فەرروقورىتپا زاۋىتىنداعى جازاتايىم وقيعانى تەرگەۋ قاراعاندى وبلىسى باسشىلىعىنىڭ تۇراقتى باقىلاۋىمەن ءجۇرىپ جاتىر. بۇل تۋرالى بۇگىن، 22 شىلدەدە جاۋاپتى ورگاندار اپپاراتتىق كەڭەس كەزىندە جاعدايدى باياندادى، دەپ حابارلايدى ”ادىرنا” ۇلتتىق پورتالى.
“وزدەرىڭىز بىلەتىندەي، فەرروقورىتپا زاۋىتىندا شتاتتان تىس جاعداي بولىپ. وكىنىشكە قاراي، 8 قىزمەتكەر زارداپ شەكتى. قازىر بارلىعىنا تولىق كولەمدە قاجەتتى مەديتسينالىق كومەك كورسەتىلۋدە. مەن زارداپ شەككەندەردىڭ تۋىستارىمەن جەكە كەزدەستىم، دارىگەرلەرمەن دە سويلەستىم. مەديتسينا قىزمەتكەرلەرى قولدان كەلگەننىڭ ءبارىن جاساپ جاتىر”، – دەدى وبلىس اكىمى ەرماعانبەت بولەكپاەۆ.
دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆانىڭ ايتۋىنشا، زارداپ شەككەن بەس ادامنىڭ جاعدايى وتە اۋىر، ۇشەۋىنىڭ جاعدايى اۋىر جاعدايدا. شوكقا قارسى بارلىق كەشەندى تەراپيا جۇرگىزىلۋدە.
YDD Corporation فەرروقورىتپا زاۋىتىندا بولعان وقيعا فاكتىسى بويىنشا قر قك 156-بابىنىڭ 2-بولىگى بويىنشا “ابايسىزدا دەنساۋلىققا اۋىر زيان كەلتىرۋگە اكەپ سوققان ەڭبەكتى قورعاۋ ەرەجەلەرىن بۇزۋ” بابىنا ساي قىلمىستىق ءىس قوزعالدى.
ەڭبەك زاڭناماسى شەڭبەرىندە بولعان جاعدايدىڭ سەبەپتەرى مەن ءمان-جايلارىن تەكسەرۋ ءۇشىن ارنايى كوميسسيا قۇرىلدى.
“كوميسسيا قۇرامىنا بارلىق ۋاكىلەتتى مەملەكەتتىك ورگانداردىڭ وكىلدەرى كىردى. جۇمىستار ءبىرىنشى كۇننەن باستالىپ كەتتى. ءار وكىل ءوز باعىتىن پىسىقتاپ جاتىر. باستاپقىدا وقيعا بولعان جەر تەكسەرىلدى، جازاتايىم وقيعانىڭ كۋاگەرلەرىنە ساۋالناما جۇرگىزىلدى. ەندى تەحنيكالىق قۇجاتتامامەن تانىسۋ جۇرگىزىلۋدە. ءبىز كۇن سايىن جۇمىس ىستەپ جاتىرمىز”، – دەدى ەڭبەك ينسپەكتسياسى باسقارماسىنىڭ باسشىسى مۇرات قاراقەكىلوۆ.
تەرگەۋ قورىتىندىسى بويىنشا قورىتىندى جاسالادى.
”بۇل جۇمىستى سىزدەر بارلىق جاۋاپتى مەملەكەتتىك ورگاندارمەن، سونىڭ ىشىندە قۇقىق قورعاۋ ورگاندارىمەن تىعىز ىنتىماقتاستىقتا جۇرگىزۋلەرىڭىز كەرەك. تۇبەگەيلى جانە وبەكتيۆتى تۇردە!” – دەپ اتاپ ءوتتى ەرماعانبەت بولەكپاەۆ.
ەسكە سالا كەتەيىك، 20 شىلدەدە قاراعاندىداعى Ydd Corporation كومپانياسىنىڭ فەرروقورىتپا زاۋىتىندا توتەنشە جاعداي ورىن الدى. تاڭعى 4:10 شاماسىندا جالىننىڭ شىعۋى سالدارىنان 8 ادام زارداپ شەكتى.
ولاردىڭ ءبارى ماقاجانوۆ اتىنداعى كوپسالالى اۋرۋحاناعا جەتكىزىلدى. دەنساۋلىق ساقتاۋ باسقارماسىنىڭ مالىمەتىنشە، قىزمەتكەرلەردىڭ بارلىعى كۇيىك جاراقاتىن العان.
