نۇرلان امانقوسوۆ: باستى ماقسات - توكيو وليمپياداسىنا ليتسەنزيا الۋ

229

قازاقستاننىڭ استاناسىندا وتەتىن الەم چەمپيوناتىنا كۇرەستەن ايەلدەر قۇراماسى دايىندىعىن پىسىقتاپ جاتىر. كوماندانىڭ جوسپارى مەن دايىندىق بارىسى بەلگىلى بولدى. بۇل جايلى باس باپكەر نۇرلان امانقوسوۆ ايتىپ بەردى.
- ءبىز قازىر نۇر-سۇلتان قالاسىندا وقۋ-جاتتىعۋ جيىنىندامىز. وزدەرىڭىز بىلەتىندەي، بىلتىر ەلوردادا ايەلدەر كۇرەسى اكادەمياسى اشىلعان بولاتىن. اي سوڭىنا دەيىن وسى جەردە جاتتىعامىز. سودان كەيىن پولشادا وتەتىن "ۆاتسلاۆ تسيالكوۆسكي مەموريالىنا" جول تارتامىز. ۆارشاۆادان ورالعاننان كەيىن ءبىزدى ەكى جيىن كۇتىپ تۇر. ونىڭ العاشقىسىن 10-25 تامىز ارالىعىندا سوچيدە رەسەي قۇراماسىمەن بىرگە وتكىزەمىز. ال ەكىنشى جيىندا ەركىن كۇرەس اكادەمياسىندا جاتتىعىپ، الەم چەمپيوناتىنا تىڭعىلىقتى دايىندالامىز.
- قازىر تولىق قۇرامدى ايتا الاسىز با؟ الەم چەمپيوناتىنا قويىلعان ماقسات قانداي؟
- قۇرام 80% انىقتالدى دەۋگە بولادى. ارينە، بىرنەشە سالماق دارەجەسىندە ەل نامىسىن قورعايتىن بالۋانداردى ءالى تاڭداي المادىق. پولشاداعى تۋرنيردەن كەيىن، تامىزدىڭ باسىندا الەم بىرىنشىلىگىنە باراتىن سپورتشىلاردىڭ ەسىمى انىقتالادى دەپ ويلايمىن. ماقساتقا كەلەر بولساق، الەم چەمپيوناتىنا قاتىسى بار رەسمي قىزمەتكەرلەردىڭ، باپكەرلەر شتابىنا، قىزدارعا ارتىلعان جاۋاپكەرشىلىكتىڭ قانداي ەكەنىن بىلەسىزدەر. فيزيكالىق، فۋنكتسيونالدىق دايىندىقتان بولەك، ءوز وتانىمىزداعى ايتۋلى دودادا جاقسى كۇرەسۋ ءۇشىن پسيxولوگيالىق ءازىر بولۋىمىز قاجەت. ۋاقىتتان وزىپ، ەشتەڭە ايتا المايمىن. بىراق، مەدال ءۇشىن كۇرەسەتىنىمىز انىق. ەڭ باستى ماقسات - توكيو وليمپياداسىنا ليتسەنزيا الۋ. وسى جىلدىڭ ەڭ باستى جارىستارىنا دايىندالۋ ءۇشىن بارلىق جاعىنان قولداۋ بىلدىرگەن قازاقستان گرەك-ريم، ەركىن جانە ايەلدەر كۇرەسى فەدەراتسياسىنا العىسىمدى بىلدىرەمىن.
ايتا كەتۋ كەرەك، ەركىن كۇرەستەن قازاقستان ۇلتتىق قۇراماسى دا بەلسەندى جاتتىعۋ ۇستىندە. ەسكە سالا كەتەيىك، نۇر-سۇلتان قالاسىنداعى گرەك-ريم، ەركىن جانە ايەلدەر كۇرەسىنەن الەم چەمپيوناتى 14-22 قىركۇيەك ارالىعىندا وتەدى.

"ادىرنا" ۇلتتىق پورتالى

پىكىرلەر