قاراوزەن اۋىلى تۇرعىندارىنىڭ ءجيى كوتەرىپ جۇرگەن ماسەلەسى — اۋىلعا بالاباقشانىڭ قاجەتتىلىگى. تۇيتكىلدى ماسەلەنىڭ شەشىمى تابىلىپ، قاراوزەن اۋىلدىق وكرۋگى اكىمى اپپاراتىنىڭ عيماراتى بوساتىلىپ بەرىلىپ، جوندەۋ جۇرگىزىلدى.
بۇگىن «ءايشابيبى» بوبەكجايى ەسىگىن ايقارا اشتى. بوبەكجايدىڭ اشىلۋ سالتاناتىنا اۋدان اكىمى اسلانبەك سارقۇلوۆ، وبلىستىق ءماسليحات دەپۋتاتى سامات حاسانوۆ، زيالى قاۋىم وكىلدەرى مەن ءبىلىم سالاسىنىڭ ارداگەرلەرى قاتىستى.
ەلىمىزدىڭ ەرتەڭى – بۇگىنگى جاس ۇرپاق. بالالارعا ساپالى ءبىلىم بەرىپ، قولايلى ورتا قالىپتاستىرۋ مەملەكەتتىڭ باستى مىندەتتەرىنىڭ ءبىرى. مەكتەپ جاسىنا دەيىنگى بالالاردى دامىتۋ ماسەلەسى مەملەكەتتىك ساياساتتىڭ اجىراماس بولىگى بولىپ وتىر. وسى ماقساتتا مەملەكەتتىك-جەكەمەنشىك سەرىكتەستىك اياسىندا بىرقاتار جۇمىستار اتقارىلۋدا. سولاردىڭ ءبىرى مەملەكەتتىك-جەكەمەنشىك سەرىكتەستىك ارقىلى جەكە كاسىپكەر نۇرلان اسىلبەكۇلىنىڭ باستاماسىمەن بۇلدىرشىندەردى تاربيەلەۋ مەن وقىتۋعا ارنالعان 45 ورىندىق «ءايشابيبى» جەكە بوبەكجايىنىڭ اشىلۋى.
“بۇگىن اۋدانىمىزدا بالالارىمىزدىڭ يگىلىگى ءۇشىن تاعى ءبىر بوبەكجاي پايدالانۋعا بەرىلىپ وتىر. بالالارعا ساپالى ءبىلىم، سانالى تاربيە بەرىپ، جان-جاقتى جاعداي جاساۋ ءۇشىن مەملەكەت باسشىسىنىڭ تاپسىرماسىنا سايكەس بالاباقشا مەن مەكتەپتەردىڭ سانىن كوبەيتۋ ءۇشىن بىرقاتار جۇمىستار ءجۇرىپ جاتىر. سونىڭ ىشىندە جەكە كاسىپكەرلەردىڭ وسىنداي يگى ىستەرگە تارتىلعانى بارشامىزدى قۋانتادى. ەرتەڭگى جاس ۇرپاقتارىمىز امان بولسىن”، — دەگەن اۋدان اكىمى جەكە كاسىپكەرگە ريزاشىلىعىن ءبىلدىردى.
“اۋىلدا بالاباقشا ماسەلەسىنىڭ شەشىمىن تابۋىنا سەبەپكەر بولىپ، ۇلەسىن قوسقانى ءۇشىن جانە ازاماتتىق ۇستانىمى مەن ادال ەڭبەگى ءۇشىن جەكە كاسىپكەر نۇرلان اسىلبەكۇلىنا العىسىمدى بىلدىرەمىن. باتىستىڭ ادۋىندى اقىنى باۋىرجان شيمەردينۇلىنىڭ «ادامنىڭ كىندىك قانى تامعان جەرگە، ماڭدايىنىڭ تەرى دە تامۋ كەرەك» دەگەن قاناتتى ءسوزى بار. ءسىز تۋعان جەرگە ات باسىن بۇرىپ، قاراوزەن اۋىلىندا جەكەمەنشىك بالاباقشانىڭ اشىلۋىنا سەبەپكەر بولىپ، تۇيتكىلدى ماسەلەنىڭ شەشىلۋىنە ۇلەسىڭىزدى قوستىڭىز”، — دەدى اۋدان اكىمى.
بوبەكجاي بۇلدىرشىندەرى 3 توپتا تاربيەلەنەدى. بالالارعا بارلىق جاعداي جاسالىپ، زاماناۋي جابدىقتارمەن قامتاماسىز ەتىلگەن. بوبەكجايعا وبلىستىق ءماسليحات دەپۋتاتى سامات حاسانوۆ، اۋداندىق ءماسليحات دەپۋتاتى دارحان اياباليەۆ، سونىمەن قاتار كاسىپكەرلەر مەن شارۋا قوجالىق جەتەكشىلەرى قولداۋ كورسەتتى.
بوبەكجايدىڭ اشىلۋ سالتاناتىندا بۇلدىرشىندەر ءان ايتىپ، جىردان شاشۋ شاشتى.
