ۇكىمەت كىمدەرگە ميلليون تەڭگەدەن بەرەدى: ەڭبەك مينيسترلىگى ءتۇسىندىردى

4948
Adyrna.kz Telegram

تولەمدەردى تولىعىمەن الۋعا بولادى

ءبىرىنشى ۆيتسە-مينيستر ەرجان جىلقىباەۆتىڭ ايتۋىنشا، الدىمەن ءۇيدى كوشىرۋگە كەتەتىن شىعىندارعا ءبىر رەتتىك تولەم بەرىلەدى. ونىڭ كولەمى – وتباسىنىڭ ءاربىر مۇشەسىنە 88 000 تەڭگە.

"بۇدان بولەك، باسپانانى جالداۋعا جانە كوممۋنالدىق قىزمەتتەردى تولەۋگە 30 ايلىق ەسەپتىك كورسەتكىش – 75 750 تەڭگە قاراستىرىلعان. بۇل اقشا اي سايىن ءبىر جىل بويى تولەنەدى. سونداي-اق، كوشىپ كەلگەن ادامداردى جۇمىسقا العان مەكەمەلەرگە سۋبسيديا ءبولىنىپ تۇرادى", - دەدى جىلقىباەۆ ۇكىمەت ۇيىندە وتكەن ءباسپاسوز ءماسليحاتىندا.

ونىڭ سوزىنە قاراعاندا، باسپانانى جالداۋعا بەرىلەتىن اقشانى تولىعىمەن الۋعا دا بولادى.

"ەگەر كوشىپ بارعان ادام ساتىپ الۋعا ءۇي تاپسا، ءوتىنىش جازىپ، ون ەكى ايعا بەرىلەتىن قارجىنى بىردەن السا دا بولادى. ول اقشانىڭ كولەمى 1 ميلليونعا جۋىقتايدى. ءوزىنىڭ اقشاسىن قوسىپ، ءۇي الامىن دەسە، بيۋدجەتتىڭ قارجىسى بىردەن اۋدارىلادى. مىسالى، اۋىلداردا ءۇي ارزان", - دەپ اتاپ كورسەتتى جىلقىباەۆ.

2 مىڭنان استام وتباسى سولتۇستىككە كوشىرىلەدى

رەسمي مالىمەتكە سايكەس، بيىل 2 250 وتباسىنى وڭتۇستىكتەن سولتۇستىككە كوشىرۋ جوسپارلانعان. ولاردىڭ جالپى سانى – 10 000 ادام. وسى ۋاقىتقا دەيىن 1 050 وتباسى نەمەسە 4 000 ادام كوشىرىلدى. ولاردىڭ 60 پروتسەنتى جۇمىسقا ورنالاستىرىلدى.

وسى باعدارلاما اياسىندا "نۇرلى ەرتىس" جوباسى قولعا الىنىپ، ەلوردانىڭ كوپبالالى وتباسىلارى ەكىباستۇز قالاسىنا قونىس اۋدارىپ جاتىر.

جىل باسىنان بەرى "نۇرلى ەرتىس" پيلوتتىق جوباسىمەن 103 كوپبالالى وتباسى ەكىباستۇزعا كوشىپ بارعان. ولاردىڭ بارلىعى باسپانامەن قامتىلدى. ەڭبەككە جارامدى ادامداردىڭ 80 پروتسەنتى جۇمىسقا تۇرعىزىلدى. بالالارعا بالاباقشا مەن مەكتەپتەن ورىن بەرىلدى.

"جىل سوڭىنا دەيىن نۇر-سۇلتان قالاسىنان تاعى 200-دەن استام وتباسى ەكىباستۇزعا كوشىرىلەدى. پيلوتتىق جوبا اياسىندا سولتۇستىك قازاقستانعا 3 ميلليارد تەڭگە ءبولىندى. وسى اقشاعا كوشىپ كەلەتىن ادامدارعا 428 ارەندالىق تۇرعىن ءۇي سالىنادى", - دەيدى جىلقىباەۆ.

"ادىرنا" ۇلتتىق پورتالى

پىكىرلەر