويىنشا جۇمىس ۇسىنىلعان، بىراق ولار جۇمىستان باس تارتتى. ايتا كەتەيىك، تەاتر بارلىق وتەماقىنى تولەيتىن بولادى", دەلىنگەن مينيسترلىك حابارلاماسىندا.
سونىمەن قاتار، قر مادەنيەت جانە اقپارات مينيسترلىگى اتالعان جاعدايعا قاتىستى زاڭدى تۇرعىدا قىزمەتتىك تەكسەرۋ جۇرگىزىلەتىنىن، ونىڭ ناتيجەلەرى كەيىنىرەك جاريالاناتىنىن دا ناقتىلادى.
