Qazaqstandyq tennisşı, älemnıŋ törtınşı raketkasy, Reseiden alynǧan legioner Elena Rybakina densaulyǧyna bailanysty Parijdegı Olimpiada oiyndaryna qatyspaityny belgılı boldy. El sengen sportşynyŋ tosyn jaǧdaida kortqa şyǧuda bas tartuyn, qoǧam türlışe qabyldauda. Al qazaqstandyq sportşylar Olimpiadanyŋ alǧaşqy künınde alǧaşqy medalǧa ie boldy. Tolyǧyraq “Adyrna” materialynda tarqatyp körelık.
ELENA EIFELGE BARMADY
Qazaqstan tennis federasiiasynyŋ mälımetınşe, qazır Elena bronhitpen auyryp qalǧan. Därıgerler oǧan tek kortqa ǧana emes, jarystarǧa ūşuǧa üzıldı-kesıldı tyiym salyp otyr.
«Rybakina Olimpiadada joǧary deŋgeide oiyn körsetuge ümıttenıp, oiyndarǧa belsendı türde daiyndaldy. Bıraq auruǧa bailanysty būl mümkın bolmady. Qazaqstan tennis federasiiasy Elenanyŋ tezırek sauyǧyp, kortqa sättı oraluyn şyn jürekten tıleidı. Bız oǧan senemız jäne onyŋ jattyǧular men jarystarǧa qaita oraluyn asyǧa kütemız», – delıngen federasiia mälımdemesınde. Elena Rybakina özı de äleumettık jelıde el namysyn Fransiiada qorǧai almaitynyna qynjylatynyn jetkızdı. "Qūrmettı qazaqstandyqtar! Ökınışke qarai, Parijdegı Olimpiadaǧa qatysa almaityn boldym. Uimbldon turnirınen keiın bronhittıŋ asqynǧan türımen auyrdym, jattyǧuǧa oraluǧa tyrysqanymmen, aǧzam älı qalpyna kele qoimady. Därıgerler kortqa şyǧuyma üzıldı-kesıldı tyiym saldy. Ümıtterıŋızdı aqtamaǧanyma, Parijdegı Olimpiadada bızdıŋ qūrama atynan baq synai almaitynyma qatty qapalymyn. Tokioda medal aluǧa jaqyn qalǧan edım jäne Qazaqstan qorjynyna altyn jülde salu üşın Parij oiyndaryna da tyŋǧylyqty daiyndaldym. Ökınışke qarai, auyrǧanym jospardy jüzege asyruǧa mümkındık bermei qoidy. Qazaqstandyq barlyq sportşyǧa Parijde sättılık pen jetıstık tıleimın! Barlyq sportşymyzǧa janküier bolamyn jäne olar Olimpiadada elımızdıŋ namysyn laiyq deŋgeide qorǧaidy dep senemın. Alǧa, Qazaqstan!", - dedı Elena Rybakina. Elena Rybakina būǧan deiın bır ret Olimpiada oiyndaryna qatysqan. Ol Tokio-2020 Olimpiadasynda Qazaqstan atynan öner körsetıp jäne äielder arasynda jeke synda şirek finalǧa deiın jetken edı.AUYRSA DA ALTYN JEŊGENDER BOLǦAN
Älemde bügınge deiın Olimpiada oiyndaryna densaulyq jaǧdaiyna qaramastan qatysqan sportşylardyŋ da bary aityldy. Mäselen, 1996 jylǧy Atlanta Olimpiadasyna qatysqan amerikalyq gimnast Kerri Strug, komandalyq jarysta finaldyq sekırudı aiaqtap, altyn medaldı jeŋıp alu üşın aiaǧyn jaraqattanǧanyna qaramastan jarysqan.
Al onyŋ otandasy Simon Bailz 2021 jylǧy Tokio Olimpiadasynda psihikalyq densaulyq mäselelerımen küresıp, jarystarǧa tolyq qatyspai, bıraq komandalyq jarysta komandalastaryna qoldau körsetıp, finaldyq jarystarǧa şyqqan. Osy sekıldı Djoan Benua 1984 jylǧy Los-Andjeles Olimpiadasynda tıze jaraqatymen jügırıp, alǧaşqy äielder marafonynda altyn medal jeŋıp alǧan bolatyn.QOǦAM QALAI QABYLDADY?
Rybakinanyŋ Olimpiada oiyndaryna qatysa almaityny qazaqstandyq janküierlerdı qynjyltty. Olardyŋ pıkırı ekı jaqqa bölındı. Bırı Rybakinanyŋ densaulyǧyna alaŋdap, jyly lebızderın jaudyrsa, endı bırı “ädeiı qatyspaiyn dep tūr” dep synǧa aldy.
“Qasqyrdy qanşa baqsaŋ da, ormanǧa qarap ūlidy degen ras”, “oǧan Qazaqstannyŋ atynan şyǧyp kerek emes, odan da basqa eldıŋ atynan qomaqty qarjyǧa şyǧu tiımdırek”, “būndai sportşydan ne paidy?” “özıŋnen tumai ūl bolmas degen osy eken ǧoi” degen syndy negativtı pıkır jazuşylar qaptady. Al keibırı Elenanyŋ densaulyǧyna alaŋdap, oǧan sättılık tıledı. “Myna pıkır jazyp jatqandardy tüsınbeimın! Densaulyq bärınen maŋyzdy ǧoi”, “el namysyn basqa turnirlarda da qorǧap, Qazaqstannyŋ atyn asqaqtatyp jür ǧoi, nege renjisıŋder”, “tezırek jazylyp ket, Elena, bronhit oŋai auru emes” degender de boldy.ALǦAŞQY QADAMDAR
Olimpiadanyŋ alǧaşqy künınde pnevmatikalyq vintovkamen 10 metrge nysana közdeuden aralas komandalyq synda qazaqstandyq İslam Sätbaev pen Aleksandra Le jūby olimpiada oiyndarynyŋ qola jüldegerı atandy.
Finaldyq kezeŋde otandastarymyz Germaniia qūramasymen kezdestı.
Alǧaş ret olimpiada oiyndaryna qatysyp tūrǧan İslam Satbaev pen Aleksandr Le jūby Anna Iаnsen men Maksimilian Ulbrihten basym tüstı.
Parij olimpiadasynda dziudodan qazaqstandyq sportşy Eldos Smetov ekınşı ainalymda ukraindyq Dilşot Halmatovty ūtsa, Äbiba Abujaqynova alǧaşqy beldesuınde Sara Rişoniden basym tüstı.
Eldos Smetov şirek finalda taipeilık Iаng Iý Veimen kezdesedı. Bırınşı kezeŋde otandasymyz niderlandtyq qarsylasyn şido sany boiynşa ūtqan bolatyn.
Al 48 kelı salmaqta synǧa tüsıp jatqan Äbiba Äbujaqynova bolsa, izraildık sportşyny Waza-Ari ūpaiymen jeŋgen.
Dina Litpin “Adyrna” ūlttyq portaly
