20 شىلدەدەن باستاپ ەلوردادا سالاۋاتتى ءومىر سالتىنا ناسيحاتتايتىن كەزەكتى جوبا باستالدى، دەپ حابارلادى “ادىرنا” ۇلتتىق پورتالى.
سەنبى كۇنى St.Regis قوناق ءۇيىنىڭ ماڭىنداعى ساياباقتا Street Workout سايىسى بويىنشا قازاقستاننىڭ بىرنەشە دۇركىن چەمپيونى يمران يبراگيموۆ شەبەرلىك ءدارىسىن وتكىزدى. سونداي-اق جەكسەنبى كۇنى سول جاعالاۋداعى «كەرۋەن» ساۋدا ءۇيىنىڭ جانىندا Sky dance ستۋدياسى سامبا، دجايۆ، پاسادوبل، رۋمبا، چا-چا-چا بي تۇرلەرىنەن تۇرعىنداردى بازالىق جاتتىعۋىمەن تانىستىردى.
ءىس-شارا ۇيىمداستىرۋشىسى ءجاميلا بايدوسوۆانىڭ ايتۋىنشا، 2 كۇنگە جالعاسقان شاراعا مىڭعا جۋىق قالا تۇرعىنى قاتىسقان.
«استانا ساياباقتارىنداعى سپورتتىق شارالار مارافونىنىڭ باستى يدەياسى – سپورت پەن دەنساۋلىقتى جاقسارتۋ مەن ناسيحاتتاۋدى قامتيدى. «استانا قوزعالىستا» – بۇل بەلسەندى ءومىر سالتىن ىنتالاندىرۋعا جانە سپورت مادەنيەتىن دامىتۋعا باعىتتالعان باستاما. شارالار قوعامنىڭ ءتۇرلى مۇددەلەرى مەن ادامداردىڭ جاس ەرەكشەلىكتەرىنە بايلانىستى تاڭدالدى. سوندىقتان ەلىمىزدىڭ ءاربىر تۇرعىنى وزىنە سايكەس كەلەتىن سپورت ءتۇرىن تاڭداي الادى، مىسالى، يتتەرمەن بىرگە جۇگىرۋ، بيدەن شەبەرلىك ساباقتارى، ستريتبول ءتۋرنيرى، ۆەلوجارىس»،– دەدى ءجاميلا بايدوسوۆا.
يمران يبراگيموۆ مۇنداي سپورتتىق ءىس-شارانىڭ جاستار ءۇشىن ماڭىزى زور ەكەنىن ايتتى.
«شىن مانىندە بۇل وتە قىزىقتى ءىس-شارا. سول سەبەپتى وسىندا كەلگەن ازاماتتارعا العىسىم شەكسىز. سەبەبى ءبىزدىڭ قالامىز بەن ەلىمىزدىڭ تازا بولۋىنا بايلانىستى ۇيىمداستىرىلىپ جاتقان «تازا قازاقستان» اكتسياسىنىڭ ماڭىزى ەرەكشە. وسى يگى ءىس-شارانىڭ باسى-قاسىندا بولعان بارشا ازاماتتارعا العىسىمدى ايتامىن. اكتسياعا قاتىسقان ءار ازامات ەلىمىزدىڭ عانا تازا بولۋىنا ەمەس، ءوزىنىڭ دەنساۋلىعىنىڭ جاقسى بولۋىنا اتسالىستى دەپ ەسەپتەۋگە بولادى»، – دەدى ول.
