ورالدا بالالار لاگەرىندە 10 جاستاعى بالا سوققىعا جىعىلعان. بۇل تۋرالى جەرگىلىكتى موي گورود باسىلىمى جازدى، دەپ حابارلايدى ”ادىرنا” ۇلتتىق پورتالى.
اقپاراتقا سايكەس، قالا تۇرعىنى 10 جاستاعى ۇلىن اپكەسىمەن بىرگە 10 ماۋسىمدا «اتامەكەن» بالالار لاگەرىنە جىبەرگەن.
«العاشقى كۇندەرى بالالاردى بارىپ كورىپ تۇردىم، لاگەردە تەلەفون قولدانۋعا تىيىم سالىنعان. قالاي بولعاندا دا قىزىم ءبىر بالادان تەلەفون تاۋىپ، 14 ماۋسىم كۇنى ماعان قوڭىراۋ شالىپ، باۋىرىنىڭ لاگەردە سوققىعا جىققانىن ايتتى. كەشكە بالالاردى الىپ كەتتىم، ولارعا لاگەر ۇنامادى دەپ ويلادىم. سول كەزدە ۇلىمدى لاگەر ديرەكتورى ءوزى شىعارىپ سالدى. ۇيگە كەلگەندە ۇلىم دەنەسىندەگى كوگەرگەن جەرلەردى كورسەتتى. اياقتارىندا، قولدارىندا جانە دەنەسىندە كوگەرگەن جەرلەرى بولدى. ول سپورتزال مەن دالادا 8-10 بالا جابىلىپ ۇرعانىن ايتتى. بالالاردى كىنالامايمىن – ولار بالالار عوي. مەنىڭ سۇراعىم لاگەر باسشىلىعىنا، بالالاردى قابىلداپ، ولارعا قاراۋعا مىندەتتى بولعان مينيسترلىككە: مۇنداي جاعداي قالاي ورىن الدى؟ قالايشا بۇعان جول بەردىڭىزدەر؟» - دەيدى بالانىڭ اكەسى.
15 ماۋسىم كۇنى ەر ادام ۇلىمەن تراۆماتولوگقا بارىپ، كوپتەگەن گەماتومالاردى تىركەپ، پوليتسياعا ارىز جازعان. ايتا كەتەيىك، بۇل 15 ماۋسىمدا بولدى. ەر ادامنىڭ ايتۋىنشا، ەشكىم ءىستى قوزعاماعان. تەك ادۆوكات جالداعاننان كەيىن عانا ءىس قوزعالا باستادى.
11 كۇن وتكەن سوڭ، 26 ماۋسىم كۇنى كەشكە پوليتسەيلەر سوت-مەديتسينالىق ساراپتاماعا جولداما بەرگەن.
«26 ماۋسىم كۇنى كەشكە بەردى، ءبىز بارعانشا، ساراپتاما 16.00-گە دەيىن جۇرگىزىلەدى ەكەن، ۇلگەرمەدىك. كەلەسى كۇنى وتتىك. مەنىڭ تۇسىنۋىمشە، بۇل ءىستى جابۋعا تىرىسۋدا، مەنى ەشقايدا شاعىمدانباۋعا كوندىرۋگە تىرىسقاندار كوپ بولدى»، - دەيدى ول.
وسى ارادا بقو پوليتسيا دەپارتامەنتىنىڭ ءباسپاسوز قىزمەتى بۇل وقيعانىڭ 2024 جىلعى 15 ماۋسىمدا ورال قالاسىنىڭ پب-دە تىركەلگەنىن حابارلادى. بۇل ءىس بويىنشا پوليتسيا قىزمەتكەرلەرى كىنالى تۇلعالاردى جانە وقيعانىڭ سەبەبىن انىقتاۋ بويىنشا ءىس-شارالار جۇرگىزگەن. قازىرگى ۋاقىتتا سوت-مەديتسينالىق ساراپتاما تاعايىنداۋ تۋرالى قاۋلى شىعارىلىپ، ونىڭ قورىتىندىسى بويىنشا وسى وقيعاعا زاڭدى باعا بەرىلەتىنى حابارلاندى. تەكسەرۋدى ۇيىمداستىرۋ ماقساتىندا ورال قالاسىنىڭ ءبىلىم بولىمىنە ۇسىنۋ ەنگىزىلگەن.
بقو ءبىلىم باسقارماسى دا وقيعاعا تۇسىنىكتەمە بەردى.
«كامەلەتكە تولماعاندار اراسىندا تاربيە جۇمىسىن ءتيىستى دەڭگەيدە جۇرگىزبەگەنى ءۇشىن وترياد جەتەكشىسىنە جانە تاربيەشىگە تارتىپتىك جازا قولدانىلدى. جەتەكشى جۇمىستان شىعارىلدى. ورال قالالىق ءبىلىم ءبولىمىنىڭ بۇيرىعىمەن «اتامەكەن» لاگەرىنىڭ ديرەكتورىنىڭ مىندەتىن اتقارۋشىعا قىزمەتتىك مىندەتتەرىن تيىسىنشە ورىنداماعانى، جازعى دەمالىستى ۇيىمداستىرۋ جانە بالالاردىڭ قاۋىپسىزدىگىن قامتاماسىز ەتۋ كەزىندە ىشكى ءتارتىپ ەرەجەلەرىن بۇزعانى ءۇشىن «سوگىس» تۇرىندەگى تارتىپتىك جازا قولدانىلدى، - دەلىنگەن حابارلامادا.
