Qaraózen aýyly turǵyndarynyń jıi kóterip júrgen máselesi — aýylǵa balabaqshanyń qajettiligi. Túıtkildi máseleniń sheshimi tabylyp, Qaraózen aýyldyq okrýgi ákimi apparatynyń ǵımaraty bosatylyp berilip, jóndeý júrgizildi.
Búgin «Aıshabıbi» bóbekjaıy esigin aıqara ashty. Bóbekjaıdyń ashylý saltanatyna aýdan ákimi Aslanbek Sarqulov, oblystyq máslıhat depýtaty Samat Hasanov, zııaly qaýym ókilderi men bilim salasynyń ardagerleri qatysty.
Elimizdiń erteńi – búgingi jas urpaq. Balalarǵa sapaly bilim berip, qolaıly orta qalyptastyrý memlekettiń basty mindetteriniń biri. Mektep jasyna deıingi balalardy damytý máselesi memlekettik saıasattyń ajyramas bóligi bolyp otyr. Osy maqsatta memlekettik-jekemenshik seriktestik aıasynda birqatar jumystar atqarylýda. Solardyń biri memlekettik-jekemenshik seriktestik arqyly jeke kásipker Nurlan Asylbekulynyń bastamasymen búldirshinderdi tárbıeleý men oqytýǵa arnalǵan 45 oryndyq «Aıshabıbi» jeke bóbekjaıynyń ashylýy.
“Búgin aýdanymyzda balalarymyzdyń ıgiligi úshin taǵy bir bóbekjaı paıdalanýǵa berilip otyr. Balalarǵa sapaly bilim, sanaly tárbıe berip, jan-jaqty jaǵdaı jasaý úshin Memleket basshysynyń tapsyrmasyna sáıkes balabaqsha men mektepterdiń sanyn kóbeıtý úshin birqatar jumystar júrip jatyr. Sonyń ishinde jeke kásipkerlerdiń osyndaı ıgi isterge tartylǵany barshamyzdy qýantady. Erteńgi jas urpaqtarymyz aman bolsyn”, — degen aýdan ákimi jeke kásipkerge rızashylyǵyn bildirdi.
“Aýylda balabaqsha máselesiniń sheshimin tabýyna sebepker bolyp, úlesin qosqany úshin jáne azamattyq ustanymy men adal eńbegi úshin jeke kásipker Nurlan Asylbekulyna alǵysymdy bildiremin. Batystyń adýyndy aqyny Baýyrjan Shımerdınulynyń «Adamnyń kindik qany tamǵan jerge, mańdaıynyń teri de tamý kerek» degen qanatty sózi bar. Siz týǵan jerge at basyn buryp, Qaraózen aýylynda jekemenshik balabaqshanyń ashylýyna sebepker bolyp, túıtkildi máseleniń sheshilýine úlesińizdi qostyńyz”, — dedi aýdan ákimi.
Bóbekjaı búldirshinderi 3 topta tárbıelenedi. Balalarǵa barlyq jaǵdaı jasalyp, zamanaýı jabdyqtarmen qamtamasyz etilgen. Bóbekjaıǵa oblystyq máslıhat depýtaty Samat Hasanov, aýdandyq máslıhat depýtaty Darhan Aıabalıev, sonymen qatar kásipkerler men sharýa qojalyq jetekshileri qoldaý kórsetti.
Bóbekjaıdyń ashylý saltanatynda búldirshinder án aıtyp, jyrdan shashý shashty.
