پاۆلودار وبلىسىنداعى “مايقايىڭالتىن” كەنىشىندەگى وپىرىلعان جەردە قۇتقارۋشىلاردىڭ ومىرىنە قاۋىپ ءتونىپ تۇرعانى ايتىلدى، دەپ حابارلايدى “ادىرنا” ۇلتتىق پورتالى قر توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
پاۆلودار وبلىسىنداعى «مايقايىڭالتىن» اق اۋماعىنداعى وپىرىلعان جەردە ەكسكاۆاتورلار توپىراق پەن تاۋ جىنىستارىن قايتا قازۋ جۇمىستارىن جالعاستىرۋدا. وتكەن تاۋلىكتە سولتۇستىك بەتكەيدەگى ەكسكاۆاتورلار شامامەن 25 تەكشە مەتر كولەمىندە توپىراقتى قايتا قازدى.
قازىر اۋماقتاعى وپىرىلعان ورىننىڭ بارلىق پەريمەترى بويىنشا جارىقتار پايدا بولعان. مامانداردىڭ سوزىنشە، بۇل وتە قاۋىپتى جاعداي.
“بۇرىن كىشىرەك جارىقتار پايدا بولعان كەزدە، قۇلاۋلار ورىن العان. سونىمەن قاتار، توپىراقتى ماگنيتومەتر مەن گەوسكانەرمەن زەرتتەگەن كەزدە ماماندار بۇل نىساننىڭ ورنالاسقان جەرىندە بۇزىلۋ ىقتيمالدىعى جوعارى دەگەن قورىتىندىعا كەلدى. جۇمىستى نولدەن تومەن تەمپەراتۋرا مەن كۇشتى قارلى بوران دا قيىنداتادى. مۇنىڭ بارلىعى قۇتقارۋشىلاردىڭ ومىرىنە قاۋىپ توندىرەدى”، - دەپ حابارلادى توتەنشە جاعدايلار مينيسترلىگى.
وسىعان بايلانىستى ىزدەستىرۋ-قۇتقارۋ جۇمىستارىنىڭ ءبىر بولىگى نەمەسە تولىقتاي توقتاتىلۋى مۇمكىن ەكەنى ايتىلدى.
“اۆاريالىق-قۇتقارۋ جانە كەزەك كۇتتىرمەيتىن جۇمىستاردى جۇرگىزۋ مۇمكىن بولماعان جاعدايدا، توتەنشە جاعدايدى جويۋ باسشىسى ءبىرىنشى كەزەكتە توتەنشە جاعداي ايماعىنداعى ادامداردى قۇتقارۋ بويىنشا بارلىق مۇمكىن شارالاردى قابىلداي وتىرىپ، اتالعان جۇمىستاردى تولىقتاي نەمەسە ولاردىڭ ءبىر بولىگىن توقتاتا تۇرۋ تۋرالى شەشىم قابىلداۋعا قۇقىلى. بۇل ماسەلە قارالۋدا”، - دەپ تولىقتىردى تجم.
“ادىرنا” ۇلتتىق پورتالى
