بەلگىلى دەپۋتات باقىت سىزدىقوۆا ءومىردىڭ ءمانى تۋرالى الەۋمەتتىك جەلىدەگى پاراقشاسىندا جازدى. ول ومىردە بارلىق نارسەنى جاساپ كورگەنىمەن، ءومىردىڭ ءمانىن تۇسىنبەگەنىن جەتكىزگەن. شامان وتىنان سەكىرىپ، قابىرگە بارىپ سيىنىپ، باقىت ىزدەگەنىن جاسىرمادى ول. وسىلايشا، دەپۋتات ءومىرىنىڭ كەيبىر شاقتارىن ەسىنە العان، دەپ حابارلايدى Stan.kz.
«ءومىردىڭ ءمانى نەدە؟ مەن ءومىردىڭ ءمانىن ۇزاق ۋاقىت بويى ىزدەدىم. كىتاپتار وقىدىم، ءتۇرلى داستۇرلەردى زەرتتەدىم، ۇندىستانعا باردىم، اشرامدارعا باردىم، گوانىڭ التىن قۇمدارىندا يوگا جاتتىعۋلارىن جاسادىم، قيىن جورىقتارعا باردىم جانە بيىك تاۋلاردا ءمىناجات ەتتىم، شامان وتىنان سەكىردىم. يەرۋساليمدەگى قاسيەتتى قابىرگە بارىپ باقىتتى ەتە كور دەپ سۇرادىم، اتقا ءمىنىپ، قورقىنىشىمدى جەڭىپ، 25 مەتر بيىكتىكتەن سارقىراماعا سەكىردىم»، - دەيدى باقىت سىزدىقوۆا.
ومىرىندە جاقسىلىق پەن جاماندىقتى قاتار الىپ كەلە جاتقان ول قانداي قيىندىق بولسا دا، قانداي نارسە جاساپ كورسە دە توقتاماعانىن ايتادى. قوعامدىق، ساياسي، الەۋمەتتىك ومىرگە بەلسەنە ارالاسقانىن جەتكىزدى ول.
«ارىقتادىم، تولدىم، ۆەگەتاريان بولدىم. ءتىپتى كوپ اقشا تاۋىپ، قارىزعا دا باتتىم. سايلاۋدا جەڭىپ شىعىپ، زاڭدار مەن مەملەكەتتىك باعدارلامالاردىڭ نەگىزىن قالىپتاستىردىم. بالا قۇقىقتارىن قورعاپ، ۇيىم قۇرىپ، پارتيانىڭ قۇرلىسىمەن اينالىسىپ تا ۇلگەردىم»، - دەيدى باقىت سىزدىقوۆا.
الايدا دەپۋتات ءومىردىڭ ءمانىن تابا الماي جۇرگەنىن ايتتى. سونىمەن قاتار، باقىت سىزدىقوۆا وسى سۇراقتىڭ ءجيى مازالايتىنىن اشىق ايتىپ، وقىرماندارىمەن بايلانىس ورناتقان.
«قايىرىمدىلىق جۇمىستارىن دا جاساپ، كۆن ساحناسىن دا باعىندىردىم. تەلەديدار مەن ەكراندى باعىندىردىم. مەككەدەگى قاسيەتتى قاعباعا بارىپ، مەديناداعى پايعامباردىڭ قابىرىندە دۇعا وقىدىم، ادامدارعا كومەكتەستىم جانە ولار ماعان كومەكتەستى، شابىتتاندىردى. بىراق ۇنەمى وزىمە سۇراق قوياتىنمىن. «ءومىردىڭ ءمانى نەدە؟» دەگەن ساۋال سانامدا جۇرەتىن. كوپ نارسەنى كورسەم دە، جاۋابىن تاپپادىم. ال ءسىز ءومىرىڭىزدىڭ ءمانىن تاپتىڭىز با؟»، - دەيدى دەپۋتات.
"ادىرنا" ۇلتتىق پورتالى
