استانالىق لاشىن جاناربەك موڭعوليانىڭ ەڭ بيىك نۇكتەسى — التاي تاۆان بوگد تاۋ جۇيەسىندەگى حۇيتەن شىڭىن باعىندىرىپ، 4374 مەتر بيىكتىكتە قازاقستاننىڭ كوك تۋىن جەلبىرەتتى.
موڭعولياعا ەڭبەك دەمالىسىن وتباسىمەن بىرگە وتكىزۋگە بارعان لاشىن ءۇشىن بۇل ساپار كۇتپەگەن سىناققا ءارى ەرەكشە تاجىريبەگە اينالدى. كاسىبي الپينيست اعاسى نۇربەك جاناربەكتىڭ ۇسىنىسىمەن ول 15 جاستاعى ءىنىسىن ەرتىپ، اعاسىمەن بىرگە ءۇش ادام بولىپ حۇيتەن شىڭىنا اتتانعان.
ماڭگى مۇزدىقتارمەن كومكەرىلگەن شىڭدى باعىندىرۋعا اعايىندىلارعا 15 ساعات ۋاقىت كەتكەن. ولاردىڭ ايتۋىنشا، بۇل — وتباسىنىڭ تاۋعا شىعۋداعى جەكە رەكوردى.
«ادەتتە حۇيتەن شىڭىنا شىعۋ ءۇشىن 2-3 كۇن ۋاقىت ءبولىپ، جول بويىنداعى كەمپتەرگە قوناتىنبىز. بۇل جولى اۋا رايىنىڭ قولايلى بولۋى جانە ۇشەۋىمىزدىڭ بىرلەسىپ ارەكەت ەتۋىمىزدىڭ ارقاسىندا كەمپتەرگە توقتاماي، بىردەن شىڭعا كوتەرىلىپ، قايتا تۇستىك»، — دەيدى لاشىن.
حۇيتەن شىڭى — موڭعوليانىڭ ەڭ بيىك نۇكتەسى. بيىكتىگى 4374 مەتر بولاتىن شىڭ التاي تاۆان بوگد تاۋ جۇيەسىنىڭ قۇرامىنا كىرەدى. ايماق كۇردەلى تابيعي جاعدايىمەن، قاتال كليماتىمەن جانە ماڭگى مۇزدىقتارىمەن ەرەكشەلەنەدى.
اعايىندىلاردىڭ ايتۋىنشا، بۇل ساپار تەك تاۋدى باعىندىرۋ ەمەس، وتباسى مۇشەلەرىمەن بىرگە سىننان ءوتىپ، ورتاق ەستەلىك قالىپتاستىرعان ەرەكشە ءسات بولدى.
