Eks-prezıdent Nursultan Nazarbaevtyń qyzy Darıǵa Nazarbaevanyń "el damýyna qosqan úlesin" baıandaıtyn kitap jaryqqa shyqqany týraly aqparat tarady. Biraq bul derektiń jalǵan ekeni anyqtaldy, dep habarlaıdy "Adyrna" ulttyq portaly.
KAZAKH_INFORMtelegram arnasynda Darıǵa Nazarbaevanyń "Moı zaslýgı pered Narodom" atty kitaby Meloman kitap dúkenderinde satylymǵa shyqqany týraly aqparat tarady. Jelide bul kitaptyń jabyq tusaýkeseri ótip, satylymy toqtatylǵany týraly da derekter paıda bolǵan.
Alaıda Orda.kz habarlaýynsha, jelide jeldeı esken aqparat jalǵan.
«Meloman» kitap dúkender jelisi mundaı ataýdaǵy kitaptyń túspegenin jáne eshqandaı satylymǵa shyqpaǵanyn habarlady.
«Jaqynda áleýmettik jelilerde «Meniń halyqqa qyzmetim» kitabynyń satylýy týraly habarlamalar paıda boldy. Mundaı kitap eshqashan bizdiń veb-saıtta nemese Marwin ne «Meloman» dúkenderinde bolmaǵan. Bizdiń bilýimizshe, mundaı kitap áli joq. Biz memder men ázilderdiń bolǵanyna qýanyshtymyz. Bul bizdiń qoǵammen birge ómir súrip, tynys alatynymyzdy kórsetedi», - dep habarlady dúkender jelisiniń baspasóz qyzmeti.
Eske sala keteıik, 2023 jyldyń 1 jeltoqsanynda Nursultan Nazarbaevtyń kitaby jaryqqa shyqqany resmı habarlanǵan bolatyn. Eks-prezıdenttiń kitaby “Meniń ómirim. Bodandyqtan – bostandyqqa” dep atalady.
