قازاقستاندا قۇقىقتىق ساياساتتى جۇزەگە اسىرۋ جانە زاڭ بولىمدەرىنىڭ ناتيجەلى جۇمىسى قۇقىقتىق مادەنيەتتى قالىپتاستىرۋدىڭ، قۇقىقتىق ءتارتىپتى قامتاماسىز ەتۋدىڭ جانە ازاماتتاردىڭ قۇقىقتارى مەن بوستاندىقتارىن قورعاۋدىڭ نەگىزى بولىپ تابىلادى.
قۇقىقتىق ساياساتتى جانە بولىمدەردىڭ جۇمىسىن جۇزەگە اسىرۋ ءۇشىن قۇقىقتىق ساياساتتى ازىرلەۋ جانە ىسكە اسىرۋدى ماقسات ەتۋ كەرەك. ولارعا:
زاڭ شىعارۋ باستامالارى: قۇقىق قولدانۋ تاجىريبەسى مەن قوعامدىق قاجەتتىلىكتەردى تالداۋ نەگىزىندە قالىپتاسادى. قازاقستان رەسپۋبليكاسىنىڭ ادىلەت مينيسترلىگى، سونداي-اق باسقا دا مۇددەلى ورگاندار مەن كوميسسيالار جاڭا زاڭدار مەن قولدانىستاعىلارىنا وزگەرتۋلەر ازىرلەيدى جانە ۇسىنادى.
تالداۋ جانە مونيتورينگ: قولدانىستاعى زاڭنامانىڭ تيىمدىلىگىنە زەرتتەۋلەر جۇرگىزىلەدى، ونىڭ نەگىزىندە قاجەتتى تۇزەتۋلەر ەنگىزىلەدى.
قازاقستان رەسپۋبليكاسىنىڭ ادىلەت مينيسترلىگى: قۇقىقتىق ساياسات، قۇقىق قورعاۋ جانە جاڭا نورماتيۆتىك قۇقىقتىق اكتىلەردى ازىرلەۋگە جاۋاپتى نەگىزگى ورگان. ول سونداي-اق قۇقىققا قاتىستى باسقا ورگانداردىڭ قىزمەتىن ۇيلەستىرەدى. ال قازاقستان رەسپۋبليكاسىنىڭ سىبايلاس جەمقورلىققا قارسى قىزمەتى سىبايلاس جەمقورلىققا قارسى زاڭنامانىڭ ساقتالۋىن قاداعالايدى جانە سىبايلاس جەمقورلىق قۇقىق بۇزۋشىلىقتاردىڭ الدىن الادى.
ءبىزدىڭ ەلىمىزدە سوت جۇيەسى: كونستيتۋتسيالىق كەڭەستەن، جوعارعى سوتتان جانە زاڭنىڭ ورىندالۋىن قامتاماسىز ەتەتىن جانە ازاماتتاردىڭ قۇقىقتارىن قورعايتىن تومەنگى سوتتاردان تۇرادى.
قۇقىقتىق مادەنيەت پەن قۇقىقتىق سانانى قالىپتاستىرۋ
حالىقتا، قاراپايىم تۇرعىندا بولسىن قۇقىقتىق ساۋاتتىلىقتىڭ باستاپقى ءبىلىمى بولۋى كەرەك. سول سەبەپتى ءبلىم بەرۋ ۇيىمدارىندا قۇقىق ءپانى بويىنشا ءبىلىم بەرۋ باعدارلامالارى ەنگىزىلگەن. ودان بولەك، ازاماتتار مەن كاسىپورىندار ءۇشىن سەمينارلار مەن ترەنينگتەر ۇيىمداستىرۋ دا باستى ماقساتتا.
قۇقىقتىق تۇرعىدا حالىق اراسىندا تولەرانتتىلىق جانە قۇقىقتىق سانانى دامىتۋ ءۇشىن كەلەسىدەي ارەكەتتەر جاسالۋى ءتيىس:
ادام قۇقىقتارىن ىلگەرىلەتۋ: ادام قۇقىقتارى مەن زاڭ ۇستەمدىگى قاعيداتتارىن قۇرمەتتەۋگە باعىتتالعان اقپاراتتىق ناۋقاندار مەن ءبىلىم بەرۋ باعدارلامالارى.
قوعامدىق جانە قۇقىق قورعاۋ ۇيىمدارى: ولار قۇقىقتىق مادەنيەتتى ارتتىرۋدا جانە قوعامدى قۇقىقتار مەن مىندەتتەر تۋرالى اقپاراتتاندىرۋدا بەلسەندى ءرول اتقارادى.
زاڭ جوبالارىنىڭ اشىقتىعىنا بايلانىستى بىزدە اقپاراتتار قولجەتىمدى. نورماتيۆتىك قۇقىقتىق اكتىلەر جوبالارىن رەسمي سايتتاردا جاريالاۋ، قوعامدىق تالقىلاۋلار مەن كونسۋلتاتسيالار وتكىزۋ، باق بەتتەرىندە دەرەكتەر ءجيى جاريالانىپ تۇرادى.
بۇل شارالار ازاماتتاردىڭ قۇقىقتارى مەن بوستاندىقتارى قورعالاتىن، قۇقىقتىق جۇيە ءتيىمدى جانە ءادىل جۇمىس ىستەيتىن قۇقىقتىق مەملەكەت قۇرۋعا ىقپال ەتەدى.
ەل تۇرعىندارىنىڭ اراسىندا قۇقىقتىق مادەنيەتتى جوعارىلاتۋ ماقساتىندا ءتۇرلى ءىس-شارالار دا ءجيى وتكىزىلىپ وتىرادى.
قازاقستان حالقىنىڭ قۇقىقتىق مادەنيەتى مەن قۇقىقتىق ساناسىن دامىتۋعا باعىتتالعان «رۋحاني جاڭعىرۋ» باعدارلاماسىنىڭ اياسىندا «قۇقىتتىق مادەنيەت» ارنايى جوباسى ازىرلەنىپ، كوپكە جول تارتقانۇ
ارنايى جوبانى جۇزەگە اسىرۋ ماقساتىندا ادىلەت مينيسترلىگى ءبىلىم جانە عىلىم مينيسترلىگىمەن، ىشكى ىستەر مينيسترلىگىمەن جانە جەرگىلىكتى اتقارۋشى ورگاندارمەن بىرلەسە وتىرىپ، 1 065 063 ادامدى قامتيتىن 86 490 ءىس-شارانى جۇزەگە اسىردى.
بۇگىندە ەلىمىزدە «ادىلەت» اقپاراتتىق-قۇقىقتىق جۇيەسىنە تەگىن قولجەتىمدىلىك قامتاماسىز ەتىلگەن. جۇيە ارقىلى ءاربىر قازاقستاندىق ءوز قۇقىقتارى تۋرالى كەز كەلگەن دەرەكتى ونلاين بىلۋگە جانە زاڭنامالىق اكتىلەرگە ەنگىزىلگەن وزگەرىستەر مەن تولىقتىرۋلاردىڭ حرونولوگياسىن قاداعالاۋعا مۇمكىندىك الا الادى.
قالىڭ جۇرتشىلىققا قاجەتتى اقپاراتتى جەتكىزۋ ماقساتىندا ءجيى-ءجيى ەلدىڭ بارلىق وبلىستارىندا سونداي-اق استانا، الماتى جانە شىمكەنت قالالارىنىڭ اكىمدىكتەرى بيلبوردتار ورناتىپ، ۇنپاراقتار مەن بۋكلەتتەر تاراتىلىپ، حالىق اقپاراتتاندىرىلىپ وتىرادى.
قازاقستاندىقاردىڭ، جالپى حالىقتىڭ قۇقىقتىق ساۋاتتىلىعىن ارتتىرۋ – قوعامنىڭ دامۋىنىڭ العىشارتتارىنىڭ ءبىرى. دامىعان مەملەكەتتەردە قۇقىقتىق ساياسات كەڭىنەن ەتەك العان. وندا ءار ادام ءوز قۇقىن قورعاۋعا بەيىم تۇرادى. ال ءوزىنىڭ مىندەتىن بىلگەن ادام تارتىپسىزدىككە بارمايتىنىن ەستە ۇستاعان ءجون.
