مادەنيەت جانە اقپارات مينيسترلىگى قازاقستاننىڭ ەلتاڭباسىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
مينيسترلىك مەملەكەتتىك رامىزدەرگە وزگەرتۋلەردى قابىلداۋ الگوريتمىن ءتۇسىندىردى.
"قازاقستانداعى كونستيتۋتسيالىق زاڭدار مەن قوعام ءومىرىنىڭ باسقا دا ماڭىزدى ماسەلەلەرى، كونستيتۋتسيا جوبالارى بويىنشا شەشىمدەر جالپىحالىقتىق رەفەرەندۋم – جالپىحالىقتىق داۋىس بەرۋ ارقىلى قابىلدانادى", - دەلىنگەن ۆەدومستۆودا.
قر كونستيتۋتسياسىنىڭ 54-بابىنا سايكەس، مەملەكەتتىك رامىزدەرگە ەنگىزىلەتىن كەز كەلگەن وزگەرىستەر مەن تولىقتىرۋلار قازاقستان پارلامەنتىندە قارالادى جانە جالپىحالىقتىق رەفەرەندۋم ارقىلى وتكىزىلەدى.
بۇل رەتتە مەملەكەت باسشىسى ۇلتتىق قۇرىلتايدىڭ كەزەكتى وتىرىسىندا مەملەكەتتىك ەلتاڭبانى وزگەرتۋ تۋرالى شەشىم جالپى كەلىسىم بولعان جاعدايدا قابىلدانۋى مۇمكىن ەكەنىن اتاپ وتكەن بولاتىن.
«مينيسترلىك وسىعان ۇقساس باستامالار اياسىندا شەت ەلدەردەگى مەملەكەتتىك رامىزدەرگە وزگەرىستەر ەنگىزۋ ماسەلەلەرىنە تالداۋ جۇرگىزدى. الايدا ەلىمىزدىڭ بىرقاتار وڭىرلەرىندە تابيعي توتەنشە جاعدايلاردىڭ ورىن الۋىنا بايلانىستى بۇل ءىس-شارالار توقتاتىلدى»، - دەلىنگەن مادەنيەت مينيسترلىگى حابارلاماسىندا.
ايتا كەتەيىك، بۇعان دەيىن قازاقستاننىڭ ەلتاڭباسىن وزگەرتۋ ماسەلەسى كۇن تارتىبىنەن الىنعانى تۋرالى ايتىلعان بولاتىن.
