“تىنىس الۋ مۇمكىن ەمەس”. اتىراۋلىقتار قالاداعى جاعىمسىز يىسكە شاعىمدانۋدا

اتىراۋ قالاسىنىڭ تۇرعىندارى بىرنەشە كۇننەن بەرى ۇيلەرىنەن شىعا الماي وتىر.  مۇندا سوڭعى ءبىر اپتادا اۋا لاستانىپ، جاعىمسىز يىستەن جۇرتتىڭ مازاسى قاشقان، دەپ حابارلايدى “ادىرنا” ۇلتتىق پورتالى AtyrauPress-كە سىلتەمە جاساپ. «اتىراۋ تۇرعىندارى ءۇشىنشى كۇن قاتارىنان شىرىگەن جۇمىرتقانىڭ يىسىنە ۇقساس جاعىمسىز يىسپەن تىنىس الىپ وتىر. جەلدىڭ باعىتىن ەسكەرە وتىرىپ، ءيىس مەليوراتيۆتىك جۇمىستار جۇرگىزىلىپ جاتقان «كۆادرات» باعىتىنان شىققانى بەلگىلى بولدى»، - دەپ حابارلايدى جەرگىلىكتى باسىلىم. وندا اۋاداعى كۇكىرتتى سۋتەگىنىڭ بىرنەشە ەسە ارتىق مولشەرى تىركەلدى. شاعالا، ماياك، جيلگورودوك اۋداندارىندا ارتىقشىلىقتار تابىلمادى. «مەليوراتسيا كەزىندە قازۋ جۇمىستارى ءجۇرىپ، اۋاعا كوپ نارسە تاراعان. سونىڭ سالدارىنان كۇكىرتتى سۋتەگىنىڭ ءيىسى دە كۇشەيىپ كەتكەن بولۋ كەرەك. كەشە ساعات 10-دا كۇكىرتسۋتەگى كورسەتكىشى 0,22 ماكسيمۋمدى كورسەتتى، نەگىزى نورما 0,0008 بولدى. بۇل نورمادان ونداعان ەسە اسىپ، تۇرعىنداردىڭ دەنساۋلىعىنا زيانىن تيگىزۋدە. جەرگىلىكتى اتقارۋشى ورگان ەكولوگيا جانە تابيعي رەسۋرستار مينيسترلىگىمەن بىرلەسىپ، بۇل ماسەلەنى شەشۋ جانە بۋلانۋ توعانىنىڭ الاڭىن قالپىنا كەلتىرۋ ءۇشىن جول كارتاسىنا قول قويدى. ءدال وسى الاڭدا جاڭا سقس قۇرىلىسى ءجۇرىپ جاتىر»، - دەدى اتىراۋ وبلىسى بويىنشا ەكولوگيا دەپارتامەنتى باسشىسىنىڭ مىندەتىن اتقارۋشى ەرلان ەسەنوۆ. مالىمەتتەرگە سايكەس، جىل باسىنان بەرى قالاداعى ءىرى جانە ۇساق كاسىپورىندارعا 20-دان استام تەكسەرۋ جۇرگىزىلىپ، 13 ميلليارد تەڭگە ايىپپۇل سالىنعان. ايىپپۇلدار «كاسپيمۇناي» اق، «اتاكيم» جانە ت.ب. سالىندى. وسىلايشا، مەديتسينالىق قالدىقتاردى كادەگە جاراتاتىن «اتاكيم» سەرىكتەستىگى سۇزگىسىز جۇمىس جۇرگىزگەن. ەسەنوۆتىڭ ايتۋىنشا، قازىر بۇل كاسىپورىننىڭ قىزمەتىن توقتاتۋ ءۇشىن سوتتا سوت پروتسەسى ءجۇرىپ جاتىر.