قازاقستاندىق تەننيسشى، الەمنىڭ ءتورتىنشى راكەتكاسى، رەسەيدەن الىنعان لەگيونەر ەلەنا رىباكينا دەنساۋلىعىنا بايلانىستى پاريجدەگى وليمپيادا ويىندارىنا قاتىسپايتىنى بەلگىلى بولدى. ەل سەنگەن سپورتشىنىڭ توسىن جاعدايدا كورتقا شىعۋدا باس تارتۋىن، قوعام تۇرلىشە قابىلداۋدا. ال قازاقستاندىق سپورتشىلار وليمپيادانىڭ العاشقى كۇنىندە العاشقى مەدالعا يە بولدى. تولىعىراق “ادىرنا” ماتەريالىندا تارقاتىپ كورەلىك.
ەلەنا ەيفەلگە بارمادى
قازاقستان تەننيس فەدەراتسياسىنىڭ مالىمەتىنشە، قازىر ەلەنا برونحيتپەن اۋىرىپ قالعان. دارىگەرلەر وعان تەك كورتقا عانا ەمەس، جارىستارعا ۇشۋعا ءۇزىلدى-كەسىلدى تىيىم سالىپ وتىر.
«رىباكينا وليمپيادادا جوعارى دەڭگەيدە ويىن كورسەتۋگە ۇمىتتەنىپ، ويىندارعا بەلسەندى تۇردە دايىندالدى. بىراق اۋرۋعا بايلانىستى بۇل مۇمكىن بولمادى. قازاقستان تەننيس فەدەراتسياسى ەلەنانىڭ تەزىرەك ساۋىعىپ، كورتقا ءساتتى ورالۋىن شىن جۇرەكتەن تىلەيدى. ءبىز وعان سەنەمىز جانە ونىڭ جاتتىعۋلار مەن جارىستارعا قايتا ورالۋىن اسىعا كۇتەمىز»، – دەلىنگەن فەدەراتسيا مالىمدەمەسىندە.
ەلەنا رىباكينا ءوزى دە الەۋمەتتىك جەلىدە ەل نامىسىن فرانتسيادا قورعاي المايتىنىنا قىنجىلاتىنىن جەتكىزدى.
"قۇرمەتتى قازاقستاندىقتار! وكىنىشكە قاراي، پاريجدەگى وليمپياداعا قاتىسا المايتىن بولدىم. ۋيمبلدون تۋرنيرىنەن كەيىن ءبرونحيتتىڭ اسقىنعان تۇرىمەن اۋىردىم، جاتتىعۋعا ورالۋعا تىرىسقانىممەن، اعزام ءالى قالپىنا كەلە قويمادى. دارىگەرلەر كورتقا شىعۋىما ءۇزىلدى-كەسىلدى تىيىم سالدى. ۇمىتتەرىڭىزدى اقتاماعانىما، پاريجدەگى وليمپيادادا ءبىزدىڭ قۇراما اتىنان باق سىناي المايتىنىما قاتتى قاپالىمىن. توكيودا مەدال الۋعا جاقىن قالعان ەدىم جانە قازاقستان قورجىنىنا التىن جۇلدە سالۋ ءۇشىن پاريج ويىندارىنا دا تىڭعىلىقتى دايىندالدىم. وكىنىشكە قاراي، اۋىرعانىم جوسپاردى جۇزەگە اسىرۋعا مۇمكىندىك بەرمەي قويدى. قازاقستاندىق بارلىق سپورتشىعا پاريجدە ساتتىلىك پەن جەتىستىك تىلەيمىن! بارلىق سپورتشىمىزعا جانكۇيەر بولامىن جانە ولار وليمپيادادا ەلىمىزدىڭ نامىسىن لايىق دەڭگەيدە قورعايدى دەپ سەنەمىن. العا، قازاقستان!", - دەدى ەلەنا رىباكينا.
ەلەنا رىباكينا بۇعان دەيىن ءبىر رەت وليمپيادا ويىندارىنا قاتىسقان. ول توكيو-2020 وليمپياداسىندا قازاقستان اتىنان ونەر كورسەتىپ جانە ايەلدەر اراسىندا جەكە سىندا شيرەك فينالعا دەيىن جەتكەن ەدى.
اۋىرسا دا التىن جەڭگەندەر بولعان
الەمدە بۇگىنگە دەيىن وليمپيادا ويىندارىنا دەنساۋلىق جاعدايىنا قاراماستان قاتىسقان سپورتشىلاردىڭ دا بارى ايتىلدى. ماسەلەن، 1996 جىلعى اتلانتا وليمپياداسىنا قاتىسقان امەريكالىق گيمناست كەرري سترۋگ، كوماندالىق جارىستا فينالدىق سەكىرۋدى اياقتاپ، التىن مەدالدى جەڭىپ الۋ ءۇشىن اياعىن جاراقاتتانعانىنا قاراماستان جارىسقان.
ال ونىڭ وتانداسى سيمون بايلز 2021 جىلعى توكيو وليمپياداسىندا پسيحيكالىق دەنساۋلىق ماسەلەلەرىمەن كۇرەسىپ، جارىستارعا تولىق قاتىسپاي، بىراق كوماندالىق جارىستا كوماندالاستارىنا قولداۋ كورسەتىپ، فينالدىق جارىستارعا شىققان.
وسى سەكىلدى دجوان بەنۋا 1984 جىلعى لوس-اندجەلەس وليمپياداسىندا تىزە جاراقاتىمەن جۇگىرىپ، العاشقى ايەلدەر مارافونىندا التىن مەدال جەڭىپ العان بولاتىن.
قوعام قالاي قابىلدادى؟
رىباكينانىڭ وليمپيادا ويىندارىنا قاتىسا المايتىنى قازاقستاندىق جانكۇيەرلەردى قىنجىلتتى. ولاردىڭ پىكىرى ەكى جاققا ءبولىندى. ءبىرى رىباكينانىڭ دەنساۋلىعىنا الاڭداپ، جىلى لەبىزدەرىن جاۋدىرسا، ەندى ءبىرى “ادەيى قاتىسپايىن دەپ تۇر” دەپ سىنعا الدى.
“قاسقىردى قانشا باقساڭ دا، ورمانعا قاراپ ۇليدى دەگەن راس”، “وعان قازاقستاننىڭ اتىنان شىعىپ كەرەك ەمەس، ودان دا باسقا ەلدىڭ اتىنان قوماقتى قارجىعا شىعۋ تيىمدىرەك”، “بۇنداي سپورتشىدان نە پايدى؟” “وزىڭنەن تۋماي ۇل بولماس دەگەن وسى ەكەن عوي” دەگەن سىندى نەگاتيۆتى پىكىر جازۋشىلار قاپتادى.
ال كەيبىرى ەلەنانىڭ دەنساۋلىعىنا الاڭداپ، وعان ساتتىلىك تىلەدى.
“مىنا پىكىر جازىپ جاتقانداردى تۇسىنبەيمىن! دەنساۋلىق بارىنەن ماڭىزدى عوي”، “ەل نامىسىن باسقا تۋرنيرلاردا دا قورعاپ، قازاقستاننىڭ اتىن اسقاقتاتىپ ءجۇر عوي، نەگە رەنجيسىڭدەر”، “تەزىرەك جازىلىپ كەت، ەلەنا، برونحيت وڭاي اۋرۋ ەمەس” دەگەندەر دە بولدى.
العاشقى قادامدار
وليمپيادانىڭ العاشقى كۇنىندە پنەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا قازاقستاندىق يسلام ساتباەۆ پەن الەكساندرا لە جۇبى وليمپيادا ويىندارىنىڭ قولا جۇلدەگەرى اتاندى.
فينالدىق كەزەڭدە وتانداستارىمىز گەرمانيا قۇراماسىمەن كەزدەستى.
العاش رەت وليمپيادا ويىندارىنا قاتىسىپ تۇرعان يسلام ساتباەۆ پەن الەكساندر لە جۇبى اننا يانسەن مەن ماكسيميليان ۋلبريحتەن باسىم ءتۇستى.
پاريج وليمپياداسىندا دزيۋدودان قازاقستاندىق سپورتشى ەلدوس سمەتوۆ ەكىنشى اينالىمدا ۋكرايندىق ديلشوت حالماتوۆتى ۇتسا، ءابيبا ابۋجاقىنوۆا العاشقى بەلدەسۋىندە سارا ريشونيدەن باسىم ءتۇستى.
ەلدوس سمەتوۆ شيرەك فينالدا تايپەيلىك يانگ يۋ ۆەيمەن كەزدەسەدى. ءبىرىنشى كەزەڭدە وتانداسىمىز نيدەرلاندتىق قارسىلاسىن شيدو سانى بويىنشا ۇتقان بولاتىن.
ال 48 كەلى سالماقتا سىنعا ءتۇسىپ جاتقان ءابيبا ابۋجاقىنوۆا بولسا، يزرايلدىك سپورتشىنى Waza-Ari ۇپايىمەن جەڭگەن.
دينا ليتپين
“ادىرنا” ۇلتتىق پورتالى
