پاريج وليمپياداسىندا 60 كەلى سالماقتا سىنعا تۇسكەن ەلدوس سمەتوۆ قارسىلاسىن جەڭىپ، التىن يەلەنگەن. اقتوبەلىك كاسىپكەر چەمپيونعا ەرەكشە سىيلىق جاسايتىنىن ايتتى، دەپ حابارلايدى "ادىرنا" ۇلتتىق پورتالى.
اقتوبەلىك كاسىپكەر انۋار ماحانوۆ 100 جىلقى سىيلاماق. كۇللى قازاقتى جەڭىسىمەن قۋانتقان سپورتشىعا جەرگىلىكتى كاسىپكەر چەمپيونعا 100 باس جىلقى سىيلايتىنىن ايتتى.
ول پاريجدەگى قازاق باتىرىمەن تىكەلەي سويلەسىپ، سىيلىعىن دايىنداپ قويعانىن دا جەتكىزگەن.
"ەلدوس – ناعىز قازاق باتىرى. ول وسى التىنعا جەتۋ ءۇشىن ءوز جاستىعىن سارپ ەتتى. اتا-اناسىنىڭ، قالىڭ ەلدىڭ ءۇمىتىن اقتاپ، جاراقاتىنا، كوپتەگەن قيىندىققا قاراماستان، ەلىمىزدىڭ بايراعىن بيىكتەتتى. بىزدە تولىپ جاتقان وليمپيادا چەمپيونى جوق، سوندىقتان ەلدوس باتىرىمىز قانداي قۇرمەتكە دە لايىقتى. ءوزىم اۋىل شارۋاشىلىعىمەن اينالىساتىندىقتان، 100 جىلقى تارتۋ ەتەمىن", - دەيدى اسىل تۇقىمدى جىلقى اسىراۋمەن اينالىساتىن كاسىپكەر انۋار اقمىرزاۇلى.
