بۇگىنگى تاڭدا اقمولا وبلىسىندا جالپى كونتينگەنتى 38 مىڭعا جۋىق تاربيەلەنۋشىسى بار 600-دەي مەكتەپكە دەيىنگى ءبىلىم بەرۋ ۇيىمدارى جۇمىس ىستەيدى. بۇل 258 بالاباقشا مەن 338 مەكتەپكە دەيىنگى شاعىن ورتالىق.
«مەكتەپكە دەيىنگى ۇيىمداردى ەنگىزۋ مەن اشۋدىڭ 2024-25 جىلدارعا ارنالعان تۇزەتىلگەن قادامدىق جوسپارىنا سايكەس اعىمداعى جىلى 1600-دەن استام جاڭا ورىن قۇرۋ جوسپارلانۋدا. بۇل 1381 ورىندىق 10 مەكتەپكە دەيىنگى ۇيىمنىڭ اشىلۋى جانە جۇمىس ىستەپ تۇرعان 7 مەكتەپكە دەيىنگى ۇيىمنىڭ 242 ورىنعا كەڭەيۋى» - دەپ ءبولىستى وبلىستىق ءبىلىم باسقارماسىنىڭ مەكتەپكە دەيىنگى جانە جالپى ورتا ءبىلىم بەرۋ ءبولىمىنىڭ باس مامانى اندرەي مايباح.جىل سوڭىنا دەيىن 2 جاستان 6 جاسقا دەيىنگى بالالاردىڭ 93 پايىزى مەكتەپكە دەيىنگى تاربيەمەن جانە وقىتۋمەن قامتۋ جوسپارلانىپ وتىر. 2024 جىلدىڭ باسىنان بەرى 545 جاڭا ورىن قۇرىلدى. تسەلينوگراد، ەرەيمەنتاۋ جانە شورتاندى اۋداندارىندا 391 ورىندىق 3 جەكەمەنشىك بالاباقشا اشىلدى. جۇمىس ىستەپ تۇرعان 5 بالاباقشادا قوسىمشا 150-دەن استام ورىن قۇرىلدى. ايتا كەتەيىك، وبلىستا 1286 ورىندىق 5 بالاباقشا قۇرىلىسى جالعاسۋدا. 280 ورىندىق بالالار مەكەمەلەرى تسەلينوگراد اۋدانى، قوسشى قالاسى، كراسنىي يار اۋىلى مەن كوكشەتاۋ قالاسىندا جانە 166 ورىندىق موبيلدىلىگى تومەن توپتار ءۇشىن كوكشەتاۋ قالاسىندا سالىنىپ جاتىر.
