Qazaqstandyq tennısshi, álemniń tórtinshi raketkasy, Reseıden alynǵan legıoner Elena Rybakına densaýlyǵyna baılanysty Parıjdegi Olımpıada oıyndaryna qatyspaıtyny belgili boldy. El sengen sportshynyń tosyn jaǵdaıda kortqa shyǵýda bas tartýyn, qoǵam túrlishe qabyldaýda. Al qazaqstandyq sportshylar Olımpıadanyń alǵashqy kúninde alǵashqy medalǵa ıe boldy. Tolyǵyraq “Adyrna” materıalynda tarqatyp kórelik.
ELENA EIFELGE BARMADY
Qazaqstan tennıs federaııasynyń málimetinshe, qazir Elena bronhıtpen aýyryp qalǵan. Dárigerler oǵan tek kortqa ǵana emes, jarystarǵa ushýǵa úzildi-kesildi tyıym salyp otyr.
«Rybakına Olımpıadada joǵary deńgeıde oıyn kórsetýge úmittenip, oıyndarǵa belsendi túrde daıyndaldy. Biraq aýrýǵa baılanysty bul múmkin bolmady. Qazaqstan tennıs federaııasy Elenanyń tezirek saýyǵyp, kortqa sátti oralýyn shyn júrekten tileıdi. Biz oǵan senemiz jáne onyń jattyǵýlar men jarystarǵa qaıta oralýyn asyǵa kútemiz», – delingen federaııa málimdemesinde.
Elena Rybakına ózi de áleýmettik jelide el namysyn Franııada qorǵaı almaıtynyna qynjylatynyn jetkizdi.
"Qurmetti qazaqstandyqtar! Ókinishke qaraı, Parıjdegi Olımpıadaǵa qatysa almaıtyn boldym. Ýımbldon týrnırinen keıin bronhıttiń asqynǵan túrimen aýyrdym, jattyǵýǵa oralýǵa tyrysqanymmen, aǵzam áli qalpyna kele qoımady. Dárigerler kortqa shyǵýyma úzildi-kesildi tyıym saldy. Úmitterińizdi aqtamaǵanyma, Parıjdegi Olımpıadada bizdiń qurama atynan baq synaı almaıtynyma qatty qapalymyn. Tokıoda medal alýǵa jaqyn qalǵan edim jáne Qazaqstan qorjynyna altyn júlde salý úshin Parıj oıyndaryna da tyńǵylyqty daıyndaldym. Ókinishke qaraı, aýyrǵanym jospardy júzege asyrýǵa múmkindik bermeı qoıdy. Qazaqstandyq barlyq sportshyǵa Parıjde sáttilik pen jetistik tileımin! Barlyq sportshymyzǵa jankúıer bolamyn jáne olar Olımpıadada elimizdiń namysyn laıyq deńgeıde qorǵaıdy dep senemin. Alǵa, Qazaqstan!", - dedi Elena Rybakına.
Elena Rybakına buǵan deıin bir ret Olımpıada oıyndaryna qatysqan. Ol Tokıo-2020 Olımpıadasynda Qazaqstan atynan óner kórsetip jáne áıelder arasynda jeke synda shırek fınalǵa deıin jetken edi.
AÝYRSA DA ALTYN JEŃGENDER BOLǴAN
Álemde búginge deıin Olımpıada oıyndaryna densaýlyq jaǵdaıyna qaramastan qatysqan sportshylardyń da bary aıtyldy. Máselen, 1996 jylǵy Atlanta Olımpıadasyna qatysqan amerıkalyq gımnast Kerrı Strýg, komandalyq jarysta fınaldyq sekirýdi aıaqtap, altyn medaldi jeńip alý úshin aıaǵyn jaraqattanǵanyna qaramastan jarysqan.
Al onyń otandasy Sımon Baılz 2021 jylǵy Tokıo Olımpıadasynda psıhıkalyq densaýlyq máselelerimen kúresip, jarystarǵa tolyq qatyspaı, biraq komandalyq jarysta komandalastaryna qoldaý kórsetip, fınaldyq jarystarǵa shyqqan.
Osy sekildi Djoan Benýa 1984 jylǵy Los-Andjeles Olımpıadasynda tize jaraqatymen júgirip, alǵashqy áıelder marafonynda altyn medal jeńip alǵan bolatyn.
QOǴAM QALAI QABYLDADY?
Rybakınanyń Olımpıada oıyndaryna qatysa almaıtyny qazaqstandyq jankúıerlerdi qynjyltty. Olardyń pikiri eki jaqqa bólindi. Biri Rybakınanyń densaýlyǵyna alańdap, jyly lebizderin jaýdyrsa, endi biri “ádeıi qatyspaıyn dep tur” dep synǵa aldy.
“Qasqyrdy qansha baqsań da, ormanǵa qarap ulıdy degen ras”, “oǵan Qazaqstannyń atynan shyǵyp kerek emes, odan da basqa eldiń atynan qomaqty qarjyǵa shyǵý tıimdirek”, “bundaı sportshydan ne paıdy?” “ózińnen týmaı ul bolmas degen osy eken ǵoı” degen syndy negatıvti pikir jazýshylar qaptady.
Al keıbiri Elenanyń densaýlyǵyna alańdap, oǵan sáttilik tiledi.
“Myna pikir jazyp jatqandardy túsinbeımin! Densaýlyq bárinen mańyzdy ǵoı”, “el namysyn basqa týrnırlarda da qorǵap, Qazaqstannyń atyn asqaqtatyp júr ǵoı, nege renjısińder”, “tezirek jazylyp ket, Elena, bronhıt ońaı aýrý emes” degender de boldy.
ALǴAShQY QADAMDAR
Olımpıadanyń alǵashqy kúninde pnevmatıkalyq vıntovkamen 10 metrge nysana kózdeýden aralas komandalyq synda qazaqstandyq Islam Sátbaev pen Aleksandra Le juby olımpıada oıyndarynyń qola júldegeri atandy.
Fınaldyq kezeńde otandastarymyz Germanııa quramasymen kezdesti.
Alǵash ret olımpıada oıyndaryna qatysyp turǵan Islam Satbaev pen Aleksandr Le juby Anna Iansen men Maksımılıan Ýlbrıhten basym tústi.
Parıj olımpıadasynda dzıýdodan qazaqstandyq sportshy Eldos Smetov ekinshi aınalymda ýkraındyq Dılshot Halmatovty utsa, Ábıba Abýjaqynova alǵashqy beldesýinde Sara Rıshonıden basym tústi.
Eldos Smetov shırek fınalda taıpeılik Iang Iý Veımen kezdesedi. Birinshi kezeńde otandasymyz nıderlandtyq qarsylasyn shıdo sany boıynsha utqan bolatyn.
Al 48 keli salmaqta synǵa túsip jatqan Ábıba Ábýjaqynova bolsa, ızraıldik sportshyny Waza-Ari upaıymen jeńgen.
Dına Lıtpın
“Adyrna” ulttyq portaly
