«مايقايىڭالتىن» اق شاحتاسىنان ءۇشىنشى قۇتقارۋشىنىڭ دەنەسى جارتى جىلدان كەيىن تابىلدى، دەپ حابارلايدى “ادىرنا” ۇلتتىق پورتالى پاۆلودار وبلىسى توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەپ.
19 شىلدەدە "مايقايىڭالتىن" اق كۇشىمەن جەر قازۋ جۇمىستارىن جۇرگىزۋ كەزىندە 70 مەتر تەرەڭدىكتە ءبىر قۇتقارۋشىنىڭ دەنەسى تابىلدى، ول 4 قاڭتاردا "كااقق روش" جشس-ءنىڭ تاعى ءۇش قۇتقارۋشىسىمەن بىرگە اۆتوبۋستا جۇمىس ىستەمەيتىن شاحتانىڭ تازارتۋ كەڭىستىگىنە قۇلاعان.
بۇدان بۇرىن 2 قۇتقارۋشىنى ىزدەۋ جۇمىستارى قايتا جاندانعان. سكانەرلەۋ جانە اۆتوبۋستىڭ ناقتى ورنالاسقان جەرىن انىقتاۋ ءۇشىن سكانەرى بار "التىنالماس" اق ماماندارى تارتىلدى. سكانەرلەۋ ناتيجەلەرى بويىنشا اۆتوبۋستىڭ 12 مەتر تەرەڭدىكتە ورنالاسقاندىعى انىقتالدى.
اۆاريالىق-قۇتقارۋ جۇمىستارىن جۇرگىزۋ ورنىنا پاۆلودار وبلىسى تجد قۇتقارۋشىلارى كەلدى، ولار «كااقق روش» جشس-مەن بىرلەسىپ دەنەنى جەر بەتىنە شىعارىپ، جەدەل-تەرگەۋ توبىنا تاپسىردى.
"مايقايىڭالتىن" اق باس ديرەكتورى قايروللا جۇرسىنباەۆتىڭ سوزىنشە، ايدوس شايمەردەنوۆتىڭ دەنەسى 19 شىلدەدە ساعات 5.30 شاماسىندا تابىلعان. قۇتقارۋشىلار ىزدەۋدى كۇن شىققان كەزدە باستاعان ەكەن. ولار ساعات 13.30 شاماسىندا ءمايىتتى تولىقتاي شىعارىپ الىپتى.
سودان كەيىن پوليتسيا كەلىپ، بارلىق پروتسەدۋرالار باستالدى دەيدى. ول ءتورتىنشى قازا بولعان قۇتقارۋشىنىڭ دەنەسىن جاقىن ارادا تابامىز دەپ ۇمىتتەنەتىنىن جەتكىزدى.
قايتىس بولعان ادامنىڭ تۋىستارىنا پسيحولوگيالىق كومەك كورسەتۋ ءۇشىن تجد پسيحولوگى دا كەلدى.
ەستەرىڭىزگە سالا كەتەيىك، وقيعا بولعان كۇنى پاۆلودار وبلىسى تجد قۇتقارۋشىلارى 2 دەنەنى تاۋىپ، جەر بەتىنە شىعارعان بولاتىن. ودان كەيىن جۇمىستار توقتاتىلىپ، جۋىردا قايتادان جانداندى.
