الماتى مەملەكەتتىك قۋىرشاق تەاترى مەرەيلى 88-ءشى ماۋسىم شىمىلدىعىن 29 ماۋسىم كۇنى ساعات 12:00-دە فرانتسۋز جازۋشىسى شارل پەررونىڭ الەمگە ايگىلى بالالارعا ارنالعان «ەتىك كيگەن مىسىق» ەرتەگىسىمەن جانە جاسوسپىرىمدەر مەن ەرەسەكتەرگە باعىتتالعان بەلگىلى كلاسسيك قالامگەر نيكولاي گوگولدىڭ «شەكپەن» سپەكتاكلىمەن جابۋدى جوسپارلاۋدا.
تامىرلى تاريحى عاسىرعا جۋىق الماتى مەملەكەتتىك قۋىرشاق تەاترى ءۇشىن 88-ءشى ماۋسىم تاعىلىمدى قويىلىمدارعا، جارقىن جەڭىستەرگە، زور جەتىستىكتەرگە، جاعىمدى جاڭالىقتارعا تولى ەلەۋلى ساتتەرىمەن ەستە قالدى.
10 جىلدان كەيىنگى قۋىرشاق تەاترىنىڭ جاڭارۋى – 88-ءشى ماۋسىمنىڭ ەلەۋلى وقيعالارى قاتارىندا. قۋىرشاق تەاترىنىڭ عيماراتى، فويەسى، ساحنا كەڭىستىگى، كورەرمەن جانە دايىندىق زالدارى، گريم بولمەلەرى، گاردەروب، سانيتارلىق-گيگيەنالىق جانە باسقا دا ورىندار تولىقتاي كۇردەلى جوندەۋدەن ءوتىپ، تەاتر قىزمەتكەرلەرى جاڭا شابىتپەن جۇمىسىن جالعاستىرسا، كورەرمەندەر جاڭا كەلبەت پەن زاماناۋي قويىلىمدارعا كۋا بولدى.
الەمدىك ارەناداعى قۋىرشاق تەاترىنىڭ جاڭاشا كەلبەتىن قالىپتاستىرۋ، حالىقارالىق شىعارماشىلىق بايلانىستاردى نىعايتۋ بارىسىندا تەاتر ۇجىمى 88-ءشى ماۋسىمدا بولگاريا، تۇركيا، رەسەي مەملەكەتتەرىندە وتكەن حالىقارالىق تەاتر فەستيۆالدەرىندە ۇزدىك اتانىپ، جەتىستىكتەر قورجىنىن اتاۋلى جۇلدەلەرمەن تولىقتىردى.
الماتى قالاسى اكىمدىگىنىڭ قولداۋىمەن قۋىرشاق تەاترىنىڭ 12 قىزمەتكەرى گەرمانيا، تۇركيا جانە رەسەي ەلدەرىندە كاسىبي بىلىكتىلىكتەرىن جەتىلدىرۋ مۇمكىندىگىنە يە بولىپ، شىعارماشىلىق شەبەرلىكتەرىن شەتەلدىك ءبىلىم بەرۋ ورىندارىندا شىڭدادى.
88-ءشى ماۋسىمدا قۋىرشاق تەاترىنىڭ تاريحىنا ەلەۋلى جاڭالىق الىپ كەلگەن ءى-ءشى حالىقارالىق «ALMATY PUPPET FESTIVAL» قۋىرشاق تەاترلار فەستيۆالى تۇڭعىش رەت وتكىزىلىپ، پولشا، گرۋزيا، بولگاريا، تۇركيا، وزبەكستان جانە قازاقستاننىڭ 150-گە جۋىق ۇزدىك تەاتر مايتالماندارىنىڭ باسىن قوستى.
قۋىرشاق تەاترىنىڭ رەپەرتۋار قورجىنى 88-ءشى ماۋسىمدا 5 جاڭا قويىلىممەن تولىقتى. گەومەتريالىق پىشىندەر الەمىمەن تانىستىراتىن «باۋىرساق» ەرتەگىسى، الپاۋىت الەمدە اناسىن جوعالتقان كىشكەنتاي مامونتتىڭ تاڭعاجايىپ وقيعاسىن باياندايتىن «اناسىن ىزدەگەن مامونت» سپەكتاكلى، بوكس شەبەرى ءارى ۇلت ماقتانىشى بەكزات ساتتارحانوۆتىڭ باتىل رۋحىن دارىپتەيتىن «چەمپيون» قويىلى، بارشا بۇلدىرشىندەردىڭ سۇيىكتى كەيىپكەرى تۋرالى سىر شەرتەتىن «ەتىك كيگەن مىسىق» ەرتەگىسى جانە گرۋزيالىق رەجيسسەر نيكولوز ءساباشۆيليدىڭ جەتەكشىلىگىمەن ساحنالانعان «شەكپەن» قويىلىمى كورەرمەننىڭ ىستىق ىقىلاسىنا بولەندى.
ەلىمىزدىڭ وزگە دە وڭىرلەرى تۇرعىندارىنا الماتى مەملەكەتتىك قۋىرشاق تەاترىنىڭ ونەرىن تانىستىرۋ جانە دارىپتەۋ ماقساتىندا تەاتردىڭ شىعارماشىلىق ۇجىمى قاراعاندى جانە تالدىقورعان قالالارىندا گاسترولدىك ءىس-ساپارلار وتكىزدى.
الداعى 89-شى تەاتر ماۋسىمىندا كورەرمەندەردى ۇتىمدى جوبالار، جاعىمدى جاڭالىقتار، زامانۋي سپەكتاكلدەر اسىعا كۇتەتىن بولادى.
